Ol Yangpela i Laik Save . . .

Olsem Wanem Sapos Em i No Laikim Mi?

“Mi wari na bel bilong mi i bagarap. Mi laikim em tru. Tasol mi no save, em i laikim mi o nogat. Bai mi mekim wanem? Bai mi tokim em olsem mi laikim em tru? Nogat, nogat, mi no inap mekim olsem! Ol narapela bai tok wanem long mi?”​—⁠Huda i tok olsem.a

HUDA, em i wanpela yangpela meri bilong Lebanon, na em i laikim tru wanpela man i no gat laik long em. Planti man na meri i karim dispela kain hevi. Narapela yangpela meri, nem bilong em Zeina, em i gat wankain hevi. Em i tok: “Mi lukim em long olgeta de, long wanem, em i stap klostu long mipela. Em i gat gutpela skin tru. Olsem na mi gat bikpela laik tru long em.”

Tru, i no gat rong long laikim tru wanpela man o meri​—⁠sapos em i kain man o meri Kristen i ken maritim. (Sindaun 5:15; 1 Korin 7:39) Na i no gat rong sapos wanpela meri i laik marit na kamapim famili. Tasol olsem wanem sapos yu kirap laikim wanpela gutpela man i no save long tingting bilong yu, o em i no gat laik long yu?

Bel i Bagarap

Olsem Huda, yu inap pilim olsem bel bilong yu i bagarap stret. Ating sampela taim yu amamas nogut tru, na bihain liklik yu bel hevi stret na i olsem yu no inap mekim wanpela samting. Zeina i tok: “Sampela taim mi pilim olsem amamas bilong mi i winim amamas bilong olgeta narapela yangpela meri, na sampela taim mi pilim olsem i no gat narapela yangpela meri i bel hevi olsem mi.” Taim narapela i no laikim yu wankain olsem yu laikim em, dispela inap mekim na yu tingting planti oltaim, o yu no inap slip long nait, o yu bel hevi tru.

Long Sindaun 13:12 Baibel i tok olsem: “Sapos man i ting long kisim wanpela samting na i wet nating longpela taim, bai em i bel hevi moa yet.” Na taim yu wet long samting i mas kamap na em i no kamap, dispela inap bagarapim stret bel bilong yu! Ating olgeta taim yu bai wok long tingting long dispela man, na yu amamas tru long harim stori long em maski em liklik stori tasol. Ating yu bai mekim kain kain samting bilong pulim ai bilong em, o yu kamapim kain kain tok bilong painim rot bilong i stap wantaim em. Na taim yu stap klostu long em, ating yu hatwok long kamapim pasin tru bilong yu.

Yu inap paul liklik sapos sampela taim dispela man yu laikim em tru i mekim gut long yu, na long ol narapela taim em i mekim olsem em i no tingim yu liklik. Na sapos yu lukim em i tingim tru narapela na mekim gut long em o em i mekim gutpela pasin long ol narapela, dispela inap mekim na pasin bilong bel nogut i kamap long bel bilong yu. Baibel i tok: “Man bilong belhat na kros i save givim pen nating long ol arapela man na mekim nogut tru long ol. Tasol pasin bilong . . . bel nogut long ol arapela man, em i nogut tru na i winim pasin bilong belhat na kros.”​—⁠Sindaun 27:⁠4.

Huda i tok: “Mi bel nogut tru na sapos mi no bin stretim tingting bilong mi, ating mi inap kamap longlong.” Na yu inap pilim olsem yu nogut olgeta. Huda i tok: “Mi kros long mi yet, long wanem, mi kirap laikim wanpela man i no gat laik long mi, na mi yet i mekim na mi bel hevi tru.”

Long ol kantri long hap bilong Wes, ating wanpela yangpela meri bai toktok wantaim wanpela yangpela man na kamapim tingting bilong em, tasol olgeta yangpela meri i no laik mekim olsem. Na long sampela lain, dispela pasin i no stret o samting i nogut tru sapos wanpela yangpela meri i mekim olsem. Orait, yu inap mekim wanem sapos yu laikim tru wanpela man tasol em i no gat laik long yu?

Skelim Gut Bel Bilong Yu

Yu ken mekim olsem: Stap isi na long gutpela tingting skelim gut bel bilong yu. Baibel i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting.” (Sindaun 28:26) Bilong wanem? Long wanem, planti taim bel bilong yumi i save giamanim yumi. (Jeremaia 17:⁠9) Na sampela taim yumi yet i ting yumi laikim tru wanpela man, tasol bel i giamanim yumi. Huda i tok: “Mi laik wanpela man i tingim mi na laikim mi. Mi laik em i lukautim mi. Kirap long taim mi liklik yet i no gat wanpela man o meri i bin mekim pasin sori long mi. Dispela i bagarapim tru bel bilong mi.” Sapos yu go bikpela insait long famili i no gat pasin sori o ol i bin mekim nogut long yu, yu tu inap hangre long wanpela i laikim yu na tingim yu. Tasol olsem wanem? Sapos yu laikim tru wanpela man na em i laikim yu, dispela bai stretim hevi bilong yu?

Sori tru, ol manmeri i no amamas na ol i pilim olsem ol i stap wanpis, planti bilong ol i no kamap gutpela poroman marit. Ol i marit, long wanem, ol i ting ol bai kisim dispela samting ol i ting ol i sot tru long en. Tasol amamas tru i save kamap taim yumi givim samting, i no long taim yumi kisim samting. (Aposel 20:35) Na meri inap mekim gut wok bilong em insait long marit sapos em i amamas long em yet, na em ‘i no lukautim ol samting bilong em tasol. Nogat. Em i lukautim ol samting bilong ol arapela na helpim ol long i stap gut.’​—⁠Filipai 2:⁠4.

Taim yu pilim olsem yu mas marit, tingting bilong yu inap kirap hariap taim wanpela man i mekim gut long yu. Sampela taim ol pren na famili i strongim laik bilong yangpela meri long laikim wanpela man. Sampela lain i strong long yangpela meri i mas marit taim em i bikpela pinis inap long em i ken marit. Wanpela buk (Women in the Middle East) i tok: “Sapos meri i gat klostu 30 krismas na em i singel yet, famili bilong em bai tingting planti long em.” Nem bilong famili inap bagarap, olsem na ating papa i strong ol pikinini meri bilong em i mas marit taim ol i yangpela yet.

Tasol ol lo bilong Baibel i bikpela samting, winim pasin bilong ples. Na Baibel i strongim ol yangpela long wet pastaim na taim ol i abrusim pinis dispela taim laik bilong skin i strong tumas long marit, ol i ken marit. (1 Korin 7:36) Orait, olsem wanem sapos yu ting ol pren na papamama bilong yu ol i strong tumas long subim yu long marit? Baibel i tok, gutpela yangpela meri bilong Sulam em i tok strong long ol pren bilong em olsem ol ‘i no ken kirapim bel bilong em.’ (Song Bilong Solomon 2:⁠7) Sapos yu tu i kamapim strong tingting bilong yu olsem, ating ol narapela bai tingim laik bilong yu, na sapos papamama i save pret long God, ol bai tingim tru laik bilong yu.

Kisim Stretpela Tingting

Tasol yu mas kisim stretpela tingting long dispela man yu ting yu laikim em tru. Ating yu bai hatwok long mekim olsem, na dispela inap mekim yu i bel hevi tru. Tasol Baibel i tok: “Yu mas strong long kisim save long ol pasin i tru na long gutpela tingting na long olkain gutpela save. Yu no ken tromoi ol dispela gutpela pasin.” (Sindaun 23:23) Askim yu yet olsem: ‘I gat as tru na mi laikim dispela man? Mi save gut long dispela man? Mi save long tingting na bel na pasin bilong em? Mi save long ol samting i bikpela samting long em, na long ol samting em i gat save long mekim, na long wokabaut bilong em?’

Narapela samting yu mas tingim i olsem: Dispela man i bin kamapim klia olsem em i laikim yu o nogat. Sapos man i mekim gutpela pasin o gutpela pasin pren, planti taim meri i kisim tingting kranki long dispela. Huda i tok: “Em i mekim gutpela pasin, tasol mi yet i ting toktok na pasin em i mekim long mi i makim olsem em i laikim mi, long wanem, mi laik em i mas laikim mi. Bihain mi luksave olsem em i no gat laik long mi, na mi sem pipia. Mi pilim olsem mi no gutpela meri na em i ken laikim mi, na mi ting sampela pasin bilong mi i no gutpela tumas.”

Sapos wankain hevi i bin painim yu ating yu tu i pilim olsem, a? Tasol yu mas save, sapos dispela man i no gat laik long yu, dispela i no makim olsem narapela man i no inap laikim yu. Tru tumas, i no dispela yangpela man tasol i stap long graun, a?

Winim Bel Hevi

Tasol ating bel hevi bilong yu i no inap pinis hariap. Wanem samting inap helpim yu? Wanpela samting yu ken mekim em yu ken toktok wantaim wanpela “gutpela pren”​—⁠wanpela strongpela Kristen em i putim yau long tok bilong yu. (Sindaun 17:17) Ating long kongrigesen i gat wanpela sista i lapun liklik na yu inap toktok wantaim em. Ol papamama Kristen tu inap mekim planti samting bilong helpim na strongim yu. Zeina i tok: “Wanpela meri Kristen long kongrigesen bilong mipela i lukim mi i bel hevi, na em inap helpim mi, long wanem, em i strongpela sista. Mi no pret long em na mi kamapim hevi bilong mi long em. Em i strongim mi long toktok wantaim papamama. Olsem na mi toktok wantaim ol, na ol i pilim hevi bilong mi na ol i helpim mi.”

Na yu mas save, beten i gat strong. (Song 55:22) Huda i tok: “Ol beten mi mekim long Jehova i helpim mi long rausim bel hevi bilong mi. Na mi kaunim ol gutpela stori long nius Wastaua na Kirap!” Na tu, yu no ken stap wanpis​—⁠em i bikpela samting. (Sindaun 18:⁠1) Mekim sampela wok wantaim ol narapela manmeri. Zeina i tok: “Narapela samting i bin helpim mi em wok​—⁠mi wok strong na mi kirap mekim wok painia. Na tu, mi kirap poromanim moa ol narapela meri long kongrigesen. Dispela i helpim mi long kamap strong long ol samting bilong spirit.”

Baibel i tok i gat “taim bilong laikim tru narapela man,” na ating bihain bai yu bungim wanpela man i gat laik long yu na yu gat laik long em. (Saveman 3:⁠8) God Jehova i wokim ol manmeri na em i putim laik long bel bilong ol bilong kisim amamas insait long marit​—⁠em narapela i laikim tru narapela, na ating yu tu bai kisim dispela gutpela samting Bikpela Man bilong wokim yumi i as bilong en. Olsem na, taim yu no marit yet, mekim gutpela wok long dispela hap taim, em taim bilong stap fri long ‘ol wari bilong dispela graun i pulim nabaut tingting bilong yu,’ olsem aposel Pol i tok. (1 Korin 7:​32-34) Tasol maski yu gat wanem tingting, yu ken bilip olsem tok promis bilong Baibel bai kamap tru. Em i tok: ‘Em [Jehova] i save givim ol samting long olgeta inap long ol i stap gut.’​—⁠Song 145:⁠16.

[Futnot]

[Piksa long pes 11]

Sampela taim pasin bilong man long mekim gut long meri inap givim tingting kranki long em