Ol Yangpela i Laik Save . . .

Olsem Wanem Sapos Em i Tok Nogat?

YU TINGIM em olsem wanpela gutpela poroman. Tasol nau tingting bilong yu i wok long senis, isi isi yu gat laik long em. Ating gutpela pasin bilong em, o wei em i smail long yu taim em toktok long yu i mekim na yu gat laik long em. Maski wanem samting i bin kirapim yu long pilim olsem, sampela haptaim i lus na em i no soim olsem em i gat laik long yu. Olsem na yu go long em na askim olsem inap yutupela i pren. Long gutpela pasin, em i tok stret long yu, nogat, na yu bel hevi tru.a

Tru yu bel hevi, tasol yu no ken kros, traim long kisim stretpela tingting. Em tru dispela yangpela man i bin tok em i no gat laik long yutupela i pren wantaim. Tasol tingim, disisen bilong em i no min olsem yu nogut, o i mekim na ol arapela bai i no laikim na rispektim yu. I no olsem em i ting yu no naispela meri tumas na em i tok nogat, ating em yet i save ol mak em putim bilong winim na ol samting i olsem bikpela samting long laip bilong em i no wankain olsem bilong yu.

Sapos yu wanpela Kristen, yu no ken lusim tingting olsem, ‘God em i no man nogut, na bai em i lusim tingting long ol gutpela wok yu bin mekim. Nogat.’ (Hibru 6:10) Sonjab i tok olsem: “Yu wanpela gutpela samting yet. Yu singel olsem na yu stap wanpela gutpela samting Jehova inap mekim wok long en.” God Antap Tru na ol arapela i tingim na laikim tru yu, olsem na yu no ken ting yu no gutpela.

Ating bai yu pilim yet olsem yu no gutpela o yu pret, nogut narapela bai i no laik maritim yu. Tru yu no dispela meri em yangpela man i laik prenim long nau, tasol dispela i no min olsem wanpela i no ken laikim yu. (Hetman 14:⁠3) No ken ting wok bilong yu long painim gutpela man bilong maritim i no kamap gutpela, wok yu mekim i kamapim wanpela gutpela samting: Yu bin kisim save olsem dispela yangpela man i no rait man bilong maritim. Bilong wanem yumi tok olsem?

Yu Ting Em i Rait Man Bilong Yu Ken Maritim?

Baibel i tokim ol man marit long ‘laikim tru ol meri bilong ol, olsem ol i save laikim bodi bilong ol yet.’ (Efesus 5:28) Na tu Baibel i tokim ol man marit long “mekim gutpela pasin” long ol meri bilong ol. (1 Pita 3:⁠7) I luk olsem dispela yangpela man i laikim yu olsem wanpela gutpela pren tasol. Long taim em i tok nogat long yu, em i soim olsem em i no redi long laikim na mekim gut long yu olsem meri bilong em. Em i gat rait long tok nogat. Tingim dispela, sapos em i gat dispela kain tingting, yu ting em bai rait man bilong yu long maritim? Tingim bel hevi yu bai kisim sapos yu maritim wanpela husat i no laikim yu na i no mekim gut long yu olsem Baibel i makim!

Yu save pinis olsem bai yutupela i no pren wantaim, olsem na bilong helpim yu na yu no bel hevi tumas, skelim gen pasin bilong dispela yangpela man. Sampela taim, taim bel i kirap nating long laikim wanpela, dispela i pasim rot long lukim klia ol pasin kranki bilong em long skin na spirit, em pasin ol arapela inap lukim. Olsem, yu ting em i no luksave long filings bilong yu, o em i luksave, tasol em i wok long toktok yet wantaim yu bilong strongim dispela laik bilong yu? Sapos em i bin luksave, ating dispela i soim olsem em i no redi long kamap wanpela man marit Kristen i tingim narapela na pilim hevi bilong en. Sapos olsem, em gutpela olsem yu bin painimaut dispela samting, maski dispela i givim bel hevi long yu.

Sampela pasin wanpela yangpela man i kirap mekim long Marcia i kirapim Marcia long laikim em. Taim em i askim dispela yangpela man long tingting bilong em, em i tokim Marcia olsem em i no gat laik long em. Wanem samting i bin helpim Marcia long daunim bel hevi? Em i tok, “Mi larim tingting i stiaim mi, mi no larim bel bilong mi i stiaim mi, dispela i bin helpim mi long bosim gut filings bilong mi.” Em i tingim lo bilong Baibel long ol man marit, na dispela i helpim em long luksave olsem dispela yangpela man i no winim ol dispela mak bilong Baibel. Dispela i helpim em long daunim bel hevi bilong em.

Wankain samting i kamap long Andrea. Bihain em i luksave olsem ol pasin yangpela man i mekim long em i makim olsem em i no gat tingting bilong man i bikpela pinis. Em i luksave olsem dispela yangpela man i no redi long marit, na Andrea i tenkyu long Jehova i opim ai bilong em long luksave long dispela samting. Em i tok, “Mi save olsem Jehova inap lukautim yu na ol samting bilong givim bel hevi long yu i no ken kamap long yu, tasol yu mas bilip long Em.” Tru, long planti taim i gat gutpela as na wanpela yangpela man i tok nogat. Maski wanem samting i kamap, olsem wanem yu inap daunim dispela bel hevi?

Ol Samting Yu Ken Mekim

Em i bin tok nogat long yu, olsem na larim sampela haptaim i lus bilong bel i ken orait long dispela samting. Yu kirap laikim em insait long sampela haptaim, olsem tasol sampela taim i mas lus bilong yu ken lusim tingting long em. Planti taim kain filings olsem i no save dai kwiktaim kain olsem yu ofim lait. Nogat. Long sampela de dispela filings bilong yu bai strong tru! Yu mas isi long yu yet. Dispela kain filings bai pinis isi isi. Tasol sapos yu laik ol dispela filings i dai hariap, abrusim ol samting inap kirapim gen ol dispela filings.

Olsem: Sakim pasin bilong kotim yu yet long rot bilong skelim gen olgeta tok na pasin yu bin mekim taim yu kamapim filings bilong yu long dispela yangpela man. Sapos yu no bosim kain tingting olsem, ating bai yu kirap long bilip olsem dispela yangpela man i tok nogat, em i no minim o bai em i tok yes sapos yu traim askim em gen long narapela rot. Yu mas save olsem yu no inap senisim tingting bilong em. Maski yu traim narapela rot, ating bekim bilong em bai i no senis.

Pasin bilong salim tingting em i narapela samting em inap givim hevi long yu. Long tingting yu piksaim olsem olgeta samting i wok gut na yutupela wantaim i amamas. Tru, em inap mekim na yu lusim tingting long bel hevi bilong yu, tasol dispela samting yu piksaim long tingting em i no samting tru tru. Taim samting yu piksaim long tingting i pinis, bel hevi bilong yu i kam bek gen long yu. Dispela pasin na bel hevi inap stap wantaim yu inap longpela taim sapos yu no wok strong long sakim.

Wok strong long sakim pasin bilong salim tingting long em. Taim ol dispela tingting i kamap, kirap na go wokabaut. Mekim wanpela wok​—⁠bilong stiaim tingting bilong yu i go long narapela samting. Tingting long ol samting bilong strongim yu, i no long ol samting bilong mekim yu bel hevi. (Filipai 4:⁠8) Pastaim dispela bai hatwok, tasol bihain bai yu winim dispela bel hevi na bai yu stap bel isi gen.

Sapot yu kisim long ol gutpela pren bai helpim yu. (Sindaun 17:17) Tasol Sonja i mekim dispela tok lukaut: “I no gutpela sapos olgeta pren bilong yu ol i singel, ol i gat wankain krismas olsem bilong yu, na ol i gat wankain laik long marit. Yu mas i gat ol pren ol i gat bikpela krismas long yu, em ol inap helpim yu long bihainim stretpela tingting na skelim gut dispela samting.” Na tingim, i gat wanpela man husat i ken helpim yu tru long winim dispela bel hevi bilong yu.

Jehova​​—⁠Pren na Helpim

Taim wanpela gutpela man bilong bipo i bungim hevi, em i beten long Jehova long helpim em. Wanem samting i kamap long dispela? Em i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:19) Jehova bai mekim gut bel bilong yu na strongim yu tu sapos yu bilip na beten long em. Andrea i bin mekim olsem. Em i tok: “Beten em i bikpela samting bilong helpim yu winim dispela bel hevi na bai yu ken kirap tingting long ol narapela samting.” Sonja i mekim tu kain tok olsem long beten: “Beten bai helpim yu long holim yet dispela tingting olsem yu stap olsem wanpela gutpela samting yet, maski ol narapela i laikim yu o nogat.”

I no gat wanpela inap kliagut long filings tru tru bilong yu, tasol Jehova inap. Em i wokim ol man na meri bambai ol i ken kamapim pasin laikim bilong ol insait long marit. Em i save long strongpela laik i kamap namel long man na meri, na em i save long rot bilong bosim dispela laik. Em i ken helpim yu long winim dispela bikpela bel hevi, long wanem, 1 Jon 3:20 i tok: “God em i save long olgeta samting, na save bilong en i winim tru save i stap long bel bilong yumi.”

Holim Stretpela Tingting

Marit em inap stap olsem rot bilong kisim bikpela amamas, tasol i gat ol narapela samting tu i save kamapim amamas. Olgeta man i mekim laik bilong Jehova i save amamas, stap amamas i no samting bilong ol marit tasol. Rot i op long ol singel long mekim sampela samting ol marit i no gat rot long mekim. Tok bilong 1 Korin 7:28 long ol “marit bai i painim planti hevi long laip bilong ol,” dispela i no painim ol. Dispela planti hevi i makim ol wari na hevi em olgeta marit i save bungim. Ol singel i fri moa long bihainim laik bilong ol yet, na em i isi moa long ol i yusim laip bilong ol bilong mekim wok bilong Jehova. Olsem na Baibel i tok: “Man i maritim yangpela meri . . . em i mekim gutpela pasin. Tasol man i no maritim yangpela meri ol i makim bilong en, em i mekim pasin i gutpela moa.” (1 Korin 7:38) Maski sapos yu gat strongpela laik long marit, tingim tingim long bel dispela ol tok bilong Baibel, dispela i ken helpim yu long holim stretpela tingting na kisim amamas long nau.

Ating sampela gutpela pren ol i gat laik long helpim yu, bai ol i tok: “Yu no ken wari, bai yu painim wanpela gutpela poroman.” Na tu, maski wanpela i bin tok nogat long yu, dispela i no min olsem bai yu stap wanpis long olgeta taim. Candace, wanpela yangpela meri Kristen i tok olsem: “Mi trastim Jehova. I no olsem em i mas givim mi wanpela man bilong maritim bilong mekim mi amamas. Tasol mi save olsem em bai givim mi samting mi mas kisim na bai mi no pilim olsem mi sot long wanpela samting.” Stretpela tingting olsem i helpim em long winim dispela bel hevi bilong em.

Nau long dispela taim, pasin bilong prenim wanpela i no save wok gut planti taim, na planti marit tu i save bruk. Sapos yu trastim Jehova na bihainim ol gutpela tok bilong em, em bai helpim yu na yu no bel hevi moa. Yu ken pilim wankain olsem King Devit, em i tok: “Bikpela, yu save long strongpela laik bilong mi. Bel bilong mi i krai nogut, na dispela i no hait long yu. Tasol Bikpela, mi bilip long yu. Bikpela, yu God bilong mi, bai yu yet yu bekim tok long mi.”​​—⁠Song 38:​9, 15.

[Ol Futnot]

[Ol Piksa long pes 28]

Mekim wok long helpim God i givim