Ol Yangpela i Laik Save

Wai na Ol Meri i No Laikim Mi?

Mi save, em i laikim mi. Mi tokim em pinis long olgeta samting bilong mi​—⁠⁠ol samting mi gat, ol ples mi bin i go long en, na ol manmeri mi save long ol. Ating em i dai stret long prenim mi!

Mi les pinis long dispela mangi! Em i luksave tu o nogat? Hau bai mi stopim em long toktok wantaim mi, na mi no bagarapim bel bilong em?

YU BIKPELA pinis inap long yu ken poromanim wanpela. Yu laik painim meri husat i luk nais na em i gat wankain bilip olsem yu long ol samting bilong lotu. (1 Korin 7:39) Bipo yu bin traim long prenim wanpela meri, tasol ol samting i no bin wok gut.

Sapos yu laik prenim wanpela meri, orait yu mas skelim wanem ol samting? Na i gutpela long yu tingim gut wanem ol stiatok bilong Baibel?

Namba Wan Samting Yu Mas Mekim

Paslain long yu askim wanpela meri long prenim yu, i gat sampela samting yu mas lain long mekim pastaim na dispela bai helpim yu long kamap pren bilong olgeta kain lain. Skelim ol dispela samting.

◼ Kisim ol gutpela pasin. Baibel i tok man i gat pasin laikim, “em i no save hambak na em i no save bikhet nabaut.” (1 Korin 13:⁠5) Ol gutpela pasin i soim olsem yu rispektim ol narapela na yu wok long kisim pasin bilong man i bikpela pinis, em pasin bilong Krais. Tasol gutpela pasin i no olsem gutpela klos yu werim bilong amamasim ol narapela, na yu rausim taim yu go bek long haus. Askim yu yet, ‘Mi save mekim gutpela pasin taim mi stap wantaim ol wanfamili bilong mi?’ Sapos nogat, na yu save mekim gutpela pasin taim yu stap wantaim ol narapela husat i no wanfamili bilong yu, orait i luk olsem yu giaman tasol long mekim olsem. Tingim, meri i gat gutpela tingting em bai skelim pasin yu save mekim long ol wanfamili bilong yu yet bambai em i ken save long pasin tru bilong yu.​—⁠Efesus 6:​1, 2.

Ol meri i tok: “Mi laikim tru mangi husat i mekim gutpela pasin long ol liklik samting, olsem em i opim dua long mi, na em i mekim gutpela pasin long ol bikpela samting tu, olsem em i mekim gutpela pasin na tingim gut mi na famili bilong mi tu.”​—⁠Tina, 20.a

“Mi save les tru sapos mi bungim wanpela mangi long namba wan taim na em i askim long ol samting i no bilong ol narapela long save long en, olsem ‘Yu wok long prenim wanpela mangi?’ na ‘Yu putim wanem ol mak bilong winim?’ Dispela i no gutpela pasin na mi no save amamas long en!”​—⁠Kathy, 19.

◼ Holimpas pasin bilong mekim skin i stap klin. Dispela pasin i soim olsem yu rispektim ol narapela na yu rispektim yu yet tu. (Matyu 7:12) Sapos yu rispektim yu yet, ol narapela tu bai rispektim yu. Tasol sapos yu no mekim skin i stap klin, bai i hatwok long wanpela meri i laikim yu.

Ol meri i tok: “Wanpela mangi i laikim mi, tasol maus bilong em i smel nogut tru. Mi no laikim tru dispela samting.”​—⁠Kelly, 24.

◼ Kisim pasin bilong toktok gut. Pasin bilong toktok gut em samting i save strongim pasin pren. Dispela i makim olsem yu no stori tasol long ol samting yu yet i laikim, nogat, yu stori tu long ol samting em pren bilong yu i save laikim.​—⁠Filipai 2:​3, 4.

Ol meri i tok: “Mi save amamas taim wanpela mangi i bihainim pasin tru bilong em long toktok taim em i stori wantaim mi, na em i tingim ol samting mi bin tokim em, na em i givim ol askim na bai toktok bilong mitupela i ron gut.”​—⁠Christine, 20.

“Mi ting olsem ol mangi i save laikim ol samting ol i lukim, tasol ol meri i save laikim ol samting ol i harim.”​—⁠Laura, 22.

“Ol presen i gutpela samting. Tasol sapos wanpela mangi inap toktok gut wantaim yu, na em inap mekim ol tok bilong strongim na mekim gut bel bilong yu . . . Man! Dispela em gutpela samting tru.”​—⁠Amy, 21.

“Mi bai i gat laik tru long prenim mangi husat i gat pasin bilong tok pani, tasol em inap toktok tu long ol bikpela samting na em i no kusai nabaut.”​—⁠Kelly, 24.

Sapos yu mekim ol dispela samting, yu bai i gat ol gutpela pren. Tasol taim yu pilim olsem yu redi long kirap prenim wanpela meri, orait yu mas mekim wanem?

Namba Tu Samting Yu Mas Mekim

◼ Go pas long mekim samting. Sapos yu gat wanpela pren yu save laikim tru na yu ting em inap kamap gutpela poroman marit, orait tokim em olsem yu laikim em. Tokaut stret na no ken haitim ol filings bilong yu. Tru, ating bai yu pret long mekim olsem. Yu pret olsem nogut meri i tok nogat long yu. Tasol sapos yu redi long go pas long askim em, dispela em wanpela mak i soim olsem yu kisim pinis pasin bilong man i bikpela pinis.

Ol meri i tok: “Mi no inap save long tingting bilong narapela. Olsem na sapos wanpela mangi i laik prenim mi, orait em i mas kamapim tingting tru bilong em na kam stret long mi na tokim mi.”​—⁠Nina, 23.

“Sapos mi bin stap bes pren bilong wanpela mangi long bipo, ating bai mitupela i pilim narapela kain liklik taim em i askim mi long kamap gelpren bilong em. Tasol mi bai rispektim em sapos em i tok stret olsem em i gat laik long mi.”​—⁠Helen, 25.

◼ Rispektim disisen bilong meri. Olsem wanem sapos bes pren bilong yu i tokim yu olsem em i no laik kamap gelpren bilong yu? Rispektim em​—⁠tingim olsem em i save long tingting tru bilong em, na em i no giaman taim em i tok nogat long yu. Sapos yu strong yet long askim em long prenim yu, yu bai soim klia olsem tingting bilong yu i olsem bilong liklik pikinini. Sapos meri i tok nogat long prenim yu na yu no rispektim disisen bilong em, o yu belhat long em, orait olsem wanem? Yu tingim ol laik bilong em o yu tingim ol laik bilong yu yet tasol?​—⁠1 Korin 13:⁠11.

Ol meri i tok: “Mi save belhat taim mi tok nogat long wanpela mangi tasol em i save askim yet.”​—⁠Colleen, 20.

“Mi tokim wanpela mangi olsem mi no laik prenim em, tasol em i strong yet long kisim fon namba bilong mi. Mi laik mekim gutpela pasin long em. Mi save olsem em i bin hatwok long strongim bel bilong kamapim tingting bilong em long mi. Tasol bihain mi skelim olsem mi mas tok strong long em.”​—⁠Sarah, 23.

Ol Samting Yu No Ken Mekim

Sampela mangi i pilim olsem i no hatwok long kirapim ol meri long laikim ol. Ol inap resis wantaim wanlain bilong ol long lukim olsem husat inap kirapim planti meri moa long laikim em. Tasol kain pasin olsem i no gutpela na yu inap kisim nem nogut long en. (Sindaun 20:11) Yu inap abrusim dispela hevi sapos yu mekim ol dispela samting mipela i kolim daunbilo.

◼ No ken mekim tok gris. Man i gat dispela pasin em i save mekim ol tok na pasin i kirapim bel bilong meri. Em i no tingting long prenim meri long pasin i stret. Ol dispela kain toktok na pasin i no stret wantaim tok bilong Baibel long pasin man i mas mekim long ol yangpela meri, ol i mas mekim “pasin i klin tru long ai bilong God.” (1 Timoti 5:⁠2) Ol man bilong mekim tok gris ol i no save stap olsem ol gutpela pren o gutpela poroman marit. Ol meri i gat gutpela tingting ol i save long dispela samting.

Ol meri i tok: “Em pasin nogut tru sapos wanpela mangi i mekim ol tok gris long yu, tasol yu save olsem las mun tasol em i bin mekim wankain tok long pren bilong yu.”​—⁠Helen, 25.

“Dispela naispela mangi i kirap mekim ol tok gris long mi, tasol em i toktok tumas long ol samting bilong em yet. Narapela meri i kam bung wantaim mipela, na em i mekim ol wankain tok long dispela meri. Na taim namba tri meri i kam bung wantaim mipela, em i mekim gen ol wankain tok long em tu. Dispela em rabis pasin stret!”​—⁠Tina, 20.

◼ No ken pilai long filings bilong meri. No ken ting olsem yu inap prenim wanpela meri long wankain pasin olsem yu prenim wanpela mangi. Bilong wanem i olsem? Tingim: Sapos yu tokim wanpela mangi olsem em i luk nais long nupela klos bilong em o oltaim yu save toktok wantaim em na kamapim ol tingting bilong yu long em, orait em i no inap kisim tingting olsem yu laikim em long wankain pasin olsem yu bai laikim wanpela meri. Tasol sapos yu tokim wanpela meri olsem em i luk nais o oltaim yu toktok wantaim em na kamapim ol tingting bilong yu long em, ating em bai kisim tingting olsem yu laik prenim em.

Ol meri i tok: “Mi no ting ol mangi i save olsem ol i no inap mekim wankain pasin long ol meri olsem ol i save mekim long ol narapela mangi.”​—⁠Sheryl, 26.

“Wanpela mangi i kisim fon namba bilong mi, na salim teks mesis long mi. Orait, . . . em i gat wanem tingting na em i mekim olsem? Sampela taim yu inap stap pren bilong narapela long rot bilong salim ol teks mesis, na yutupela inap laikim narapela narapela, tasol yu no inap mekim planti tok long rot bilong teks mesis, laka?”​—⁠Mallory, 19.

“Mi no ting ol mangi i save olsem ol meri inap kirap kwik long laikim ol, na moa yet sapos mangi i tingim gut meri na meri i no pilim hatwok long toktok wantaim em. I no olsem meri i dai tru long prenim man, nogat. Mi ting planti meri i gat laik tru long prenim wanpela mangi, na oltaim ol i wok long painim wanpela ‘Rait Man.’ ”​—⁠Alison, 25.

Kisim Stretpela Tingting

Em i no stretpela tingting, na em pasin hambak tu, long ting olsem olgeta meri bai laikim yu. Tasol sampela meri bai laikim yu sapos yu tingim dispela samting: Lukluk bilong yu i no bikpela samting, tasol pasin bilong yu em i bikpela samting moa. Olsem na Baibel i tok strong long man i mas “kamap nupela,” olsem kisim ol nupela pasin.​—⁠Efesus 4:⁠24.

Kate i gat 21 krismas na em i tok: “Ol mangi i ting olsem ol meri bai laikim ol sapos ol i bihainim wanpela kain stail bilong werim klos na bilas samting. Em tru olsem sampela meri i laikim ol dispela samting, tasol planti meri i save laikim ol man i gat ol gutpela pasin.”b

Bilong lukim sampela stori moa long hap “Ol Yangpela i Laik Save” long tok Inglis, lukim Web-sait www.watchtower.org/ype

[Ol Futnot]

SAMTING BILONG TINGIM

◼ Olsem wanem yu inap soim olsem yu rispektim yu yet?

◼ Olsem wanem yu inap soim olsem yu rispektim tingting na filings bilong meri?

[Piksa long pes 29]

Gutpela pasin i no olsem gutpela klos yu werim bilong amamasim ol narapela, na yu rausim taim yu go bek long haus