Klinpela Haus—Wok Yumi Olgeta i Mas Mekim
Wanpela man long Meksiko i raitim dispela stori bilong Kirap!
EM I gutpela samting tru long sindaun long wanpela klinpela gutpela ples, a? Tasol long ol taun i gat planti pipia tru, olsem na i hatwok moa long klinim na stretim gut ples yumi sindaun long en.
Ol kaunsil bilong ples i save klinim ol strit long rot bilong bungim ol pipia, tasol maski i olsem, long sampela hap ol pipia i save pulap na i luk nogut na inap bagarapim helt bilong ol man. Sapos planti pipia i bung i stap, dispela inap mekim na i gat planti rat, kokoros, na ol narapela binatang nogut em ol inap kamapim ol sik. Olsem wanem? I gat wanpela samting yu ken mekim bilong daunim dispela hevi? Yes, wok strong long mekim haus na gaden bilong yu i stap klin.
Stretpela Tingting
Sampela man i ting ol ples na haus i doti, long wanem, ol man i stap rabis. Tasol dispela tingting i no stret. Tru, sapos ol man i no gat planti mani, dispela inap mekim na i hatwok moa long klinim gut haus na gaden samting. Tasol olsem wanpela savetok bilong ol Spen i tok: “Pasin bilong i stap rabis na pasin bilong i stap klin i no pait wantaim.” Sapos man i gat planti samting, dispela i no makim olsem haus na gaden bilong em bai stap klin.
Bilong haus na gaden i stap klin, man i mas i gat stretpela tingting na larim dispela tingting i kirapim em long mekim wok. Tru tumas, stretpela tingting bilong famili olgeta bai mekim na haus i ken stap klin. Olsem na i gutpela long skelim ol samting yumi olgeta i ken mekim bambai haus na ples yumi sindaun long en i ken stap klin.
Program Bilong Klinim Ol Samting
I luk olsem wok bilong wanpela mama bilong haus i no inap pinis. Em i mas kukim kaikai na redim ol pikinini bilong i go long skul, na tu, em i mas mekim bikpela wok bambai haus na ples em famili i sindaun long en i ken stap klin. Ating yu lukim pinis olsem planti taim mama i save kisim ol klos i doti o ol samting ol pikinini i tromoi nabaut long rum, a? Wanpela gutpela program bilong klinim ol samting we famili olgeta i insait long en inap helpim mama na em i no gat bikpela hatwok tumas.
Sampela meri i makim olsem i gat sampela samting ol i mas mekim na klinim long olgeta de, na sampela hap bilong haus ol i ken klinim wanpela taim long wik, na sampela samting inap wanpela taim long mun. Na i gat sampela samting ol i ken klinim wanpela taim long yia. Olsem: Long ol Haus Betel, em ol brens ofis bilong ol Witnes Bilong Jehova, ol i save klinim gut olgeta samting wanpela taim long yia. Dispela i gutpela taim bilong tromoi ol samting i no gat moa wok long en na long klinim gut ol kabot samting. Na tu, i gat wanpela program long klinim ol banis bilong ol rum.
I gat sampela hap bilong haus we i bikpela samting long ol dispela hap i stap klin bambai famili i ken stap gut long helt, olsem ples waswas. Ol i mas klinim dispela ples long olgeta de, tasol i gutpela sapos ol i klinim gut wanpela taim long wik bambai ol binatang jem i no ken kamap planti. Sampela i ting ol i no inap mekim wanpela samting long ol mak i kamap insait long toilet na ol i no inap long rausim. Tasol bai yu lukim sampela haus we toilet i klin olgeta na i lait. Bilong toilet i ken stap klin, yu mas klinim long olgeta taim na yusim ol marasin i stret long en.
Na tu, em i bikpela samting long klinim gut haus kuk. Tru, yu wasim ol plet samting na klinim stov na ples bilong kukim kaikai long olgeta de, tasol sampela taim—olsem wanpela taim long mun—yu mas klinim gut moa ol samting, olsem aninit o baksait long ol masin na aninit long sink. Sapos yu klinim ples bilong putim kaikai na ol kabot planti taim, dispela bai mekim na ol kokoros na ol narapela binatang i no ken stap long dispela ples.
Famili i Mas Wok Gut Wantaim
Sampela papamama i putim ol lo long ol pikinini na ol i skulim gut ol. Paslain long ol pikinini i go long skul long moningtaim ol i mas stretim bet bilong ol, putim ol klos i doti long ples bilong en, na stretim ol samting bilong ol. Wanpela gutpela lo em olgeta i mas bihainim em olsem: “I gat ples bilong olgeta samting, na olgeta samting i mas i stap stret long ples bilong en.”
Na tu, sampela insait long famili i ken kisim wok bilong klinim wanpela hap bilong haus. Olsem: Wanpela taim long yia papa i ken klinim na stretim gut ples bilong putim ka. Olsem wanem? Wanpela pikinini i ken helpim em long mekim dispela wok? Husat inap rausim ol gras nogut long gaden long arere bilong haus o katim gras? Yupela i mas mekim dispela wok inap hamas taim bambai arere bilong haus i luk gutpela? I gat wanpela rum aninit long rup bilong haus o wanpela rum bilong putim ol samting na yupela i mas skelim olsem i gat sampela samting long en i no gat moa wok long en na yupela i ken rausim na bai ples i stap klin? Sapos olsem, husat bai mekim? Sampela papamama i givim dispela wok long ol pikinini, na olgeta wan wan i mas mekim.
Olsem na wokim wanpela gutpela program bilong lukautim haus bilong yu. Yu yet i wok long klinim ol samting, o famili bilong yu i helpim yu o yu baim wanpela man long helpim yu, em i bikpela samting long wokim wanpela gutpela program. Wanpela mama, em i save wok strong na bai haus i stap klin em i stori long olsem wanem famili i save wok gut wantaim bilong klinim haus. Em i tok: “Mipela i skelim wok bilong haus long 3-pela pikinini meri na mi. Norma Adriana i klinim rum bilong sindaun, tupela rum slip, arere bilong haus, na rot klostu long haus. Ana Joaquina i klinim haus kuk. Mi wasim ol klos na lukautim sampela narapela samting, na María del Carmen i wasim ol plet samting.”
Arere Bilong Haus i Mas i Stap Klin
Olsem wanem long arere bilong haus? Yu sindaun long wanpela bikpela naispela haus o long wanpela liklik haus nating, yu mas wokim wanpela program bilong klinim na stretim arere bilong haus. Olsem: Ating hinsis bilong dua long banis bilong haus i bagarap liklik. Dua bilong haus bai luk nogut sapos yu no stretim na bihain em bai bagarap olgeta. Na i wankain long pipia sapos yu larim pipia i hip i stap long arere bilong haus. Na tu, sampela taim yumi larim ol tin, ol tul, na ol narapela samting i hip i stap long arere bilong haus, na ol dispela samting i kamap ples hait bilong ol binatang nogut.
Sapos i gat wok long mekim, sampela famili i stretim rot bilong brumim na klinim arere bilong haus, na rot klostu long haus long olgeta de o wanpela taim long wik. Tru, long sampela kantri gavman i gat program bilong klinim gut ol hap ol man i sindaun long en, tasol long sampela ples gavman i no gat kain program olsem. Yumi save, ol hap yumi sindaun long en bai luk gutpela moa na bai i no inap bagarapim helt bilong ol man sapos yumi olgeta i wok strong long klinim ol samting.
Sampela famili i gat program long mekim ol dispela wok yumi stori pinis long en, na tu, ol i raitim ol dispela wok long wanpela pepa na putim pepa long wanpela hap we famili i ken lukim na bihainim. Dispela inap kamapim ol gutpela samting. Tru, mipela i no stori long olgeta samting yu mas save long en bilong klinim ol samting. Olsem: Yu mas skelim wanem ol marasin samting bilong klinim haus i stret long hap bilong yu na yu gat mani inap bilong baim wanem ol tul samting.
Tasol ating ol dispela tok bai helpim famili olgeta long save olsem em i bikpela samting long lukautim gut haus na arere bilong haus bilong yu. Tingim: Bilong haus na arere bilong en i ken stap klin, yu no mas tromoi bikpela mani, tasol yu mas i gat stretpela tingting.
[Blok long pes 28, 29]
Gutpela Program Bilong Klinim Haus
Yusim hap spes i stap yet long lista bilong raitim ol wok yu yet i laik mekim
Bikpela toksave: Pasin bilong miksim ol marasin bilong klinim haus inap kamapim bikpela bagarap, no ken tru miksim snowait wantaim marasin amonia
✔ Olgeta De
❏ Rum slip: Stretim bet na putim gut ol samting
❏ Haus kuk: Wasim ol plet samting na sink. Klinim na stretim hap bilong kukim kaikai na tebol. Sapos plua i doti, brumim o mopim
❏ Ples waswas: Wasim sink na toilet. Stretim ol samting
❏ Rum bilong sindaun na ol narapela rum: Stretim ol samting. Klinim ol kabot, sia, tebol samting. Sapos plua i doti, brumim o mopim
❏ Haus olgeta: Rausim olgeta pipia
✔ Olgeta Wik
❏ Rum slip: Senisim ol betsit. Sapos plua i doti, brumim o mopim. Rausim das long kabot na tebol samting
❏ Haus kuk: Klinim stov, ol masin bilong haus kuk, na paip samting bilong sink. Mopim plua
❏ Ples waswas: Wasim ol banis bilong ples waswas na ol paip samting. Klinim toilet, kabot, na ol narapela samting long snowait. Senisim ol taul. Brumim o mopim plua
✔ Olgeta Mun
❏ Ples waswas: Wasim gut olgeta banis
❏ Haus olgeta: Klinim arere bilong ol dua. Klinim gut ol sia samting
❏ Gaden, arere long haus, ples bilong putim ka: Brumim ol samting sapos i gat wok long mekim. No ken bungim bungim ol samting i no gat wok long en
✔ Olgeta 6-pela Mun
❏ Rum slip: Klinim ol karamap bilong bet
❏ Haus kuk: Rausim ol samting long bokis ais na klinim gut
❏ Ples waswas: Rausim ol samting long ol kabot na klinim gut. Tromoi olgeta samting i no gat moa wok long en o ol marasin samting i olpela pinis
❏ Haus olgeta: Klinim ol lam, fen, na swits bilong lait. Klinim ol dua. Wasim ol flai waia, windo, arere bilong windo
✔ Olgeta Yia
❏ Rum slip: Rausim ol samting long ol kabot na klinim gut. Tromoi olgeta samting i no gat moa wok long en. Wasim ol blanket. Klinim gut ol matres. Klinim ol pilo
❏ Haus kuk: Rausim ol samting long kabot na klinim gut. Tromoi ol samting i no gat moa wok long en. Surikim TV, bokis ais samting na yu ken klinim gut tebol na plua we ol i sanap long en
❏ Haus olgeta: Wasim olgeta banis. Klinim ol sia na ol keten
❏ Ples bilong putim ka o ples bilong putim ol samting: Brumim gut. Stretim gut ol samting na tromoi ol samting i no gat moa wok long en
[Ol Piksa long pes 30]
“I gat ples bilong olgeta samting, na olgeta samting i mas i stap stret long ples bilong en”
[Ol Piksa long pes 30]
Bilong kabot i ken stap klin, i gutpela yu rausim ol samting i no gat moa wok bilong en