I Stret Yumi Yusim Nem Bilong God?
LONG 1902, wanpela nius bilong lotu (The Presbyterian and Reformed Review) i stori long nupela Baibel American Standard bilong 1901, em long dispela Baibel ol i bin stretim tok bilong Baibel King James Version bilong 1611. Dispela nius i tok em i stret long yusim nem bilong God, em Jehova, long Baibel Inglis long olgeta taim, na nius i tok:
“Mipela i no inap save wai na sampela i ting i no stret long yusim nem bilong God. Dispela em i nem tru bilong Bikpela, Em yet i laik bai ol manmeri bilong Em i save long en: pasin bilong rausim nem tru bilong Em na putim biknem bilong em tasol i kamapim bikpela hevi tru. Tru, i gat ol tok pait long wanem pasin bilong kolim dispela nem i stret, na i no gat wanpela i bilip olsem nem ‘Jehova’ i stret olgeta. Tasol long ol man i ritim Baibel long tok Inglis nem Jehova em i nem bilong God; na pasin bilong putim nem Yahwé o ol narapela nem ol saveman i ting em i stret moa, dispela em pasin bilong bihainim tumas ol liklik liklik lo nating. Mipela i ting em i gutpela samting tru olsem nau ol man i ritim Olpela Testamen long tok Inglis ol inap ritim nem ‘Jehova’ na kisim save long olgeta samting ‘Jehova’ i bin mekim bilong helpim ol manmeri bilong em na ol manmeri bilong Em i ting wanem long em.”
Planti narapela Baibel Inglis i yusim nem “Jehova” o ol i sotim dispela nem o raitim long narapela pasin. Na tu, nem tru bilong God i stap long planti Baibel long ol narapela tok ples, olsem tok Hiri Motu, tok Kuanua, tok Motu, na tok Toaripi. Yu inap lukim sampela narapela eksampel i stap hia long dispela pes. God i tokim Moses long nem bilong em, Jehova, olsem: “Dispela em i nem bilong mi i go inap oltaim oltaim, na dispela em i nem ol i mas tingim mi long en i go inap long olgeta taim bihain.” Olsem na yumi no gat tupela tingting—em i stret yumi yusim nem bilong God long nau!—Kisim Bek 3:13-15, NW.
[Ol Piksa long pes 17]
Tok bilong Song 83:18 long narapela narapela tok ples
Tok Songa
Tok Sona
Tok Vietnam
Tok Spen
Tok Hindi
Tok Tagalok
Tok Inglis