Yu Ting Beten Inap Helpim Yu?
SAMPELA taim, klostu olgeta man i save pilim olsem ol i mas beten. Tru tumas, ol manmeri bilong klostu olgeta kain lotu ol i save beten strong. Olsem: Planti tausen taim long wanpela de, wanpela man bilong lotu Buda inap kolim kolim dispela beten “Mi bilip long Amida Buda.”
Taim yumi tingim ol hevi i stap long olgeta hap bilong graun, i stret yumi askim olsem: Ol manmeri i laik bai beten bilong ol i kamapim wanem samting? Olsem wanem? Olgeta dispela beten inap helpim yumi?
Bilong Wanem Ol Manmeri i Save Beten?
Planti man bilong Esia ol i save beten long ol tumbuna bilong ol na ol god bilong ol Sinto na Tao. Ol i save mekim olsem, long wanem, ol i ting dispela bai i helpim ol long winim ol tes long skul, o kaikai bilong ol long gaden bai kamap gutpela, o bai ol i no inap kisim sik samting. Ol man bilong lotu Buda i ting olsem sapos ol i mekim planti beten bai ol i kisim bikpela save. Ol Hindu i save givim bel tru long beten long ol god man na god meri em ol i save laikim tru. Ol i mekim olsem bilong kisim save, na kisim planti samting bilong skin, na bilong ol dispela god i ken lukautim ol.
Sampela Katolik i ting ol inap helpim ol man sapos ol i go i stap longwe long ol man na sindaun long ol haus bruder o haus sister samting na ol i beten long olgeta taim. Planti milion Katolik i save kolim nating ol beten ol i save holim long tingting bambai Maria i ken mekim gut long ol, na planti taim ol i save mekim wok long korona bilong helpim ol. Long ol hap bilong Esia planti manmeri i save mekim wok long wanpela samting ol i kolim prea wil bilong mekim ol beten. Ol Talatala i save kolim kolim ol tok bilong Beten Bilong Bikpela, tasol ol i save kamapim tu tingting i stap long bel bilong ol. Planti Juda ol i save go longwe tru long wanpela banis (Western Wall) long Jerusalem bilong mekim beten. Ol i tingting olsem dispela bai mekim na tempel long Jerusalem bai kamap strong gen na gutpela sindaun na bel isi bai kamap.
Maski planti milion manmeri ol i givim bel tru long beten, hevi bilong i stap rabis, ol man i kalabus long dring na drak samting, ol famili i bruk, na pait, ol i wok long i go bikpela. Olsem wanem? Dispela i makim olsem olgeta dispela manmeri ol i no save beten long stretpela pasin? I gat man i save harim ol beten?
Olsem Wanem? I Gat Man i Save Harim Ol Beten?
Ol beten i no inap helpim yumi sapos i no gat wanpela i harim ol. Taim wanpela man i beten, em i save bilip tru olsem wanpela man long ples spirit i save harim beten bilong em. Tasol ol beten i no save go long rot bilong wanpela strong i save karim ol tok. Planti man i bilip olsem wanpela man inap save long tingting bilong man i mekim beten. Yu ting dispela man em i husat?
Ol saveman i no save long olsem wanem ol tingting i save kamap long ol bilion bilion liklik sel long kru bilong man. Tasol i stret olsem dispela Man i wokim kru em inap save long tingting bilong ol man. Dispela man em Man i bin wokim yumi, em God Jehova. (Song 83:18; KTH 4:11) Yumi mas beten long em tasol. Tasol olsem wanem? Jehova i save harim olgeta kain beten olsem?
Olsem Wanem? Jehova i Save Harim Olgeta Beten?
King Devit bilong Israel bilong bipo em i man bilong beten. God yet i bin givim tingting long em na em i mekim singsing olsem: “Yu save harim beten bilong mipela. Olsem na mipela olgeta manmeri i mas i go long yu.” (Song 65:2) Long nau ol man i save mekim planti tausen tok ples, tasol maski yumi mekim wanem wanem tok ples, Jehova inap harim ol beten bilong yumi. Kru bilong ol man i no inap kisim ol dispela planti tok, tasol dispela i no makim olsem God i no inap putim yau long olgeta beten ol man i save mekim long pasin em i orait long en.
Tasol Jisas Krais—em wanpela man bilong beten—em i kamapim olsem God i no save orait long olgeta beten. Tingim tok Jisas i mekim long pasin bilong kolim kolim gen ol beten ol man i save holim pinis long tingting. Em i tok: “Taim yupela i mekim prea, maski long mekim planti toktok nating, olsem ol haiden i save mekim. Ol i ting sapos ol i mekim planti toktok bai God i harim ol.” (Matyu 6:7) Yumi no ken ting Jehova bai i harim ol beten bilong yumi sapos yumi no kamapim tru ol tingting i stap long bel bilong yumi.
Wanpela savetok bilong Baibel i kamapim as na God i no save orait long sampela beten, em i tok: “Sapos man i givim baksait long lo, orait God bai i no inap harim beten bilong en. God bai i lukim dispela beten i olsem stingpela samting tasol.” (Sindaun 28:9) Na Sindaun 15:29 i tok: “Bikpela i save stap longwe long ol man i save mekim pasin nogut. Tasol em i putim yau long beten bilong ol stretpela man.” Taim ol hetman bilong ol Juda bilong bipo i bin mekim bikpela rong, Jehova i tok: “Taim yupela i apim han na prea long mi, bai mi no ken lukim yupela. Maski yupela i prea planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.”—Aisaia 1:1, 15.
Aposel Pita i toktok long narapela samting em inap mekim na bai God i no orait long ol beten. Pita i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin long ol. Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela.” (1 Pita 3:7) God bai i no inap harim beten bilong man i no bihainim dispela tok!
Olsem na i gat sampela samting yumi mas mekim sapos yumi laik bai God i harim beten bilong yumi. Tasol planti manmeri em ol i save beten ol i no save tingting tumas long mekim ol samting God i laik bai yumi mas mekim. Olsem na maski ol man i wok strong tru long beten, dispela i no kamapim yet gutaim long graun.
Orait, yu ting God i laik yumi mas mekim wanem bambai em i ken harim ol beten bilong yumi? Bilong bekim dispela askim yumi mas tingim as na yumi save beten. Tru tumas, sapos yumi laik save olsem ol beten inap helpim yumi o nogat, yumi mas save long as na yumi beten. Yu ting i gat wanem as na Jehova i opim rot bilong yumi long toktok long em?
[Piksa Kredit Lain long pes 3]
G.P.O., Jerusalem