Ol Yangpela i Laik Save . . .

Mi Mas Mekim Wanem Kain Pasin Long Meri i Gat Laik Long Mi?

“Susan i kamapim laik bilong em pastaim, mi no gat tok long dispela. Samting i bin wok gut.”​— James.a

“Sapos man i no kamapim tingting tru bilong em long meri, bikpela hevi tru inap kamap.”​—⁠Roberto.

I NO longtaim i go pinis wanpela yangpela meri i tok em i laik askim yu long wanpela samting. Planti taim yu bin lukim em long bung bilong ol pren, yu amamas long toktok na mekim ol samting wantaim dispela meri. Tasol yu kirap nogut tru long tok em i mekim. Em i laik bai yutupela i pren na em i laik save yu gat wankain laik o nogat.

Dispela inap mekim yu kirap nogut sapos yu gat tingting olsem man i mas go pas long kirapim pasin bilong pren wantaim. Planti taim i olsem, tasol yu mas save olsem taim meri i go pas, em i no sakim ol stiatok bilong Baibel.b Dispela samting inap helpim yu long bekim tok long em long pasin i stret.

Yu tingim tok bilong meri na ating yu pilim olsem yu yangpela tumas long prenim wanpela meri o long nau stret yu no gat kain tingting olsem long dispela meri. Na tu, ating bel i kotim yu na yu tingting planti, nogut sampela samting yu bin mekim i kirapim meri long ting olsem yu gat laik long em. Bai yu mekim wanem? Namba wan samting, yu mas tingim filings bilong em.

Tingim Filings Bilong Em

Tingim ol samting meri i bin mekim. Em i laik tru long yu mas i gat gutpela tingting long em, olsem na ating inap planti de em i bin mekim traim ol tok em i bin kamapim long yu. Bihain long em i makim pinis wanem toktok em bai mekim na hau em bai smail long yu, em i tingting planti long yu bai tok nogat long em. Tasol em i strongim bel na daunim pret na em i tokim yu long tingting i stap long bel bilong em.

Bilong wanem em i mekim dispela samting i gat hatwok long en? Ating em i gat laik long yu. O ating em i amamas long ol gutpela pasin bilong yu em planti narapela i no save tingim tumas. I olsem em i mekim sampela tok amamas long yu em yu no save harim long olgeta de.

Ol dispela poin i no bilong stiaim disisen bilong yu, tasol em bilong kirapim yu long mekim gutpela pasin long dispela meri. Wanpela yangpela meri, nem bilong em Julie, em i tok: “Maski sapos man i no gat laik long meri, em i mas amamas long wanpela i tingim em. So em i no ken tok nogat tasol, em i mas bihainim gutpela pasin taim em i tokim meri olsem em i no gat tingting long em.” Orait nau yumi ken skelim hau long mekim dispela samting.

Olsem wanem sapos yu bin tok nogat long em long bipo? Ating nau yu tingting long tok strong long em. Sakim dispela tingting. Sindaun 12:18 i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em. Tasol tok bilong man i gat gutpela tingting i save helpim ol man olsem gutpela marasin.” Hau bai yu mekim ol tok olsem “man i gat gutpela tingting”?

Yu inap tok tenkyu long em i bin kamapim filings bilong em na long em i gat gutpela tingting long yu. Maski yu no min long givim sampela tingting long em olsem, tok sori long dispela. Long gutpela pasin tokaut klia olsem yu no gat wankain filings olsem em i gat. Sapos em i no kisimgut tok yu mekim na yu mas mekim tok i strongpela moa, orait yu no ken mekim long hatpela pasin. Yu toktok long ol samting em i pilim long bel, olsem na isi long em. Sapos yu bin kamapim filings bilong yu long wanpela husat i no gat laik long yu, bai yu amamas sapos em i isi long yu, a?

Tasol ating dispela meri i strong olsem yu min long giamanim em. Ating em i kamapim sampela samting yu bin mekim na i kirapim em long ting yu laikim em. Ating em bai tok: ‘Tingim dispela taim yu bin givim plaua long mi?’ o ‘Olsem wanem long tok yu bin mekim long mi taim mitupela i bin wokabaut wantaim long mun i go pinis?’ Nau yu gat wok long skelim gut yu yet.

Pasin Tru Bilong Yu

Bipo i gat ol man bilong raun na painim ol nupela kantri, planti taim ol i bin tingim ol nupela kantri i olsem samting bilong kirap bosim na mekim wok long en, long nau sampela man i gat kain tingting olsem long ol meri. Ol i amamas long pren wantaim wanpela meri, tasol ol i no laik kisim wok bilong man i marit. Ol i no tokaut olsem ol i laikim meri, tasol ol i grisim meri long rot bilong pulim tingting na laik bilong em. Kain man olsem i mekim pasin giaman bilong kirapim meri long laikim em. Wanpela elda Kristen i tok: “Sampela yangpela man i save prenim wanpela meri na lusim na i go prenim narapela meri na mekim olsem i go i go. I no stret long pilai nabaut long filings bilong meri.” Pasin bilong ol dispela man long tingim ol yet i kamapim wanem samting?

“Sapos man i trikim wantok bilong en, na bihain em i tok, ‘Mi tok pilai tasol’, orait em i olsem wanpela longlong man i sutim ol spia nabaut na tromoi nabaut ol stik i gat paia.” (Sindaun 26:​18, 19) Taim man i tingim em yet na prenim wanpela meri, bihain meri bai luksave long astingting tru bilong em. Pasin giaman bilong em inap brukim stret lewa bilong meri, olsem stori hia i kamapim.

Wanpela yangpela man i laik pren wantaim wanpela meri, tasol em i no gat laik long maritim em. Em i kisim dispela meri i go long ol naispela haus kaikai, na ol i go wantaim long ol pati. Man i amamas long poroman wantaim dispela meri, na meri i amamas long man i tingim em, em i ting man i gat laik long maritim em. Taim meri i painimaut olsem man i laik poroman nating tasol wantaim em, bel bilong meri i bagarap stret.

Tasol maski sapos yu no min long givim sampela tingting i no stret long dispela yangpela meri i askim laik long yu, nau yu mas mekim wanem? Sapos yu strong olsem yu no gat asua, dispela bai mekim em i bel nogut. Tingim stiatok bilong Baibel: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” (Sindaun 28:13) Olsem na tok tru long em. Tokaut long olsem wanem yu gat asua long dispela samting i kamap. Tasol sapos yu min long kirapim nating filings bilong em, tokaut olsem yu mekim bikpela rong. Tok sori long em.

Tasol no ken ting tok sori bilong yu i makim olsem hevi i pinis. Ating yangpela meri hia bai kros long yu inap sampela haptaim. Ating yu mas stori long papamama bilong em long samting yu bin mekim. Na ating i gat sampela hevi moa i painim yu. Galesia 6:7 i tok: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu.” Tasol pasin bilong tok sori na mekim ol samting yu inap mekim bilong stretim dispela rong bai helpim meri long go het long laip bilong em. Na samting i kamap i ken lainim yu long “no ken tok giaman” long wanpela samting, dispela i makim tu ol samting yu mekim long ol meri.​—⁠Song 34:⁠13.

Tingting Gut Paslain Long Yu Bekim Askim

Tasol olsem wanem sapos tru tru yu laik save gut moa long dispela meri? Sapos olsem, yu mas save olsem pasin bilong poroman wantaim i no bilong kisim amamas tasol. Strongpela filings i kamap namel long man na meri i poroman wantaim i bilong kirapim tupela long marit. Bihain long tupela i marit, dispela filings i helpim tupela long pas gut wantaim olsem man na meri marit. Dispela save i mas mekim wanem long yu?

Taim yu skelim dispela meri, ating yu luksave olsem ol samting i soim olsem em i wanpela gutpela meri. I olsem em i opim dua long yu, na yu laik bai dua i mas op i stap. Tasol paslain long kirap wantu long pren wantaim, mekim ol samting bilong helpim yutupela wantaim long abrusim bikpela bel hevi long bihain.

Bihain liklik ating yu ken kisim tingting bilong sampela lain i bikpela pinis em ol i save gut long dispela meri. Kirapim meri long mekim wankain samting long ol lain i save gut long yu. Yutupela wantaim i mas askim ol dispela lain long kamapim tingting bilong ol long ol gutpela pasin na pasin i no stret tumas bilong yutupela. Na tu, yu inap askim ol elda Kristen long kamapim tingting bilong ol. Em i gutpela long save olsem dispela man o meri yu laikim i gat gutpela nem long kongrigesen Kristen o nogat.

Tasol ating bai yu tok, ‘Wai na ol arapela manmeri i mas insait long samting bilong mi yet?’ Tasol long kain samting olsem em i savetingting long kisim tingting long ol arapela. Dispela i stret wantaim tok bilong Baibel, olsem Sindaun 15:​22, NW i tok: “Sapos planti man i givim tingting long [yu], ol samting bai kamap gut.” Ol bikpela manmeri yu toktok wantaim ol, bai ol i no wokim disisen bilong yu. Tasol ‘gutpela tok ol i givim’ inap helpim yu long luksave long sampela pasin bilong dispela meri na bilong yu tu, em yu yet i no luksave long en.​—⁠Sindaun 27:⁠9.

James, yumi stori pinis long em, em i bin mekim olsem. Maski em i stap em yet, em i toktok wantaim papamama bilong em long Susan. Bihain James i tokim Susan long nem bilong sampela manmeri i bikpela pinis em ol inap kamapim tingting bilong ol long olsem wanem sapos tupela i marit, na Susan tu i mekim wankain long James. Taim ol i harim pinis gutpela ripot, James na Susan i kirap na poroman wantaim bilong skelim olsem i gutpela tupela i marit o nogat. Sapos yu mekim kain pasin olsem paslain long laik i kamap strong, bai yu pilim gutpela moa long disisen yu mekim.

Nambawan bikpela samting, beten long Jehova. Pasin bilong poroman wantaim i bringim yu i go long marit, so askim God long helpim yu na bai yu ken save pasin bilong prenim dispela meri bai helpim yu long winim dispela mak o nogat. Bikpela samting moa em long askim God long helpim yutupela wantaim long mekim ol disisen i helpim yupela long i go klostu moa long em. Dispela em i rot bilong yutupela long i stap amamas tru.

[Ol Futnot]

[Ol Piksa long pes 19]

Sapos tru tru yu no gat laik long narapela, was gut, nogut yu mekim sampela pasin i givim narapela tingting long em