Yu Save Kolim Wanem Nem Long God?
Baibel i kolim wanem nem planti taim? Yu save? Yu ting nem bilong Devit? o Ebraham? o Jisas?
Sapos yu bin tingim wanpela bilong ol dispela nem, orait, bai yu kirap nogut long kaunim ol dispela tok hia, long wanem namba wan bikpela nem long Baibel, Baibel i kolim planti taim tru, winim olgeta dispela nem.
WANPELA buk bilong lotu i tok, taim yu tokim wanpela man o meri, yu laikim em, yu kolim nem bilong em. Yu no save tok, “Man, mi laikim yu,” o “Meri mi laikim yu.” Bai yu tok: “Jon, mi laikim yu,” o “Magret, mi laikim yu.” Na bihain dispela buk i tok: “Yu ken kolim wanem nem long God bilong makim olsem em i stap pren bilong yu na yu laikim em?”
Buk hia i mekim bikpela stori liklik long dispela samting, tasol i no kamapim dispela nem God i kolim long em yet. Buk i tok: “Nem yu kolim long God, em laik bilong yu. Yu ken kolim wanem wanem nem yu laikim.” Tasol gutpela sapos i kolim dispela nem God i laikim na i kolim long em yet, a? Dispela nem i stap planti tausen taim insait long Baibel.
Tru God i Gat Nem?
Tru tumas, God i gat nem. Long tok Hibru na tok Grik, em ol i bin raitim Baibel pastaim long dispela tupela tok ples, dispela tok “god” i no makim tasol God tru. Nogat.Olsem long tok Inglis, ol inap kolim dispela tok long ol god giaman. Orait, God tru, em Man bilong wokim olgeta samting, em i mekim wanem bilong makim em i narapela kain long ol god giaman? Em i kolim wanpela nem long em yet. Tasol planti man ol i no save long dispela nem bilong God. Na long nau ol i no save kolim.
Ating long Baibel bilong yu, yu no lukim dispela nem. Olsem wanem na dispela nem i no i stap long Baibel bilong yu? Long wanem, ating ol man i tanim tok bilong en, ol i bin senisim dispela nem na raitim narapela tok. Ating ol i no wanbel wantaim ol man bilong raitim Baibel, em spirit bilong God i bin kirapim ol long raitim dispela nem planti taim long dispela hap bilong Baibel ol i raitim pastaim long tok Hibru, em Olpela Testamen.
Long Baibel Inglis ol man i bin mekim wok long en longtaim (Authorized Version), ol i no putim nem bilong God 7,000 samting taim olsem i stap long Baibel Hibru. Nogat. Ol i putim 4-pela taim tasol, long Eksodas 6:3 na Sam 83:18 na Aisaia 12:2 na 26:4. Long sampela Baibel ol i no putim nem bilong God wanpela wantaim. Ol i rausim nem bilong God long buk bilong em yet!
Tasol ol man bilong tanim tok bilong Baibel ol i save dispela NEM i bikpela samting. Olsem na long sampela Baibel, em ol i senisim nem bilong God na raitim narapela tok, olsem God o Bikpela, ol i raitim dispela tok long bikpela rait, olsem: GOD, BIKPELA. Ol man i gat save, taim ol i kaunim dispela Baibel na lukim dispela bikpela rait, ol i save, long Baibel bilong pastaim nem tru bilong God i stap long dispela hap. Wanpela bikpela buk i tok: “Yumi mas save, long planti Baibel Inglis, ol i no raitim nem Hibru Jehova, ol i senisim na raitim BIKPELA (o GOD), na ol i putim bikpela rait olsem. “Olsem na sapos long Baibel bilong yu ol i raitim tok “BIKPELA” ;olsem, orait yu ken save, dispela tok i senisim nem JEHOVA long tok ples ol i bin raitim Baibel long en long pastaim.—McClintock and Strong’s Cyclopedia, 1981, Vol. IV, p. 811.
Maski yu bin lukim dispela nem bilong Baibel bilong yu o nogat, tasol dispela nem i stap long Baibel ol i raitim pastaim long tok Hibru. Tupela saveman bilong Jemani, em Keil na Delitzsch, tupela i tok, tok “God Jehova” i kamap 20 samting taim long 50 ves long Jenesis sapta 2 na 3. Tupela i tok, dispela tok i makim olsem “Jehova em i God tru.” Commentary on the Old Testament, bilong Keil na Delitzsch, 1973, Volyum I, pes 72, 73.
Insait bilong nem bilong Jisas yet i olsem “Ja [Jehova] i Kisim Bek.” Na long tok “Aleluya,” olsem “litimapim nem bilong God,” ol i sotim nem “Jehova” na raitim olsem “ya.”
Jehova em i nem tru bilong God. EM YET i laik bai yumi kolim dispela nem long em. Sapos yu kolim dispela nem, dispela bai helpim yu long pilim moa yet ol gutpela pasin bilong God na kisim save moa long laik bilong em. Yu laik save olsem wanem dispela samting inap helpim yu olsem? Orait, ol tok i kamap bihain bai stori long dispela samting.
[Blok long pes 3]
Baibel i kolim wanem nem planti taim? Yu save? Yu ting nem bilong Devit? o Ebraham? o Jisas?
Sapos yu bin tingim wanpela bilong ol dispela nem, orait, bai yu kirap nogut long kaunim ol dispela tok hia, long wanem namba wan bikpela nem long Baibel, Baibel i kolim planti taim tru, winim olgeta dispela nem