Amamas Long Wetim Gutpela Samting
JOE i gat sik kensa em marasin i no inap oraitim. Meri bilong em, Kirsten, na sampela pren i sindaun klostu long bet bilong Joe na ol i toktok. Kirsten i lukluk long man bilong em na i lukim aiwara bilong Joe i kam daun. Pastaim em i ting Joe i pilim pen. Ating em i pilim pen, tasol em i tokim meri bilong em olsem long dispela taim pen i no as na em i krai.
Kirsten i tok: “Long dispela taim bilong hevi, Joe i stap namel long ol gutpela pren i bin kam bilong stap wantaim em. Na tu, pasin bilong em long bilip na wet long gutpela samting bai kamap i strong moa, na em i save i no gat wanpela man inap tekewe dispela gutpela samting long em. Em i tok aiwara bilong em, em aiwara bilong amamas. Bihain, long dispela nait yet, Joe i dai.”
Joe i bilip na wet long wanem samting na dispela i strongim em taim sik bilong em i wok long i go bikpela? Em i bilip long tok promis bilong God Jehova long ol man i ken kisim laip oltaim long Paradais long graun na ol i no sik. (Song 37:10, 11, 29) Kamapim Tok Hait 21:3, 4 i tok: “Haus bilong God i stap wantaim ol manmeri. . . . Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo [wantaim ol hevi bilong nau] ol i pinis olgeta.”
Ol Daiman Bai Kirap Bek
Truim bilong samting Joe i wet long en i makim olsem em bai kirap bek long matmat. Tru tumas, tok promis bilong Jisas i mekim gut bel bilong em, olsem “olgeta manmeri i stap long matmat”—ol daiman i stap long tingting bilong God—ol bai kirap bek. (Jon 5:28, 29) Olsem wanem? Yu bel hevi i stap, long wanem, wanpela bilong famili o wanpela pren i dai pinis? Sapos olsem, tok bilong kirap bek i ken strongim bel bilong yu tu. Tru, dispela gutpela tok i no rausim bikpela bel hevi yumi pilim taim wanpela yumi laikim em i dai. Jisas tu “i krai” taim pren bilong em Lasarus i dai. Tasol gutpela samting yumi wet long en inap helpim yumi long karim bel hevi bilong yumi.—Jon 11:14, 34, 35; 1 Tesalonaika 4:13.
Kirsten i tok: “Taim Joe i dai long sik kensa, mi pilim olsem mi no inap stap amamas moa. Long nau tu, sampela yia bihain long indai bilong Joe, mi save olsem laip bilong mi long dispela taim i no inap stap wankain olsem bipo. Indai bilong Joe i mekim na laip bilong mi i sot long wanpela bikpela samting. Tasol mi ken tokaut tru olsem mi stap bel isi na belgut.”
Tok bilong Kirsten i helpim yumi long tingim olsem nau long dispela taim yumi no ken ting yumi inap i stap amamas long olgeta taim. Sampela taim yumi gat hevi, na sampela taim yumi stap amamas. Na i gat taim we yumi mas bel sori, em long taim i no stret long amamas. (Saveman 3:1, 4; 7:2-4) Na tu, sampela bilong yumi i gat sik bilong bel hevi, em kain kain samting i as bilong en. Tasol ol tok promis bilong Baibel inap mekim gut bel bilong yumi, na ol gutpela tok bilong Baibel inap helpim yumi long abrusim ol samting nogut inap bagarapim amamas bilong yumi. God i tok: “Ol manmeri i putim yau gut long tok bilong mi, bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.”—Sindaun 1:33.
Yes, Jehova i laik bai yumi stap gut. Em i laik bai yumi stap amamas—amamas tru insait long bel, na i no bilong sotpela taim tasol, nogat, em i laik bai yumi stap amamas inap oltaim oltaim! Olsem na Pikinini bilong em i mekim dispela tok i tru: “Ol man i hangre long kisim save long God, ol i ken amamas.” (Matyu 5:3, NW ) Em i savepasin long bihainim gut dispela tok.
[Blok/Piksa long pes 9]
Nainpela Samting Bilong Mekim Yu Stap Amamas
1. Tingim moa yet ol wok bilong God.—Matyu 5:3, NW.
2. Amamas long ol samting yu holim pinis na no ken “laikim tumas mani.”—1 Timoti 6:6-10.
3. Ol amamas i mas i stap nambatu.—2 Timoti 3:1, 4.
4. Givim ol samting long ol narapela na mekim ol samting bilong amamasim ol.—Aposel 20:35.
5. Tok tenkyu na tingim ol gutpela samting yu holim pinis.—Kolosi 3:15.
6. Lusim rong bilong ol narapela.—Matyu 6:14.
7. Poromanim ol gutpela man.—Sindaun 13:20.
8. Lukautim gut skin bilong yu na abrusim ol pasin nogut.—2 Korin 7:1.
9. Amamas long wetim gutpela samting em Baibel i tok long en.—Rom 12:12.
[Ol Piksa long pes 8, 9]
Tok promis bilong Baibel long laip long nupela taim i mekim gut bel bilong yumi