Ol Rot Jehova i Bekim Ol Beten Bilong Yumi

1-2. Taim yumi beten, yumi inap tingting planti long wanem samting?

YU BIN tingting planti olsem Jehova i save bekim ol beten bilong yu? Sapos olsem, orait i no yu wanpela tasol i pilim olsem. Planti bratasista i tok ol tu i pilim olsem, moa yet long taim ol i karim wanpela bikpela hevi. Sapos yumi wok long karim wanpela hevi, ating yumi tu inap pilim hatwok long luksave long rot Jehova i wok long bekim ol beten bilong yumi.

² Yumi bai stori long as na yumi ken bilip tru olsem Jehova i save bekim ol beten bilong ol wokman bilong em. (1 Jon 5:15) Na tu, yumi bai kisim bekim bilong ol dispela askim, olsem: Wai na sampela taim yumi inap pilim olsem Jehova i no bekim ol beten bilong yumi? Long wanem ol rot Jehova i wok long bekim ol beten bilong yumi long nau?

JEHOVA INAP BEKIM OL BETEN BILONG YUMI LONG OL ROT YUMI NO TING LONG EN

3. Wai na Jehova i laik bai yumi beten long em?

³ Baibel i tokim yumi olsem Jehova i laikim yumi tru na yumi dia tumas long em. (Hag. 2:7; 1 Jon 4:10) Olsem na em i tokim yumi long beten askim em long helpim yumi. (1 Pita 5:6, 7) Em i laik helpim yumi long pas gut wantaim em na long sanap strong na karim ol hevi i painim yumi.

4. Hau yumi save olsem Jehova i save bekim ol beten bilong ol wokman bilong em? (Lukim tu piksa.)

⁴ Planti taim yumi save ritim ol stori bilong Baibel we Jehova i bekim beten bilong ol wokman bilong em. Yu inap tingim wanpela kain stori olsem? Wanpela eksampel em King Devit. Long laip olgeta bilong em, planti birua i laik mekim nogut long em, na planti taim em i save beten askim Jehova long helpim em. Wanpela taim, em i beten strong olsem: “O Jehova, harim beten bilong mi; na putim yau long singaut bilong mi na helpim mi. Yu save bihainim tok bilong yu na yu gat stretpela pasin, olsem na yu mas harim singaut bilong mi.” (Sng. 143:1) Jehova i harim beten bilong Devit na kisim bek em. (1 Sml. 19:10, 18-20; 2 Sml. 5:17-25) Olsem na Devit inap tru long tok olsem: “Jehova i save stap klostu long ol manmeri i save singaut long em i helpim ol.” Yumi tu i ken save tru olsem Jehova bai helpim yumi.​—Sng. 145:18.

5. Long bipo, yu ting oltaim Jehova i bekim beten bilong ol wokman bilong em long rot ol i ting long en? Stori long wanpela eksampel. (Lukim tu piksa.)

⁵ Ating Jehova i no inap bekim ol beten bilong yumi long rot yumi ting long en. Dispela samting i bin painim aposel Pol. Em i beten askim God long rausim samting i olsem “wanpela nil i sutim skin” bilong em. Inap 3-pela taim, Pol i beten na askim God long rausim dispela hevi. Yu ting Jehova i bekim ol dispela beten? Yes, tasol Em i no mekim long rot em Pol i bin ting long en. Jehova i no rausim dispela hevi, nogat. Em i givim strong em Pol i nidim bilong wok yet long givim bel long mekim wok bilong Em.​—2 Kor. 12:7-10.

6. Sampela taim, wai na yumi inap pilim olsem Jehova i no bekim ol beten bilong yumi?

⁶ Sampela taim, yumi tu inap kisim ol bekim bilong ol beten bilong yumi long ol rot we yumi no ting long en. Yumi ken save tru olsem Jehova i save long gutpela rot bilong helpim yumi. Na tu, em “inap mekim ol samting i winim tru ol samting [yumi] askim o tingting long en.” (Efe. 3:20) Olsem na sampela taim, em inap bekim ol beten bilong yumi long ol taim o long ol rot we yumi no ting long en.

7. Wai na sampela taim yumi mas senisim ol samting yumi beten long en? Stori long wanpela eksampel.

⁷ Ating yumi mas senisim ol samting yumi beten long en taim yumi kliagut moa long laik bilong Jehova. Tingim stori bilong Martin Poetzinger. Bihain tasol long Brata Poetzinger i marit, ol i putim em long banis kalabus nogut bilong ol Natsi. Pastaim, em i beten askim Jehova long helpim em long lusim dispela banis kalabus so em i ken go lukautim meri bilong em na kirap gen long autim tok. Tasol bihain long tupela wik, em i luksave olsem Jehova i no opim rot long em i lusim dispela banis kalabus. So em i kirap long beten olsem: “Jehova, plis soim mi long samting yu laik mi mas mekim.” Na bihain em i kirap long tingim ol hevi em ol narapela brata insait long banis kalabus i karim. Planti bilong ol i wari long meri na ol pikinini bilong ol. Bihain Brata Poetzinger i beten olsem: “Jehova, tenkyu long nupela asainmen bilong mi. Helpim mi long strongim na mekim gut bel bilong ol brata bilong mi.” Em i mekim olsem long banis kalabus insait long 9-pela yia!

8. Yumi mas tingim wanem bikpela samting taim yumi beten?

⁸ Yumi mas tingim olsem i gat ol samting Jehova i tingting pinis long mekim, na em bai bihainim sediul bilong em long inapim ol dispela samting. Em i tingting pinis long rausim na pinisim tru olgeta samting i save kamapim pen na hevi long nau—olsem ol netrol disasta, ol sik, na dai. Long rot bilong Kingdom bilong em, Jehova bai inapim samting em i tingting pinis long mekim. (Dan. 2:44; Rev. 21:3, 4) Tasol paslain long dispela taim i kamap, Jehova i larim Satan long bosim graun.b (Jon 12:31; Rev. 12:9) Long nau, sapos Jehova i pinisim pen na hevi bilong ol man, bai i luk olsem wok bos bilong Satan i kamapim gutpela samting. Maski yumi mas wet long Jehova i truim ol tok promis bilong em, dispela i no makim olsem em i lusim tingting pinis long yumi, nogat. Yumi ken stori long sampela rot Jehova i save helpim yumi.

OL ROT JEHOVA I BEKIM OL BETEN BILONG YUMI LONG NAU

9. Olsem wanem Jehova inap helpim yumi taim yumi mas mekim ol disisen? Stori long dispela.

⁹ Em i givim yumi savetingting. Jehova i tok promis long givim yumi savetingting em yumi nidim bilong mekim ol gutpela disisen. Yumi nidim savetingting i kam long God bilong mekim ol bikpela disisen long laip bilong yumi, olsem disisen bilong stap singel o long marit. (Jems 1:5) Tingim stori bilong wanpela singel sista, nem bilong em Maria.c Em i amamas long mekim wok painia oltaim taim em i bungim wanpela brata. Em i tok: “Taim pasin pren bilong mitupela i kamap strong, mipela i laikim tru narapela narapela. Mi save olsem mi mas mekim wanpela disisen. So mi beten strong long dispela samting inap planti taim. Mi nidim helpim bilong Jehova, tasol mi save tu olsem Jehova i no inap mekim dispela disisen bilong mi.” Em i pilim olsem Jehova i bekim ol beten bilong em long kisim savetingting. Hau dispela samting i kamap? Taim em i mekim wok painimaut long ol pablikesen bilong yumi, em i painim ol atikol we i helpim em long kisim bekim bilong ol askim bilong em. Na tu, em i bihainim gutpela edvais bilong mama bilong em. Dispela edvais i helpim Maria long skelim gut ol samting em i pilim long bel. Na bihain, em i mekim gutpela disisen.

10. Olsem Filipai 4:13 i kamapim, Jehova bai mekim wanem bilong helpim ol wokman bilong em? Stori long wanpela eksampel. (Lukim tu piksa.)

¹⁰ Em i givim yumi strong bilong karim hevi. Jehova i givim strong long aposel Pol, olsem tasol em bai givim yumi strong yumi nidim bilong karim ol hevi. (Ritim Filipai 4:13.) Tingim hau Jehova i bin helpim wanpela brata nem bilong em Benjamin long sanap strong na karim ol bikpela hevi i painim em. Taim em i yangpela, Benjamin na famili bilong em i stap long ol refiuji kem long Afrika. Benjamin i tok: “Planti taim mi save beten na askim Jehova long givim mi strong long mekim ol samting i stret long ai bilong em. Jehova i bekim ol beten bilong mi long rot bilong givim bel isi long mi, strongim bel bilong mi long autim tok yet, na ol pablikesen bilong helpim mi long stap strong long bilip.” Em i tok moa olsem: “Taim mi ritim stori bilong ol wanbilip Witnes na mi kisim save long hau Jehova i helpim ol long sanap strong na karim ol hevi, dispela i strongim tingting bilong mi long wok yet long stap gut long em.”

11-12. Olsem wanem Jehova inap yusim ol wanbilip bilong yumi long bekim ol beten bilong yumi? (Lukim tu piksa.)

¹¹ Em i yusim ol wanbilip bilong yumi. Long nait paslain long Jisas i givim laip bilong em olsem ofa, em i beten strong long God. Em i beten strong na askim Jehova long no ken larim ol man i ting olsem em i man bilong tok bilas long God. Tasol Jehova i no mekim samting Jisas i askim long en, nogat, em i helpim Jisas long rot bilong salim wanpela ensel i go bilong strongim em. (Luk 22:42, 43) Olsem tasol, Jehova inap helpim yumi long rot bilong wanpela wanbilip i ringim yumi o visitim yumi na strongim yumi. Yumi olgeta i ken painim rot bilong mekim ol “gutpela tok” long ol wanbilip bilong yumi.​—Prov. 12:25.

¹² Tingim stori bilong wanpela sista nem bilong em Miriam. Sampela wik bihain long man bilong Miriam i dai, em i stap wanpis long haus, na em i pilim olsem em i no gat hop na em i bel hevi tru. Em i wok long krai planti na em i pilim olsem em i laik toktok long wanpela. Em i tok: “Mi no gat strong long ringim wanpela, so mi beten long Jehova. Taim mi wok long krai na beten i stap, fon bilong mi i ring. Wanpela elda i ring, em wanpela gutpela pren bilong mipela.” Dispela elda na meri bilong em i mekim ol gutpela tok bilong mekim isi bel bilong Miriam. Em i bilip tru olsem Jehova i kirapim dispela brata long ringim em.

13. Stori long wanpela eksampel long hau Jehova inap yusim ol lain i no lotuim em long bekim ol beten bilong yumi.

¹³ Em inap yusim ol lain i no lotuim em. (Prov. 21:1) Sampela taim, Jehova i save bekim ol beten bilong lain bilong em long rot bilong kirapim ol man i no lotuim em long helpim ol. Olsem, em i kirapim King Artaserksis long givim tok orait long Nehemia long i go bek long Jerusalem so em inap helpim wok bilong stretim gen taun Jerusalem. (Neh. 2:3-6) Long nau tu, Jehova inap kirapim ol lain i no lotuim em long helpim yumi taim yumi nidim helpim.

14. Yu laikim wanem samting long stori bilong Soo Hing? (Lukim tu piksa.)

¹⁴ Wanpela sista nem bilong em Soo Hing, em i pilim olsem Jehova i helpim em long rot bilong dokta bilong em. Pikinini man bilong em i karim planti hevi long sik bilong tingting. Taim pikinini bilong em i insait long wanpela bikpela eksiden, em na man bilong em i risain long wok mani bilong ol bambai ol i ken lukautim em. Dispela i mekim na ol i bungim hevi bilong mani. Soo Hing i tok em i pilim olsem dispela hevi i pinisim tru olgeta strong bilong em. Em i autim olgeta samting em i pilim long bel na tingting bilong em long Jehova, na askim em long helpim em. Dispela dokta ol i go lukim, em i orait long helpim ol. Dispela i opim rot long ol i kisim helpim long gavman na kisim wanpela ples bilong ol i ken i stap long en. Bihain Soo Hing i tok: “Mipela i lukim Jehova i helpim mipela long karim dispela hevi. Tru tumas, em i ‘Man Bilong Harim ol prea.’”​—Sng. 65:2.

YUMI MAS I GAT BILIP BILONG LUKIM JEHOVA I BEKIM OL BETEN BILONG YUMI

15. Wanem samting i helpim wanpela sista long luksave olsem Jehova i bekim ol beten bilong em?

¹⁵ Jehova i no save mekim ol mirakel long bekim ol beten bilong yumi. Tasol ol bekim yumi kisim, ol i helpim yumi long stap gut yet long Papa bilong yumi long heven. So luksave long hau Jehova i bekim ol beten bilong yu. Wanpela sista nem bilong em Yoko, em i pilim olsem Jehova i no bekim ol beten bilong em, tasol bihain em i kirap long raitim wanpela lista bilong ol samting em i bin askim Jehova long en. Bihain long sampela haptaim i lus, em i lukim gen notbuk bilong em na em i luksave olsem Jehova i bin bekim planti beten bilong em, sampela bilong ol dispela beten em i lusim tingting pinis long ol. Sampela taim, i gutpela long yumi lusim haptaim long tingim ol rot Jehova i wok long bekim ol beten bilong yumi.​—Sng. 66:19, 20.

16. Olsem wanem yumi ken soim olsem yumi gat bilip? (Hibru 11:6)

¹⁶ Yumi soim olsem yumi gat bilip taim yumi beten long Jehova na yumi luksave long ol narapela narapela rot em i bekim ol beten bilong yumi. (Ritim Hibru 11:6.) Tingim stori bilong Mike na meri bilong em Chrissy. Ol i putim mak long wok long Betel. Mike i tok: “Inap planti yia, mipela i putim aplikesen bilong i go long Betel, na planti taim mipela i beten long Jehova long dispela mak, tasol mipela i no kisim singaut bilong i go long Betel.” Mike na Chrissy i bilip yet olsem Jehova i save long gutpela rot bilong yusim ol long wok bilong em. Ol i mekim ol samting ol inap mekim olsem mekim painia oltaim long hap i sot long ol pablisa na sapotim ol tiokratik konstraksen projek. Long nau ol i mekim wok sekit. Mike i tok: “Jehova i no bekim ol beten bilong mipela long rot we mipela i bin ting long en. Tasol em i bekim ol beten bilong mipela na em i mekim olsem long ol rot i gutpela moa winim ol rot mipela i bin tingim.”

17-18. Olsem Buk Song 86:6, 7 i kamapim, yumi ken bilip tru long wanem samting?

¹⁷ Ritim Buk Song 86:6, 7. Devit em man bilong raitim song i bilip tru olsem Jehova i harim ol beten bilong em na Em i bekim ol dispela beten. Yu tu i ken holim wankain bilip olsem. Ol eksampel yumi stori long en long dispela atikol i strongim yumi olsem Jehova i ken givim yumi savetingting na strong em yumi nidim bilong sanap strong na karim ol hevi. Long nau, em inap yusim ol wanbilip bilong yumi na ol man i no lotuim em long helpim yumi long sampela rot.

¹⁸ Em tru olsem oltaim Jehova i no inap bekim ol beten bilong yumi long ol rot we yumi ting long en, tasol yumi save olsem em bai bekim ol beten bilong yumi. Em bai givim yumi helpim yumi nidim na long taim stret yumi nidim. So wok yet long beten na bilip olsem Jehova bai putim yau, na yu ken save tru olsem em bai lukautim yu long nau na em bai “inapim laik bilong olgeta samting i gat laip” long nupela taim bai kamap klostu nau.​—Sng. 145:16.