Tok Ol Man i Mekim Long Beten
“Taim mi beten, mi pilim olsem God i stap long sait bilong mi, em i holim han bilong mi na stiaim mi taim mi pilim olsem mi no gat rot.”—MARÍA.
“Meri bilong mi i karim hevi bilong sik kensa inap 13 yia na bihain em i dai. Mi inap tingim long olgeta de mi save beten long God na mi pilim olsem em i tingim pen bilong mi na harim beten bilong mi. Na mi pilim bel isi.”—RAÚL.
“Beten em naispela presen tru God i givim long ol man.”—ARNE.
Long María, Raúl, Arne, na planti narapela, beten em i wanpela spesel presen. Ol i pilim olsem long rot bilong beten, ol inap toktok wantaim God, tok tenkyu long em, na askim em long helpim ol. Ol i bilip tru olsem tok Baibel i mekim long beten long God em i tru: “Bilip yumi gat long em i olsem, maski wanem wanem samting yumi askim em long en na i stret wantaim laik bilong em, em bai harim yumi.”—1 Jon 5:14.
Tasol planti i hatwok long bilipim tok Baibel i mekim long beten. Steve i stori long tingting bilong em long beten olsem: “Taim mi gat 17 krismas, tripela pren bilong mi i dai long tupela narapela narapela eksiden. Wanpela i dai long kar i bam, na tupela i draun long solwara.” Steve i mekim wanem? “Mi beten long God bilong kisim bekim long wai na ol dispela samting i kamap, tasol mi no kisim bekim. So mi askim mi yet, ‘Bilong wanem mi mas beten?’” Planti i pilim olsem God i no bekim ol beten bilong ol, olsem na ol i laik save wai na ol i mas wok yet long beten.
Na tu, i gat ol narapela risen na sampela man i pilim olsem beten i no helpim ol. Sampela i tok God i save long olgeta samting, em i save pinis long ol samting yumi nidim o ol hevi bilong yumi, so i no gat wok long tokim em long ol dispela samting.
Sampela narapela i bilip olsem God i no laik harim ol beten bilong ol bikos long ol sin ol i bin mekim long bipo. Jenny i tok: “Bikpela hevi bilong mi, em mi pilim olsem mi samting nating. Mi mekim ol samting em mi rigret long en, so mi tokim mi yet olsem mi no gutpela inap long God i harim ol beten bilong mi.”
Yu pilim olsem wanem long beten? Sapos yu gat wankain tingting o yu gat tupela tingting long beten, tok bilong Baibel inap mekim isi bel bilong yu bikos em inap bekim ol askim bilong yu. Yumi ken bilipim tok Baibel i mekim long beten;a em inap helpim yu long kisim bekim bilong ol askim olsem:
Yu ting God i save harim ol beten bilong yumi?
Wai na God i no save bekim sampela beten?
Hau yu inap beten na bai God i ken harim?
Olsem wanem beten inap helpim yu?
a Baibel i gat stori bilong planti beten bilong ol wokman bilong God, na tu, ol beten bilong Jisas Krais. Winim olsem 150 beten i stap long Ol Skripsa Hibru, em ol i kolim tu olsem Olpela Testamen.