“Em i Helpim Mi Long Putim Tok i Go Daun Long Bel Bilong Ol Man”
PORTO ALEGRE, em wanpela siti long hap saut bilong Brasil. Inap sampela taim i go pinis, ol i holim wanpela bikpela bung we ol i stori long ol samting bilong sindaun bilong ol man. Planti tausen manmeri bilong 135 kantri i kam long dispela bung. Long taim bilong brek, wanpela grup bilong ol Witnes bilong wanpela kongrigesen long Porto Alegre i go bungim planti manmeri husat i kam long dispela bung, bambai ol i ken stori wantaim ol long tok bilong Kingdom long Baibel. Olsem wanem ol inap toktok wantaim ol?
Elizabete, em wanpela painia, i tok olsem: “Mipela i mekim wok long buklet Good News for People of All Nations.” Em i tok moa: “Planti bilong ol dispela manmeri i no bin harim liklik gutnius bilong Kingdom, tasol ol i amamas long putim yau long tok mipela i autim. Mipela i toktok wantaim ol man bilong Bolivia, Frans, India, Israel, Naijiria, na Saina. Long sampela bilong ol, mipela inap givim ol buk na nius bilong Baibel long tokples bilong ol yet na ol i amamas long kisim.”
Long Meksiko, wanpela painia nem bilong em Raúl, em tu i mekim wok long dispela buklet na gutpela samting i kamap. Inap sampela taim i go pinis, em i toktok wantaim wanpela man Arap husat i gat 80 krismas em meri bilong em i bin dai i no longtaim i go pinis. Taim em i ritim pinis pes i gat tok bilong Kingdom long tokples Arap long dispela buklet, em i amamas na aiwara i pundaun. Bilong wanem? Long wanem, taim em i ritim tok promis bilong God long Kamapim Tok Hait 21:3, 4 long tokples bilong em yet, olsem bai i no gat dai moa, em i pilim tru dispela tok. Long narapela taim, taim Raúl i autim tok long kain kain taim na ples, em i bungim wanpela man husat i save mekim tokples Potugal. Pikinini man bilong dispela man i bin i dai. Raúl i larim em i ritim pes bilong buklet i gat tokples Potugal long en. Taim em i ritim pinis dispela pes, em i tok olsem em i laik kisim sampela save moa long Baibel, na em i orait long stadi long Baibel.
Raúl i mekim wok long buklet Good News for People of All Nations bilong autim tok long ol man husat i mekim tokples Amenia, Frans, Hindi, Inglis, Jeman, Korea, Mikse, Persia, Rasia, Saina, na Sapotek. Em i tok: “Mi lukim olsem em i bikpela samting long mekim wok long dispela buklet long wok autim tok. Em i helpim mi long putim tok i go daun long bel bilong ol man maski mi no save long tokples bilong ol.”
Long nau, planti manmeri moa i save raun na go sindaun long ol narapela kantri, olsem na yumi gat planti rot moa long bungim ol man bilong narapela tokples. Yumi inap autim tok bilong Kingdom long ol dispela lain long rot bilong mekim wok long buklet Good News for People of All Nations. Olsem wanem? Yu save karim raun dispela buklet wantaim yu?
[Ol Piksa long pes 32]
Raúl i yusim buklet i helpim em long putim tok i go daun long bel bilong ol man