Mi Wok Strong Long Winim Mak Bilong Mi
STORI BILONG MARTHA CHÁVEZ SERNA
Wanpela de taim mi gat 16 krismas mi hap i dai taim mi wok long haus. Taim mi kisim bek tingting, mi slip long bet. Tingting bilong mi i paul, na het bilong mi i pen nogut tru, na inap sampela minit mi no inap lukim na harim ol samting. Mi pret. Wanem samting i painim mi?
PAPAMAMA bilong mi i wari nogut tru na ol i kisim mi i go long dokta, na em i givim sampela vaitamin long mi. Em i tok mi kisim dispela hevi, long wanem, mi no save slip hariap long nait. Tupela mun bihain, mi kisim gen dispela sik, na bihain, mi kisim namba tri taim. Mipela i go long narapela dokta, na em i ting mi kisim dispela sik, long wanem, tingting bilong mi i no stap isi, na em i givim wanpela marasin bilong helpim mi long i stap bel isi.
Tasol bihain mi kisim dispela sik planti taim. Tingting bilong mi i hap i dai na mi pundaun na bagarapim skin bilong mi. Sampela taim mi kaikaim tang na insait bilong maus bilong mi. Taim mi kisim bek tingting, het bilong mi i pen nogut tru na mi pilim olsem mi laik traut. Bodi bilong mi olgeta i pen, na planti taim mi no inap tingim wanem samting i bin kamap paslain long mi hap i dai. Bilong kamap orait gen, planti taim mi mas slip long bet inap wanpela o tupela de na malolo. Maski i olsem, mi ting dispela hevi bai stap inap sotpela taim tasol—i no longtaim na bai mi orait gen.
Mekim Sampela Samting Long Ol Mak Mi Laik Winim
Taim mi yangpela tru, famili bilong mi i kirap stadi long Baibel wantaim ol Witnes Bilong Jehova. Ol tisa bilong mipela em tupela painia salim, olsem ol manmeri i autim tok planti aua long olgeta mun bilong skulim ol man long tok i tru bilong Baibel. Mi lukim olsem wok bilong autim tok i givim bikpela amamas long ol dispela painia. Mi autim tok long tisa na ol wanskul bilong mi long ol tok promis bilong Baibel, na mi kisim dispela amamas tu.
I no longtaim na planti long famili bilong mi i kamap Witnes Bilong Jehova. Man! Mi amamas tru long autim gutnius! Taim mi gat 7-pela krismas, mi putim mak olsem mi laik kamap wanpela painia salim. Taim mi gat 16 krismas mi mekim wanpela bikpela samting bilong winim dispela mak, mi kisim baptais. Long dispela taim sik bilong mi i kirap.
Wok Painia
Maski mi gat dispela sik, mi pilim yet olsem mi inap autim tok fultaim olsem wanpela Witnes Bilong Jehova. Tasol mi kisim dispela sik tupela taim long wanpela wik, olsem na sampela long kongrigesen i ting em i no gutpela long mi kisim dispela bikpela wok. Mi bel hevi long dispela. Tasol bihain tupela marit em ol i wok long brens ofis bilong ol Witnes Bilong Jehova long Meksiko ol i kam long kongrigesen bilong mipela. Ol i kisim save long laik bilong mi long mekim wok painia na ol i strongim mi tru. Ol i helpim mi long save olsem sik bilong mi i no ken stopim mi long mekim wok painia.
Olsem na long Septemba 1, 1988, mi kamap painia oltaim long taun bilong mi em San Andrés Chiautla, long Meksiko. Orait nau mi autim tok bilong gutnius inap planti aua long olgeta mun. Taim mi no inap autim tok long ol haus, long wanem, sik i kisim mi, mi raitim ol pas i gat sampela tok bilong Baibel long ol man long hap bilong mi na long dispela rot mi strongim ol long stadi long Baibel.
Mi Kisim Save Long Sik Bilong Mi
Long dispela taim papamama bilong mi i tromoi bikpela mani bilong kisim mi i go long wanpela dokta bilong ol nev. Dispela dokta i tokaut olsem mi gat sik epilepsi. Orait nau dokta i givim sampela marasin long mi na mi inap daunim dispela sik inap 4-pela yia. Insait long dispela taim mi go long Skul Bilong Wok Painia, na skul i strongim mi long mekim wok autim tok long wanpela hap we i no gat planti manmeri bilong autim tok.
Papamama bilong mi i save long strongpela laik bilong mi long mekim bikpela wok moa. Sik bilong mi i orait liklik, olsem na ol i larim mi i go long Zitácuaro, long Michoacán State, em i longwe long famili bilong mi inap olsem 200 kilomita. Pasin bilong bung wantaim ol narapela painia long dispela hap i helpim mi tru long amamas moa yet long wok fultaim.
Mi stap 2-pela yia long Zitácuaro na sik bilong mi i kam bek gen. Mi go bek long papamama bilong mi, na mi bel hevi tru na mi mas go long dokta bilong kisim helpim. Mi go long wanpela dokta bilong ol nev na em i tok ol marasin mi kisim i wok long bagarapim lewa bilong mi. Orait nau mi wok long painim sampela narapela rot bilong daunim sik, long wanem, mipela i no gat mani bilong baim ol nambawan dokta. Sik bilong mi i go nogut moa, na mi mas lusim wok painia. Olgeta taim mi kisim dispela sik mi wok long bagarap moa. Tasol taim mi ritim ol tok bilong Song na mi go long Jehova long rot bilong beten, mi pilim olsem em i mekim gut bel bilong mi na i strongim mi.—Song 94:17-19.
Mi Winim Mak
Taim mi stap nogut tru, mi bin kisim dispela sik inap tupela taim long wanpela de. Tasol bihain, sik i go daun liklik. Wanpela dokta i givim narapela marasin long mi bilong daunim epilepsi, na sik i no kisim mi planti taim olsem bipo. Olsem na long Septemba 1, 1995, mi kirap gen long mekim wok painia. Nau sik bilong mi i orait, olsem na taim mi no kisim dispela sik inap tupela yia, mi putim gen aplikesen bilong mekim wok painia salim. Dispela i makim olsem mi bai autim tok planti aua moa na go mekim dispela wok long wanem wanem hap ol i sot long ol painia. Man! Tingim amamas bilong mi taim mi kisim wok olsem painia salim! Nau mi winim mak mi bin putim taim mi pikinini yet.
Long Epril 1, 2001, mi go long nupela ples wok bilong mi long ples maunten bilong Hidalgo State. Nau mi mekim wok long wanpela liklik taun long Guanajuato State. Mi mas lukautim gut skin bilong mi na kisim gut marasin na malolo gut. Mi was gut long kaikai mi kisim, na moa yet mi wok long abrusim gris, kopi, na ol kaikai i stap long tin. Na tu, mi traim long abrusim ol samting i mekim mi i kros o tingting planti. Tasol dispela pasin i helpim mi gut. Insait long ol dispela yia bilong mekim wok painia salim, mi kisim sik wanpela taim tasol.
Mi singel na mi no gat wok long lukautim wanpela famili, olsem na mi amamas long mekim yet wok painia salim. Mi save olsem ‘God em i no man nogut, na bai em i lusim tingting long ol gutpela wok yumi bin mekim,’ na dispela tingting i mekim gut bel bilong mi. Em i mekim gutpela pasin tru, long wanem, em i no strong long yumi mas givim em ol samting em yumi no inap givim long em! Dispela tok tru i helpim mi long kisim stretpela tingting, na sapos sik bilong mi i mekim na mi mas lusim gen wok painia, mi save olsem Jehova i amamas long pasin bilong mi long givim bel olgeta long mekim wok bilong em.—Hibru 6:10; Kolosi 3:23.
Mi save olsem, pasin bilong autim bilip bilong mi long ol narapela long olgeta de, dispela i strongim mi. Na tu, dispela wok i helpim mi long tingting strong long ol gutpela samting God i tok promis long kamapim long bihain. Baibel i tok promis olsem long nupela taim, bai i no gat sik moa, “na ol [man] bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol [bai] i pinis olgeta.”—KTH 21:3, 4; Aisaia 33:24; 2 Pita 3:13.
[Ol Piksa long pes 12]
Taim mi gat 7-pela krismas samting (antap); taim mi gat 16 krismas samting, liklik taim bihain long mi kisim baptais
[Piksa long pes 13]
Autim tok wantaim wanpela pren