Sapos Yumi No Go Bek Long Ol, Olsem Wanem Bai Ol i Harim?
1 “Sapos i no gat wanpela i autim tok long ol, olsem wanem bai ol i harim?” (Ro 10:14) Tru tumas, sapos yumi no mekim gut ol gobek, olsem wanem bai ol inap kisim gut ol as bilong tok i tru. Olgeta man i bin putim yau long harim tok bilong Kingdom, i gutpela sapos yumi go bek lukim ol. Long dispela mun, gutpela sapos yumi go bek lukim man yumi bin toktok wantaim em, na kamapim sampela tok moa bilong Baibel long buklet em i bin kisim, na kirapim wanpela Baibel-stadi.
2 Sapos yu bin tilim buklet “Wanpela Gavman Em Bai Kamapim Paradais,” ating yu ken kirapim tok i bilong helpim yu long kirapim Baibel-stadi. Soim man bilong haus ol piksa i stap long pes 30 na 31, na kamapim askim olsem:
◼ “Olsem wanem? Yu laik bai gutpela taim tru i kamap na yu wantaim famili bilong yu i no inap pret moa long wanpela samting? [Larim man i bekim tok. Nau opim buklet long pes 3.] Yumi olgeta i gat dispela laik, tasol planti man i ting ol dispela samting i no inap kamap. Tasol God i tok promis long kamapim dispela samting, na em inap tru long mekim i kamap.” Kaunim Matyu 6:9, 10 olsem i stap long pes 3, o lukim long Baibel bilong yu na kaunim. Stori moa olsem, i gat sampela man long olgeta hap em nau ol i stap amamas na bel isi, long wanem, ol i bilip na wet long kisim gutpela samting long bihain. Toktok long sampela tok bilong Baibel i stap long pes 3, na helpim man long save, sapos em i mekim stadi long dispela buklet, dispela inap helpim em long kisim sampela save moa. Sapos man i orait long dispela, stretim rot bilong i go bek kwiktaim na bai yu ken stori moa long dispela samting.
3 Taim yu go bek long man i kisim buklet “Tru God i Save Tingim Yumi?,” ating dispela tok bai i gutpela:
◼ “Taim mi bin kam lukim yu, yumi bin toktok long dispela askim, Tru God i save tingim yumi? Sapos tru God i tingim yumi, yu ting em bai pinisim pen na hevi na kros pait? [Bihain long man i bekim tok, opim buklet long pes 22, paragraf 17-19, na stori moa.] God i tok promis long pinisim ol pasin nogut bilong nau na kamapim nupela taim i gat ol gutpela man i stap long en na ol inap i stap bel isi. [Kaunim Song 37:11.] Yumi tu inap i stap long dispela nupela taim sapos yumi bilip long ol tok bilong Baibel na bihainim.” Stori long pasin bilong yumi long helpim ol man long stadi long Baibel.
4 Taim yu go bek lukim man i bin kisim buklet “Harim! Mi Mekim Olgeta Samting i Kamap Nupela!,” yu ken soim em piksa i stap long skin bilong buklet, na nau yu ken kamapim askim olsem:
◼ “Sapos yumi inap i stap long gutpela taim tru, yu ting bai yumi stap olsem wanem? [Larim man bilong haus i bekim tok.] Ol samting yu lukim long piksa hia i no olsem tingting nating bilong wanpela man, nogat. As bilong dispela piksa em ol tok promis bilong God i stap long Baibel. [Kaunim Kamapim Tok Hait 21:4 na Song 37:11, 29.] Mi laik stori liklik long olsem wanem yu wantaim famili bilong yu inap kisim dispela gutpela samting.” Sapos man bilong haus i kamapim bel bilong em olsem em i laik harim tok, orait stori moa, na tokim em, yu laik stadi wantaim em long Baibel.
5 Taim yumi painim pinis ol man i gat gutpela bel em ol i wok long painim tok i tru, na yumi go bek bilong helpim ol long bihainim ol tok ol i bin harim, yumi kamapim klia olsem yumi laikim tru ol. Yumi mekim wok long ol tok holi God i bin givim long yumi na bai yumi ken helpim yumi yet wantaim ol man i harim tok bilong yumi long kisim laip i stap gut oltaim.—1 Ti 4:16.