Ol Yangpela i Laik Save . . .

Hau Bai Mi Tokim Em Long Filings Mi Gat Long Em?

“Mi laik save long bekim bilong dispela askim, Husat i mas go pas long askim laik? Man i mas kirap mekim o meri?”​— Laura.a

EM MAN yu bin save long em inap sotpela taim tasol o ating yu bin save long em inap longtaim liklik—na yu laik tru long prenim em. Yu gat strongpela tingting olsem em i gat wankain filings long yu olsem yu gat long em, tasol em i pret tru o em i sem long tokim yu. Olsem na yu laik save i gutpela sapos yu go pas na tokaut long laik bilong yu.b

Paslain long yumi stori moa, yumi laik tingim pastaim tingting bilong ol manmeri i stap klostu long yu—ol famili bilong yu na ol narapela long komiuniti. Olsem: Kastam bilong ples i tok wanem? Em wok bilong papamama long painim poroman marit bilong yu?c Tru, yu inap ting olsem painim poroman na marit em samting bilong yu yet long makim. Tasol ol Kristen i wok strong long abrusim pasin em inap bagarapim bel bilong ol narapela. Na ol i laik tingim tu filings bilong famili na ol pren bilong ol.

Long planti kantri long nau, em pasin bilong ol man na meri long poroman wantaim long laik bilong ol yet bilong ol i ken skelim olsem ol i ken maritim dispela poroman o nogat. Yu ting em i rong long meri i go pas na askim laik long man? Long dispela tu, yumi mas tingim filings bilong famili na komiuniti. Dispela pasin bai mekim planti i kirap nogut na toktok planti o olsem wanem?

Wanem sampela tok moa em Baibel i mekim long dispela askim olsem i stret meri i askim laik long man o nogat? Long taim bilong ol man i bin raitim Baibel, wanpela meri i save pret long God, nem bilong em Rut, em i go long wanpela man nem bilong em Boas na askim em long maritim em. Na God Jehova i bin blesim hatwok bilong dispela meri! (Rut 3:​1-​13) Rut i no wanpela yangpela pikinini; em i meri wanpis, man bilong em i dai pinis, olsem na em i bikpela meri inap long em i ken marit. Na tu, i no olsem Rut i laik grisim Boas, nogat. Em i bihainim gut lo bilong God long marit.—Lo 25:​5-​10.

Ating yu bikpela pinis inap long yu ken tingting long marit, na i gat wanpela yangpela man em yu laikim tru. Tasol pasin bilong kamapim laik bilong yu long wanpela man em yu no save em i gat wankain filings olsem bilong yu o nogat, dispela inap kamapim sampela hevi na yu mas skelim gut. Bai em i tingim filings bilong yu o bai em i tok bilas long yu? Nambawan gutpela rot bilong abrusim bikpela sem o bel hevi em long bihainim ol stiatok bilong Baibel.

Bihainim Gutpela Tingting

Sampela taim i no hatwok long yu salim tingting long wanpela man yu laikim tru. Ating yu piksaim long tingting de bilong yu long marit na bihain long en. Tru, dispela kain pasin bilong salim tingting inap mekim yu amamas, tasol em ol tingting nating tasol. Ol dispela kain tingting nating inap kamapim ol strongpela laik long bel em yu no gat rot bilong inapim. Olsem Baibel i tok, “Man i ting long kisim wanpela samting na i wet nating longpela taim, bai em i bel hevi moa yet.” (Sindaun 13:12) Na tu, pasin bilong tingting nating long ol dispela samting inap mekim na yu no inap skelim stret ol samting. Tasol Sindaun 14:15 i tok: “Man i gat gutpela tingting, em i save was gut long ol pasin em i mekim.” Bilong bihainim gutpela tingting man i mas skelim gut ol samting. Olsem wanem yu inap bihainim gutpela tingting long taim yu gat laik long wanpela?

Namba wan samting, yu mas traim long “tingting gut pastaim na mekim samting.” (Sindaun 13:16) Olsem wanpela yangpela meri i tok, “yu no inap laikim tru wanpela man inap long yu save gut long em pastaim.” Paslain long yu larim laik bilong yu long narapela i kamap strong long bel, tingim gut ol pasin bilong em na ol toktok em i save mekim. Skelim ol pasin em i mekim long ol narapela. Wanpela yangpela man i tok: “Givim askim long ol pren bilong em, na long ol manmeri i bikpela pinis husat i save gut long em.” Olsem wanem? Ol lain long kongrigesen Kristen i save tok olsem em i “gutpela man”? (Aposel 16:2) Na tu, wanpela yangpela meri, nem bilong em Isabel, i tok, “raun wantaim ol narapela olsem long grup samting na kisim save long famili bilong em, dispela i ken helpim yu.” Taim yupela i raun long grup, dispela i opim rot long yu ken lukim ol pasin bilong em na dispela i no givim hevi long yu.

Bilong kisim save gut long narapela long kain rot, yu mas lusim bikpela haptaim, na yu mas i gat pasin isi na no ken les kwik. Dispela bai helpim yu long save long ol tingting na pasin bilong em na bai yu ken save filings yu gat long em i wankain yet o i senis. Sindaun 20:11 i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut.” Em nau, i no longtaim ol pasin bilong em bai i kamapim em i wanem kain man tru.

Olsem na bihainim gutpela tingting na no ken hariap tumas long tokim em long ol filings bilong yu. Sapos yu hariap long tokim em na em i orait long en, nogut bihain yu painimaut olsem em i no gutpela poroman marit.d Yu kamapim pinis olsem yu laikim tru em, na nau yu laik lusim em, ating dispela inap bagarapim tru bel bilong em.

Ol Pasin Bilong Yu

Ating dispela yangpela man i wok long skelim tu ol pasin bilong yu. Yu wok long mekim ol samting i kamapim ol gutpela pasin bilong God yu save bihainim? Isabel i tok: “Mi bin lukim olsem planti meri i no save werim klos i stret. Sapos yu laik bai wanpela man i save tingim ol samting bilong spirit i laikim yu, yu mas werim klos i stret.” Maski ol man bilong wokim klos i gat stail i tok wanem, pasin bilong ‘putim ol gutpela klos samting, inap tasol na no ken hambak,’ dispela inap mekim na man i givim bel tru long God inap laikim yu—1 Timoti 2:9.

Baibel i strongim ol yangpela Kristen long ‘mekim gutpela pasin long tok bilong ol.’ (1 Timoti 4:​12) Pasin bilong yu long toktok em bikpela samting i helpim man long save long yu. Bai yu mekim wanem taim rot i op long yu ken toktok wantaim dispela yangpela man? Sapos em i sem, ating bel bilong em i no stap isi. Wanpela yangpela meri nem bilong em Abbie i tok: “Long dispela taim ating bai yu statim toktok bambai yu ken save em bai mekim wanem?”

Bai yu statim toktok olsem wanem? Sapos yu stori long ol samting bilong yu yet i go i go, em bai ting olsem yu save tingim yu yet tasol na yu no gat save. Baibel i tok: “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri.” (Filipai 2:4) I gutpela long tromoi sampela askim i stret long mekim, olsem long sampela samting bilong em yet o ol samting em i save amamas long mekim, na bai em i no ken sem long toktok wantaim yu.

Em i no gutpela long mekim ol tok “giaman” o mekim ol switpela tok nating bilong grisim man. (Song 120:2) Man i ken skelim ol dispela toktok bilong yu na em inap save yu giaman. Na tu, no ken toktok tasol long ol samting em yu ting em i laik long harim. Dispela tok i stret moa yet taim yutupela i stat toktok long sampela bikpela samting, olsem ol mak bilong spirit yu laik winim. Taim yu toktok, bihainim pasin bilong yu yet, kamapim bel bilong yu, na no ken giaman. Long dispela rot tasol yu inap save olsem yutupela i gat wankain ol mak bilong winim o nogat.

Sapos Em i No Laik

Olsem wanem sapos yu mekim olgeta dispela samting, tasol em i no kamapim olsem em i gat laik long yu? Ating sampela wik—o mun—i lus na em i no mekim wanpela samting i kamapim olsem em i laikim yu. Yu ken tingim dispela olsem em i sem tasol na em i mekim? Sapos olsem, yu ken askim yu yet: ‘Sapos em i save sem tru olsem, em i redi long marit? Sapos mi maritim em, em bai go pas olsem het bilong famili, o em i laik bai mi mas mekim?’ (1 Korin 11:3) Narapela askim yu ken skelim em olsem, ‘Tru tru em i sem o em i no gat laik long mi?’ Sapos yu kisim save olsem em i no gat laik long yu, bai yu bel hevi tru long dispela. Tasol sapos yu luksave long dispela samting, dispela bai helpim yu long abrusim sem yu inap kisim long tokim wanpela man olsem yu gat laik long em, tasol em i no gat laik long yu.

Sampela taim yu inap ting em i bin mekim sampela pasin i kamapim klia olsem em i gat laik long yu. Tasol yu pilim olsem em i isi isi tumas long tokaut long dispela samting na em bai kamapim sapos yu kirapim em long mekim. Ating i olsem. Tasol sapos yu laik kirap tokim em, yu mas save olsem dispela inap kamapim sampela hevi. Yu mas tingting gut long ol tok bai yu mekim na long wanem taim i stret long mekim ol dispela tok.

Yu yet i ken skelim, ating i gutpela moa yu ken tokim em olsem yu amamas long em i save tingim yu, na no ken kamapim stret long em olsem yu laikim em tumas. Long wanpela gutpela taim rot i op, yu ken tok tasol olsem yu laik save gut long em. No ken tingting planti sapos toktok bilong yu i no krai gut. Samting i stap tru long bel i winim dispela toktok yet na em inap mekim bikpela samting. Na tingim tu, yu kamapim tasol laik bilong yu long pren wantaim, i no olsem yu askim long maritim em. Tasol em inap kirap nogut long dispela samting, olsem na givim haptaim long em long skelim gut ol tok yu bin mekim.

Sapos yu save gut long dispela yangpela man na yu lukim olsem em i save mekim gutpela pasin na tingim gut ol narapela, yu no ken pret long em bai mekim sampela tok i bagarapim bel bilong yu o i semim na daunim yu. Tasol bai yu mekim wanem sapos em i tok nogat? Na yangpela man i mas mekim wanem taim kain samting olsem i kamap? Stori i kamap bihain bai toktok long ol dispela askim.

[Ol Futnot]

[Piksa long pes 20]

Taim yu wok long skelim pasin bilong em, ating dispela inap mekim na laik bilong yu long em i senis

[Piksa long pes 20]

Sapos yu laikim tru wanpela man, toktok wantaim ol man i bikpela pinis em ol i save long em