God i Save Harim Beten Bilong Husat?
JEHOVA em i God bilong harim beten. Baibel i tok, em i “save harim beten.” (Buk Song 65:2) Em i laik harim beten bilong yumi na helpim yumi. Tasol em i save harim beten bilong husat?
God i save harim beten bilong ol man i mekim pasin em i laikim. Ol i save bilip tru long em olsem man bilong raitim song i bilip tru long em na i tok: “Wel abus i save dai long wara na i ran i go long liklik wara bilong dring. Na olsem tasol, God, mi laikim tumas bai mi stap klostu long yu. God, yu God i gat laip, mi laikim yu tumas, olsem man, nek bilong en i drai na i laik dringim wara.” (Buk Song 42:1, 2) Tasol i gat wanem samting na yumi ken save, God Jehova i save harim beten bilong ol man i lotu tru long em?
Samting i Kamapim Klia Olsem God i Save Harim Beten
Planti stori i stap long Baibel i kamapim klia olsem Jehova i save harim beten bilong ol gutpela wokboi bilong em. King Jehosafat bilong Juda i beten askim Jehova long kisim bek em long han bilong ol birua. Jehova i harim na helpim em long winim pait. Jehova i mekim ol birua yet i pait na narapela i kilim i dai narapela. (2 Stori 20:1-26) Taim bikpela ami olsem i kam pait wantaim King Hesekia, long pasin daun em i beten askim Jehova long helpim em. Hesekia i lukim Jehova i helpim em—wanpela ensel i kilim i dai 185,000 Asiria long wanpela nait.—Aisaia 37:14-20, 36-38.
Bilong wanem God i harim beten bilong dispela tupela king? Long wanem, tupela i krai long em na i tok, sapos ol i lus long pait, dispela bai bagarapim nem bilong Em. (2 Stori 20:6-9; Aisaia 37:17-20) Tupela i tingim nem bilong God. Wanpela buk (The International Standard Bible Encyclopedia) i tok: “Wok tru bilong beten i no bilong helpim tasol man i beten—em bilong litimapim nem bilong God.” Olsem na ol gutpela wokboi bilong Jehova i ken save, em bai harim ol beten i bilong ‘litimapim nem bilong em.’ Ol dispela stori i kamapim klia olsem God i save harim ol dispela kain beten, olsem na lain bilong God i ken bilip tru olsem em i save harim beten bilong ol.—Buk Song 91:14, 15; 106:8; Sindaun 18:10.
Tasol Jehova yet i skelim wanem beten em bai harim. I gat gutpela as na em i no save harim sampela beten. Sapos yu pilim olsem em i no harim beten bilong yu, yu mas tingting olsem: ‘I gat wanem as na ating God i no harim?’
Bilong Wanem God i No Harim Sampela Beten?
Wanpela taim Jehova i tokim ol Israel: “Maski yupela i [beten] planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.” (Aisaia 1:15) Sapos man i kalapim lo bilong Jehova, Jehova i no inap harim beten bilong em. Baibel i tok: “Sapos man i givim baksait long lo, orait God bai i no inap harim beten bilong en. God bai i lukim dispela beten i olsem stingpela samting tasol.”—Sindaun 28:9.
Baibel i kolim narapela as na God i no save harim sampela beten. Baibel i tok: “Taim yupela i beten long kisim samting, yupela i no save kisim, long wanem, tingting bilong yupela i no stret na yupela i beten long God. Yupela i ting long kisim ol samting bilong tromoi tasol long laik bilong bel bilong yupela.” (Jems 4:3) Em nau, Jehova i no save harim beten bilong man i tingting long inapim laik nogut bilong bel. Na yumi mas save, God yet i save tingim ol samting em bai mekim bilong helpim man; ol man i no ken tokim em long ol samting em i mas mekim.
God i save harim beten bilong ol man i gat klinpela bel, na stretpela tingting, na ol i beten long rot Em i makim—em Krais Jisas. (Jon 14:6, 14) Tasol sampela taim ol dispela man tu i pilim olsem God i no harim beten bilong ol. I gat wanem as na sampela taim God i no helpim kwik ol wokboi bilong em i beten askim em long helpim ol?
Jehova i save wanem taim i gutpela taim bilong helpim man i beten long em. Olsem: Maski manki i askim papa long baim wanpela wilwil bilong em, ating papa bai wet inap long manki i bikpela liklik pastaim, nogut em i kisim bagarap long wilwil. Na ating i wankain tasol long sampela man i laikim tumas God na ol i beten askim em long sampela samting. God i save long ol samting ol i mas kisim bambai ol inap i stap gutpela, na em i save givim ol dispela samting long ol long taim stret bilong helpim ol.
Tasol ol wokboi bilong Jehova i no save kisim olgeta samting ol i askim Em long en. Ol i sinman na ating sampela samting ol i laik kisim i no inap helpim ol. Gutpela Papa bilong ol long heven i no laik givim samting long ol em inap nogutim ol. Em i Man bilong givim “olgeta gutpela samting” long ol man. (Jems 1:17) Na samting man i beten askim God long en, sapos God i ting dispela i no samting man i mas kisim bilong helpim em, orait God i no ken mekim wanpela samting. (Lukim 2 Korin 12:7-10.) God i save harim ol beten i stret long laik bilong em na long ol samting em i laik mekim long lain bilong em.—1 Jon 5:14, 15.
God i “Harim Beten” Bilong Jisas
Krais Jisas em i man bilong beten. (Matyu 6:9-13; Jon 17:1-26) Em i bilip tru olsem Papa bilong em bai harim beten bilong em. Wanpela taim Jisas i tok: “Papa, mi . . . save pinis oltaim yu save harim beten bilong mi.” (Jon 11:41, 42) Tasol taim em i laik i dai, ating em i pilim olsem God i no harim moa beten bilong em, a? Em i tok, “God bilong mi, God bilong mi, bilong wanem yu lusim mi?”—Matyu 27:46.
Taim Jisas i tok olsem, em i truim wanpela tok profet long i dai bilong em. (Buk Song 22:1) Na ating Jisas i laik tok tu, Jehova i no lukautim em moa—em i larim Pikinini bilong Em i karim pen na i dai olsem bilong traim em tru, em bai stap gut long Em o nogat. Sapos yumi skelim ol samting i bin kamap long de Jisas i dai, yumi ken save God i bin harim beten bilong em.
Long apinun, long taim ol birua i holim Jisas, em i bin beten long gaden Getsemani. Tripela taim em i krai long Papa na i tok: “Sapos inap, orait mi laik bai yu tekewe dispela kap long mi.” (Matyu 26:39, 42, 44) Jisas i no surik long lusim laip bilong em bilong baim bek ol manmeri i bilip. Nogat. Tasol bel bilong em i hevi, long wanem, em i save taim ol birua i nilim em long pos na kilim em i dai olsem wanpela man nogut i bin tok bilas long God, dispela inap bagarapim nem bilong God. Orait, Jehova i bin harim beten bilong Jisas o nogat?
Planti yia bihain, aposel Pol i raitim tok olsem: “Taim Jisas i stap man long graun, em i save . . . God inap long kisim bek em, na em i no mas i dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.” (Hibru 5:7; Luk 22:42, 44) Tru, long nait paslain long em i dai, em i pilim hevi nogut tru na em i krai long God na God i “harim beten” bilong em. Tasol God i mekim wanem bilong helpim em?
God i salim wanpela ensel “i kam long [Jisas] na i strongim em.” (Luk 22:43) Olsem na em inap karim pen na i dai long diwai. Na yumi ken save, long dispela taim Jehova i tok promis long em olsem taim em i dai long diwai, dispela i no ken bagarapim nem bilong Jehova; bihain bai dispela samting yet i mekim holi nem bilong Em. Na taim Jisas i dai long diwai, dispela i opim rot long ol Juda, em Lo i tok ol i mas bagarap, na ol inap kisim laip.—Galesia 3:11-13.
Tripela de bihain, God Jehova i kirapim bek Jisas na kamapim klia olsem Jisas i no man bilong tok bilas long God—God i givim bikpela nem moa yet long em long heven. (Filipai 2:7-11) Em nau, God i harim beten bilong Jisas long “dispela kap” na em i helpim tru Jisas. God Jehova i helpim em long rot Em yet i makim. Em i mekim gut tru long Jisas, long wanem Jisas i bin beten long em olsem: “Yu no ken bihainim laik bilong mi. Nogat. Yu mas bihainim laik bilong yu tasol.”—Luk 22:42.
Jehova i Harim Beten long Nau
Ol man long nau, em ol i laik bai Jehova i amamas long ol, ol i mas bihainim pasin bilong Jisas na beten tokim Jehova: “Yu mas bihainim laik bilong yu tasol.” Ol i mas bilip tru olsem Jehova bai harim beten bilong ol na helpim ol long rot bilong helpim ol tru. Na em bai mekim ol samting ‘winim tru ol samting ol i bin tingting long en na askim em long en.’—Efesus 3:20.
Wanpela yangpela meri Kristen i stap wantaim papamama, em tupela i no bilip. Ol samting i painim em i helpim em long save tru, dispela tok bilong Efesus 3:20 i stret. Sosaiti Was Taua i salim pas na tokim em, ol i laik bai em i go mekim wok olsem misineri. Em i beten askim God long helpim em long tingim gut dispela samting. Tasol long bel bilong em, em i laik tru long i stap yet wantaim papamama bambai em inap helpim tupela long kamap Kristen. Olsem na em i beten long God na em i tok: “Wanem laik bilong yu? Yu laik bai mi kisim dispela wok maski papamama i birua long dispela? o yu laik bai mi stap yet wantaim tupela bambai mi inap helpim ol?” Olgeta taim em i beten, bel bilong em i tokim em, em i mas i go mekim dispela wok. Olsem na em i ting Jehova i harim beten bilong em na dispela em i laik bilong Jehova, na em i orait long i go mekim dispela wok.
God Jehova i strongim dispela yangpela meri bambai em i no ken senisim tingting. Taim Sosaiti i tokim em long i go long Ailan Awaji, long Japan, nau papamama i kirap nogut na birua moa yet long em. Tasol ol i no inap kirapim em long senisim tingting, olsem na mama i ting olsem em i mas stadi na lainim tok bilong Baibel bambai em inap save long as bilong dispela tingting bilong pikinini meri. Tripela mun bihain papamama i go lukim em. Ol i lukim olsem ol narapela Witnes Bilong Jehova i lukautim em gut tru. Papa i pilim tru dispela samting na taim i no gat narapela i stap wantaim em, em i krai. I no longtaim na papa tu i kirap long stadi. Bihain papamama i kisim baptais na tupela i kirap mekim wok bilong Jehova na i stap gut long dispela wok. God Jehova i mekim gut long dispela meri Kristen, winim tru samting em i bin askim Em long en, a?
God i Harim Beten Bilong Ol
Yu tingim tok bilong meri yumi bin stori long em long kirap bilong stori i kamap paslain long dispela? I no gat wanpela taim em i pilim olsem God i harim beten bilong em. Tasol bihain em i pilim. Em i kirap raitim long wanpela buk ol bikpela samting em i beten askim God long en. Bihain em i lukim dispela buk na em i kirap nogut, long wanem nau em i save, God Jehova i bin harim klostu olgeta dispela beten bilong em, maski em yet i lusim tingting long sampela! Olsem na em i save, God i tingim em na harim beten bilong em na helpim em long gutpela pasin sori em inap helpim em tru.
Sapos yu pilim olsem God i no harim ol beten bilong yu, askim yu yet: ‘Mi save tru long Jehova, em Man bilong harim beten? Sapos nogat, mi mekim ol samting bambai mi ken kisim save long em na dediket na kamap wokboi bilong em?’ God i save harim beten bilong ol man i laikim em tumas na ol i bihainim laik bilong em. Ol i save “beten long olgeta taim,” na God i harim beten bilong ol, olsem em i bin mekim long Jisas. (Rom 12:12) Olsem na yu mas “autim . . . olgeta tingting” bilong yu long em, na bihainim laik bilong em. (Buk Song 62:8) Olsem bai em i harim beten bilong yu.
Long nau planti milion manmeri i beten askim God long wanpela samting, na God i harim beten bilong ol. Orait, nau yumi ken stori long olsem wanem yumi inap save tru, God i save harim kain beten olsem.