Ol Beten God i Save Harim

I GAT wanpela laik i stap long bel bilong ol man, em ol i laik toktok wantaim wanpela bikpela man bilong antap. Sampela rait bilong ol Isip bilong bipo em i kamapim ol beten bilong ol. Sampela beten i bilong singaut long wanpela god i mas lukautim ol, na sampela beten i bilong litimapim nem bilong wanpela god. Ol Grik em ol i bin i stap olsem 8 handet yia paslain long Krais ol i bin mekim ol singsing bilong lotu na ol beten. Taim ol Rom i bin mekim beten, ol i mas tingting gut long wanem wanem god ol i beten long en, long wanem ol Rom i bin lotuim planti god.

Long nau ol bikpela lotu bilong graun ol i save mekim beten. Ol lain bilong lotu Buda na Hindu na Juda na ol lotu ol i kolim Kristen, ol i save mekim planti beten. Tasol ol dispela lotu i gat kain kain pasin bilong beten, na ol dispela i save paulim tingting bilong ol man em ol i laik bai God i harim beten bilong ol.

Olgeta Beten i Gutpela Tasol?

I gat kain kain beten ol man i save mekim, olsem na yumi laik save, olgeta beten i gutpela tasol o olsem wanem? Sampela i save tok, maski man i mekim wanem kain beten, o em i beten olsem wanem, tasol sapos em i gat gutpela bel na em i ‘bilip,’ orait beten bilong em i gutpela tasol. Orait yu yet yu ting olsem wanem? Ol man i gat kain kain tingting long dispela samting, olsem na yumi mas skelim gut na wok long kisim save long tok bilong wanpela Man i antap long yumi ol man bilong graun.

Ol tok i kamap bihain long dispela ol i kamapim bekim bilong ol dispela askim, na ol i kisim long Baibel Holi, em tok bilong dispela Man Antap. Baibel i tokaut klia olsem: Sapos man i laik bai God i harim beten bilong em, nogut em i ting olgeta kain beten i gutpela tasol.

Baibel i Tokim Yumi:

Yumi mas beten long husat

Bilong wanem God i no save harim sampela beten

Wanem ol samting yumi ken beten askim God long en

Olsem Wanem long Man i Mekim Beten?

Nambawan bikpela samting, em bilip. Tasol nogut man i bilip tasol olsem God i stap na em i save harim beten. Dispela kain bilip tasol i no inap. (Hibru 11:⁠6) Bilong kamapim long ples klia dispela bilip, man i mas wok strong long bihainim ol stretpela lo bilong God i stap long Baibel. Taim Jisas i mekim bikpela tok bilong em long maunten, em i tok: “Yupela i no ken ting, olgeta man i save kolim mi ‘Bikpela, Bikpela,’ bai ol i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”−Matyu 7:⁠21.

Na profet Aisaia tu i stori long sampela man em God i no save harim beten bilong ol. Aisaia i tok: “Maski yupela i mekim planti beten, tasol mi [God Jehova] no save harim; blut i pulap long han bilong yupela.” (Aisaia 1:​15, NW ) Olsem na sapos man i kapsaitim blut bilong narapela man na em i no ting laip bilong man i holi, orait God i no ken harim beten bilong em, maski em i beten planti taim o em i givim bel long beten.

Bilong Wanem Sampela Taim God i No Save Harim Beten Bilong Sampela Man Ol i Tok Ol i Bilip?

Maski yumi tok yumi bilip, tasol i no olsem God i amamas long yumi na God bai harim beten bilong yumi. Nogat. Planti man ol i save tok ol i bilip. Tasol bilip bilong yumi i mas i gat as bilong en. Stretpela save i mas i stap olsem as bilong bilip bilong yumi, na bilong kisim dispela kain save, yumi mas stadi long Baibel. Na bilip bilong yumi i mas kamapim sampela wok, olsem Baibel i tok: “Yumi save, bodi i no gat spirit wantaim, em i dai pinis. Olsem tasol, man i bilip nating na i no kamapim gutpela pasin tu, bilip bilong dispela man em i olsem i dai pinis.”−Jems 2:⁠26.

Sapos man i bilip tru long God, em bai tingim God long olgeta de. Em i no ken tingim God taim wanpela hevi i painim em na long dispela taim tasol em i beten. Nogat. Na em bai mekim ol stretpela wok i kamapim long ples klia bilip bilong em, olsem tokim ol narapela man long dispela bilip.

Yumi Mas Mekim Wanem Kain Pasin Bilong Beten?

Yumi no ken kolim nating wanpela beten, o kaunim long wanpela buk; na yumi no ken kolim wanpela tok planti taim. Na yumi no ken beten bilong litimapim nem bilong yumi long ai bilong ol man. Jisas i skulim yumi long stretpela pasin bilong beten na em i tokim yumi long ol samting yumi no ken mekim taim yumi beten. Em i tok: “Taim yupela i mekim [beten], yupela i no ken mekim olsem ol man bilong giaman. Ol i laikim tumas long sanap na mekim [beten] insait long haus lotu, na long kona bilong bikrot, bai ol man i ken lukim ol. . . .Na taim yupela i mekim [beten], maski long mekim planti toktok nating, olsem ol haiden. Ol i ting sapos ol i mekim planti toktok bai God i harim ol.”−Matyu 6:​5-7.

Baibel i no makim sampela kain pasin yumi mas mekim taim yumi beten, olsem brukim skru o kain samting olsem. Tasol taim yumi beten yumi mas mekim pasin daun long ai bilong God, na ol tok yumi mekim insait long beten bilong yumi, dispela tu i mas kamapim pasin daun bilong yumi, olsem yumi daun long God.

Yumi Mas Beten long Husat?

Baibel i stori long “man i laik i go klostu long God.” (Hibru 11:⁠6) God em i husat? Wanpela God tasol i gat olgeta strong, tasol i gat planti god nating ol man yet i kamapim, em ol god giaman tasol. (1 Korin 8:​5, 6) Dispela God i gat olgeta strong em Baibel i stori long em, nem bilong em “Jehova.” (Sam 83:​18, NW ) Em yet i bin wokim olgeta samting, olsem na yumi mas beten long em wanpela tasol. Krais Jisas i skulim lain bilong em long beten olsem: “Papa bilong mipela, yu stap long heven.” (Matyu 6:⁠9) Jisas i no tok yumi mas beten long em yet, o long mama bilong em Maria, o long narapela. Nogat. Tasol God i laik bai yumi save, Pikinini bilong em Jisas em i holim bikpela namba, na taim yumi beten long God, yumi mas beten long rot bilong Jisas. Olsem na Jisas i tok: I no gat wanpela man inap kamap long Papa long narapela rot. Nogat. Long mi tasol.”−Jon 14:⁠6.

Bilong God i ken harim beten bilong yumi, yumi mas beten long God Jehova, na yumi mas salim beten i go long rot bilong Pikinini bilong em Krais Jisas; olsem yumi mas beten long God long nem bilong Jisas.

Yumi Ken Beten long Wanem Ol Samting?

“Sapos yumi bihainim laik bilong God yet na yumi beten long wanpela samting, orait bai em i harim beten bilong yumi.” (1 Jon 5:14) Baibel i tok olsem. Tasol planti man i no laik save long laik bilong God na bai ol i ken bihainim. Olsem na God i no save harim beten bilong ol.−Provep 3:​5-7.

Jisas i bin lainim ol disaipel long wanpela beten, ol i kolim Beten Bilong Bikpela. (Matyu 6:​9-13) Yumi no ken kolim nating dispela beten. Yumi mas pilim na kolim. Em i makim ol bikpela samting yumi mas beten long en. Pastaim em i kolim nem bilong God na laik bilong God. Bihain em i kolim ol samting bilong skin, na long lusim rong o sin bilong yumi, na long helpim yumi long abrusim traim bilong Seten. Na taim yumi tok “Papa bilong mipela” dispela bai helpim yumi long tingim ol narapela tu, olsem famili na ol wanblut na ol narapela man i laik bihainim tok bilong God.−Aposel 17:​26, 27.

Yumi Mas Mekim Longpela Beten o Olsem Wanem?

Baibel i no makim hamas minit bilong beten. Sampela taim yumi ken mekim sotpela beten tasol, na sampela taim yumi ken beten long tingting na yumi no kolim long maus. (Niemaia 2:4; 1 Samyuel 1:​12, 13) Na sampela taim yumi ken mekim longpela beten. Wanpela nait Jisas “i beten long God. Long dispela nait olgeta em i beten i stap, na i go inap tulait” Ating em i laik bai God i helpim em long makim 12-pela aposel bilong em. (Luk 6:12) Olsem na sapos yumi laik beten long planti samting, ating yumi mas beten longtaim, na God i ken harim dispela kain beten tu.

God i Save Harim Beten

Baibel i stori planti taim long God Jehova i save harim beten. (Sam 65:⁠2) 1 King sapta 18 i stori long strong bilong beten. Wanpela taim ol disaipel bilong Jisas i beten, na wantu God i harim. “Ol i beten pinis, na dispela haus ol i bung long en i guria. Na Holi Spirit i pulap long ol, na ol i telimautim tok bilong God. Ol i tokaut strong. Ol i no pret.”−Aposel 4:​23-31.

Planti manmeri i salim pas long oganaisesen bilong Jehova na ol i stori long taim hevi i painim ol, tasol taim ol i beten, dispela hevi i pinis. Ol i tok, God i harim beten bilong ol.

Wanpela man bilong Swiselan i tok: “Wanpela taim mi bel hevi tru na mi laik bai mi dai tasol. Mi kirap na mi beten olsem: ‘O God, mi no save long yu, tasol mi save yu stap, na yu God bilong sori. Plis yu helpim mi! Mi no inap i stap moa. Helpim mi long painim tok i tru.’ ” Bihain liklik tupela Witnes Bilong Jehova i bungim dispela man long haus bilong em na ol i kirap lainim em long ol tok bilong Baibel, na bihain em i kisim baptais na i kamap wanpela Witnes Bilong Jehova.

Wanpela nes em i gat bikpela hevi. Man bilong em i save pamuk na tupela i laik katim marit bilong ol. Meri i bilip long God, na em i beten askim God long ol samting em i mas mekim. Long dispela de stret ol Witnes Bilong Jehova i raun long ol haus na autim tok long ol man na ol i go long haus bilong em. Em i singautim ol i kam insait na em i givim planti askim long ol. Ol i kamapim ol tok bilong Baibel na bekim gut ol askim bilong em na em i amamas. Bihain em yet i kamap meri bilong autim “gutnius” na em i lainim ol narapela manmeri long tok bilong Baibel.−Matyu 24:⁠14.

Wanpela Witnes Bilong Jehova i sindaun i stap long ka bilong em na em i kaunim Wastaua. Nau wanpela man i kam holim nek bilong em. Em i beten long God Jehova. Man i no taitim moa nek bilong em; em i lusim na sanap tasol i stap. Witnes i kirapim kwik ensin na i tok gutbai long em na i go pinis, na man i sanap i stap namel long rot, olsem wanpela pos, na em i no meknais liklik; em i sanap tasol.

Long nau ol man i no bilip tumas long God, tasol ol man i laikim tumas God na tok i tru ol i ken save, sapos ol i beten long God Jehova na ol i mekim long rot bilong Krais Jisas, na ol i gat stretpela tingting na bel, em nau, God i gat olgeta strong em bai harim beten bilong ol na helpim ol; bai em i mekim long pasin i stret long laik bilong em na long taim bilong em.

[Blok long pes 4]

Ol Kain Beten

Yumi ken skelim ol kain kain beten ol man i save mekim long nau, na dispela bai givim sampela tingting long yumi.

Long lotu Hindu, planti taim ol i save mekim wanpela beten i litimapim nem bilong wanpela god ol yet i makim−ol i gat olsem 330,000,000 god na ol i lotuim ol dispela god long 10,000 haus lotu. I gat olsem tupela kain beten bilong ol Hindu−ol i beten long tingting bilong ol na ol i mekim olsem inap longtaim (dhyana), o ol i mekim beten bilong litimapim nem bilong dispela god (stotra).Ol i ting em bikpela samting long ol i mas beten long maus bilong ol.

Long ol haus prista bilong ol lain Buda na Teo long Saina, o i save beten 3-pela taim long olgeta de (long moningtaim tru na long belo na long nait). Taim ol i beten ol i save paitim liklik belo. Taim ol pris samting bilong lotu Buda i beten, ol i save mekim wok long wanpela kain rop kiau, olsem korona, i gat 108 bis long en. Sampela man i save mekim wok long dispela rop kiau bilong kaunim hamas taim ol i mekim beten.

Wanpela bikpela samting long lotu bilong ol Muslim em wanpela beten (salat) ol i mas mekim long olgeta de. Ol i mas mekim inap 5-pela taim long olgeta de na taim ol i beten ol i mas lukluk i go long hap bilong Meka long Saudi Arebia.

Sampela beten bilong ol Juda em ol i kisim stret long Baibel, olsem ol beten i stap long Sam. Na ol i save mekim sampela beten em sampela prista bilong ol i bin kamapim.

Na ol lain ol i save kolim ‘Kristen’ ol i gat kain kain beten, na ol i gat kain kain pasin bilong beten. Sampela beten em ol i save raitim long buk samting na ol i holim rop kiau olsem korona na ol i kolim wanpela beten planti taim; na ol i save mekim ol sotpela beten em ol yet i tingim na kolim.

[Piksa long pes 7]

God i harim beten bilong Jisas. Em i ken harim beten bilong yu tu