Redim Pikinini Meri Bilong Yu Long Sik Mun

Taim ol yangpela i gat 13 krismas samting, em taim bilong planti senis i kamap long skin bilong ol. Long dispela taim, bikpela samting long ol yangpela meri em sik mun ol i kisim long namba wan taim.

TAIM ol yangpela meri i kisim sik mun long namba wan taim, ol i save wari na kisim kain kain tingting. Olsem ol narapela senis i save kamap long skin bilong ol yangpela, namba wan sik mun inap mekim na yangpela meri i tingting planti. Planti yangpela meri i pret na wari, long wanem, ol i no gat stretpela save long sik mun, o ol i no save liklik long dispela samting.

Ol yangpela meri husat i save pinis long ol samting bilong sik mun, ol i no save tingting planti tumas taim ol i kisim sik mun long namba wan taim. Tasol ol ripot i soim olsem planti yangpela meri i no redi. Wanpela lain i skelim dispela samting long 23 kantri, na inap 33 pesen bilong ol meri i tok, ol i no bin kisim save long sik mun paslain long ol i kisim dispela samting long namba wan taim. Ol i no redi, olsem na taim ol dispela yangpela meri i kisim sik mun, ol i no save ol i mas mekim wanem.

Ol meri husat i no bin kisim save liklik long sik mun, ol i tok ol i bin kisim taim stret taim sik mun i painim ol long namba wan taim. Long wanpela ripot ol meri i stori long namba wan sik mun bilong ol, na ol i tok ol i “pret,” “sem,” na “bel bilong ol i bagarap.”

Planti man i save pret taim ol i lukim blut, long wanem, ol i ting dispela i makim olsem man i gat pen o bagarap long skin. Olsem na yumi ken save olsem taim narapela i no bin givim save o redim yangpela meri long sik mun, ol tingting bilong ples, o stori nating, o meri i no gat save liklik long sik mun, ol dispela samting inap mekim na em i ting sik mun i makim olsem em i gat sik o bagarap long skin, o sik mun em i samting bilong sem long en.

Pikinini meri bilong yu i mas save olsem sik mun em i samting i save painim olgeta yangpela meri. Yu papa o mama inap helpim em na em i no ken tingting planti o pret. Olsem wanem yu ken helpim em?

Papamama i Gat Bikpela Wok

I gat planti rot bilong kisim save long sik mun, olsem ol tisa long skul, ol nes na dokta, ol buk na nius, na ol vidio. Planti papamama i ting olsem long ol dispela rot pikinini meri inap kisim save long ol samting bilong bodi i save kamapim sik mun na long rot bilong stap klin long taim bilong sik mun. Tasol planti yangpela meri i gat ol askim em ol i no inap kisim bekim bilong en long ol dispela rot. Maski ol i save long samting ol i mas mekim taim ol i kisim sik mun, planti yangpela meri i no save long ol bai mekim wanem taim ol i kisim kain kain tingting na filings long taim bilong sik mun.

Ol bubu meri, ol bikpela susa, na moa yet ol mama i ken givim sampela save moa long ol yangpela meri na strongim bel bilong ol. Planti yangpela meri i ting mama bilong ol i nambawan gutpela rot bilong kisim save long sik mun.

Olsem wanem long ol papa? Planti yangpela meri i sem long toktok wantaim ol long sik mun. Sampela i laik bai papa bilong ol i sapotim na pilim hevi bilong ol, na em tasol. Na sampela i no laik bai papa i mekim wanpela samting bilong helpim ol long taim bilong sik mun.

Long planti kantri namba bilong ol famili i gat papa tasol i bin go bikpela insait long ol yia i go pinis. Olsem na planti papa moa i mas lain long skulim pikinini meri bilong ol long sik mun. Ol dispela papa i mas kisim save long ol bikpela samting bilong sik mun na long ol narapela senis i save kamap long skin na tingting bilong pikinini meri bilong ol. Ating ol papa i laik toktok wantaim mama bilong ol bilong kisim save na helpim long dispela samting.

Taim Bilong Stori Long En

Long ol kantri i gat planti wok mani samting, olsem Amerika, Saut Korea, na sampela hap bilong Westen Yurop, planti yangpela meri i save kisim namba wan sik mun bilong ol taim ol i gat 12 o 13 krismas, tasol sampela inap kisim taim ol i gat 8-pela krismas tasol na sampela i kisim taim ol i gat 16 o 17 krismas. Long sampela hap bilong Afrika na Esia, planti meri i save kisim namba wan sik mun bilong ol taim ol i bikpela liklik. Olsem: Long Naijiria, planti meri i save kisim sik mun taim ol i gat 15 krismas. Ol jin bilong bodi, sindaun bilong famili, kaikai em i kisim, em i save stap tasol o wok na eksasais samting, na ples em i sindaun long en, em long maunten o ples daun, ol dispela samting i save stiaim taim bilong ol yangpela meri long kisim namba wan sik mun bilong ol.

Em i gutpela moa long kirap toktok long sik mun paslain long pikinini meri bilong yu i kisim sik mun long namba wan taim. Olsem na yu mas kirap stori long ol senis bilong skin na sik mun taim pikinini meri i yangpela yet, ating taim em i gat 8-pela krismas samting. Yu inap ting dispela em i hariap tumas, tasol sapos pikinini meri bilong yu i gat 8-pela i go inap 10-pela krismas, ating ol homon long bodi bilong em i kirap pinis long mekim sampela senis insait long bodi bilong em. Bai yu luksave long sampela senis i kamap long skin bilong em, olsem susu i wok long kamap na sampela gras moa i kamap long skin bilong em. Planti yangpela meri i go longpela hariap na putim skin paslain long ol i kisim sik mun long namba wan taim.

Rot Bilong Stori Long En

Ol yangpela meri em klostu ol bai kisim namba wan sik mun bilong ol, ol i laik save long wanem samting bai kamap. Ating ol i bin harim ol narapela meri i toktok long dispela samting long skul. Ol i gat ol askim, tasol ol i no save hau bai ol i kamapim askim bilong ol. Na ating ol i sem long toktok long dispela samting.

Ating ol papamama tu i save pilim olsem. Maski ol mama i nambawan lain bilong stori long pikinini meri long sik mun, planti mama i pilim olsem ol i no redi o ol i hatwok long toktok long dispela samting. Ating yu mama i pilim olsem tu. Orait olsem wanem yu ken kirap toktok long sik mun wantaim pikinini meri bilong yu?

Ol yangpela meri husat i wok long i go klostu long taim ol i kisim namba wan sik mun bilong ol, ating ol i laik bai yu tok stret long dispela samting na kolim ol tok i no hatwok long kisim. Yu ken stori long em long hamas taim sik mun i save kamap, em bai stap inap hamas de, na hamas blut i save lus. Olsem na taim yu kirap skulim pikinini long ol samting bilong sik mun, ating em i gutpela long stori long ol samting em i mas mekim taim sik mun i kamap. Na tu, ating yu mas bekim ol kain askim olsem: Bai mi pilim olsem wanem taim mi kisim sik mun? o Wanem ol samting inap kamap?

Ating bihain, yu ken stori long ol samting bilong bodi i save kamapim sik mun. Planti taim yu ken kisim sampela buk samting i stori long dispela long laibreri, long bukstua, o long ol nes na dokta. Ol kain buk olsem inap helpim yu long stori long ol liklik liklik samting bilong sik mun. Ating sampela yangpela meri i laik bai ol yet i ken ritim ol dispela buk. Na ating sampela i laik bai yu mama i ritim buk wantaim ol.

Makim wanpela hap i no gat pairap long en taim yu kirap toktok. Pastaim stori long ol senis i kamap long skin na long pikinini meri i wok long kamap bikpela meri. Yu inap tok: “Klostu nau bai yu kisim samting em olgeta yangpela meri i save kisim. Yu save em wanem samting?” O mama inap kirap stori long samting i bin painim em yet na i tok: “Taim mi gat wankain krismas olsem yu, mi kirap tingting long mi bai pilim olsem wanem taim mi kisim sik mun. Mi na ol pren long skul i toktok wantaim long dispela samting. Olsem wanem? Ol pren bilong yu i kirap toktok pinis long dispela samting?” Painimaut ol samting em i save pinis long sik mun na stretim ol tingting kranki em i gat long dispela samting. Yu mas save olsem namba wan taim yu toktok long dispela samting, ating yu wanpela tasol bai toktok.

Yu wanpela meri na ating yu yet i bin tingting planti long namba wan sik mun bilong yu, olsem na yu ken stori long ol samting i bin painim yu yet. Yu no bin save long wanem samting bilong sik mun? Yu bin i gat laik long save long wanem samting? Wanem tok i bin helpim yu? Traim long stori gut long ol gutpela samting na samting nogut bilong sik mun. Amamas long bekim ol askim bilong pikinini.

Wok Yet Long Skulim Em Long En

Pasin bilong skulim pikinini meri long sik mun em samting yu mas wok long mekim, i no olsem yu toktok long dispela samting wanpela taim tasol. I no gat wok long stori long olgeta samting bilong sik mun long wanpela taim tasol. Sapos yu stori long planti samting, dispela inap paulim tingting bilong yangpela meri. Ol pikinini i save kisim save isi isi long ol samting. Na ating sampela taim yu mas kolim gen ol tok yu mekim pinis. Taim krismas bilong ol yangpela meri i wok long go antap, ol inap kliagut moa long ol liklik liklik samting bilong sik mun.

Narapela samting em tingting bilong ol yangpela meri long sik mun i save senis taim ol i wok long kamap bikpela. Taim pikinini meri bilong yu i kisim sik mun inap sampela taim pinis, ating bai em i gat sampela nupela wari na askim. Olsem na yu mas wok yet long givim save long em na bekim ol askim bilong em. Stori long ol samting i stret long krismas na pasin bilong em long kliagut long ol samting.

Go Pas Long Stori Long En

Tasol bai yu mekim wanem sapos i luk olsem pikinini meri bilong yu i no gat interes long toktok long sik mun? Ating em i no laik toktok long ol samting bilong em yet. O ating yu mas wet liklik i go inap long taim em i redi long toktok long dispela samting na kamapim ol askim. Em inap tok tu olsem em i save pinis long olgeta samting em i laik save long en.

Ol i skelim sampela yangpela meri bilong gret 6 long Amerika, na planti bilong ol i tok ol i redi long kisim namba wan sik mun bilong ol. Tasol taim ol i mekim sampela askim moa long ol, em i klia olsem save bilong ol i sot na ol i bilip pinis long kain kain tingting kranki em tingting bilong ples na ol stori nating i as bilong en. Olsem na maski sapos pikinini meri bilong yu i tok em i redi long kisim sik mun, yu mas toktok yet wantaim em long dispela samting.

Ating yu mama o papa i mas go pas long toktok long sik mun na mekim olsem long bihain tu. Em i wok bilong yu. Pikinini meri bilong yu i mas kisim helpim long yu, maski em i luksave long dispela o nogat. Ating yu pilim olsem yu no inap helpim em o yu bel hevi liklik, tasol no ken givap. No ken les kwik. Bihain, pikinini meri bilong yu bai luksave olsem hatwok bilong yu long helpim em long redi long sik mun i bin helpim em tru.

[Rait long pes 11]

Yu mas givim save long pikinini meri bilong yu paslain long em i kisim sik mun long namba wan taim

[Blok long pes 13]

ROT BILONG TOKTOK WANTAIM PIKININI MERI LONG SIK MUN

❖ Painimaut ol samting em i save pinis long en. Stretim ol tingting kranki. Skelim save em i gat long sik mun, em i stret o nogat.

❖ Stori long sik mun bilong yu yet. Tingim bek namba wan taim yu yet i bin kisim sik mun na stori long en, long dispela rot yu ken strongim bel bilong pikinini meri bilong yu.

❖ Givim save i helpim em. Planti yangpela meri i save mekim ol dispela askim: “Bai mi mekim wanem sapos mi kisim sik mun long skul?” “Mi mas yusim wanem kain modes o tampon samting?” “Bai mi yusim ol olsem wanem?”

❖ Kamapim klia ol tok bilong ol buk samting. Kamapim ol tok i stret long krismas na pasin bilong pikinini meri long kliagut long ol samting.

❖ Wok long lainim em. Kirap toktok wantaim pikinini meri paslain long em i kisim sik mun long namba wan taim, na wok long stori long dispela samting long bihain tu, bihain long taim em i kisim pinis sik mun.

[Piksa long pes 12, 13]

Pilim tingting bilong em. Ating pikinini meri i no laik toktok long ol samting bilong em yet