Yumi Mas Kolim Dispela Nem?
PLANTI man ol i no laik kolim nem holi bilong God. Ol i pilim olsem i no stret ol i kolim. Ol Juda i givim bel long lotu ol i lukim dispela nem long Baibel bilong ol, tasol ol i ting i no stret ol i kolim. Planti manmeri bilong lotu ol i pret long kolim.
Tasol bipo, lain Isrel olgeta ol i bin harim God i kolim nem bilong em. Em i kolim stret na ol i harim. Long Maunten Sainai, taim ol i kisim Tenpela Lo i kam long heven, ol i harim dispela nem 8-pela taim.—Eksodas 20:2-17.
Sapos man bilong tanim tok bilong Baibel bilong yu, em i bin raitim nem bilong God olsem i stap long tok Hibru long pastaim, orait, bai yu lukim namba wan tok bilong dispela Tenpela Lo i olsem: “Mi yet mi Jehova, mi God bilong yupela. Mi bin kisim yupela long Isip, dispela ples bilong wok kalabus, na mi bringim yupela i kam. Yupela mas bihainim mi wanpela tasol. Yupela no ken bihainim ol God giaman.” Na wanpela Baibel (The Living Bible) i tanim dispela tok, olsem:“Mi Jehova, mi God bilong yupela . . . Yupela no ken lotuim narapela god, mi tasol.” (Eksodas 20:2, 3) Ol man bilong tanim tok bilong Baibel bilong yu, sapos ol i no putim nem bilong God long dispela ves, ating ol i putim tok olsem “Bikpela,” na ating ol i raitim olsem “BIKPELA” bilong makim olsem dispela tok i senisim Nem bilong God.
No gat wanpela tok long Baibel i tambuim yumi long kolim dispela nem. God i tok, yumi no ken “kolim nating” nem bilong em, tasol i no olsem yumi no ken kolim. Nogat. Tasol yumi no ken mekim ol samting i save bagarapim nem bilong God.—Eksodas 20:7.
Moses i raitim dispela lo long Baibel, tasol em i no ting yumi no ken kolim nem bilong God. Planti handet taim em i raitim dispela nem long ol 5-pela hap bilong Baibel em i bin raitim (Jenesis, Eksodas, Levitikas, Nambas, Diuteronomi). Moses i no surik long kolim dispela nem. Nogat Moses i tok: “Yupela Isrel, yupela harim! Jehova, God bilong yumi, em wanpela tasol em i God. Na yu mas laikim tru Jehova, God bilong yu, long bel bilong yu olgeta, na long tingting bilong yu olgeta, na long strong bilong yu olgeta.”—Diuteronomi 6:4, 5, NW.
Baibel i no makim olsem dispela nem i stap hait na ol man i no save kolim. Nogat. Baibel i soim yumi, inap planti handet yia ol manmeri i save kolim dispela nem. Baibel i kamapim tok bilong Iv na Iv i kolim dispela nem. (Jenesis 4:1) Moses i tok, Stretpela man Ebraham i kolim nem bilong God, “em i lotu long Yawe, em God i stap oltaim oltaim.” Tasol planti Baibel long nau ol i haitim dispela samting.—Jenesis 21:33.
Taim Ebraham i toktok wantaim king bilong Sodom, em i kolim nem bilong God. Taim Sera i toktok wantaim Ebraham, em i kolim nem bilong God. Planti taim wokboi bilong Ebraham i kolim dispela nem. Jekop na meri bilong em, Resel, na papa bilong Resel, em Leban, olgeta ol i kolim nem bilong God.—Jenesis 14:22; 16:2; 24:35, 42, 44; 28:16; 30:24, 27, 30.
God i tokim Moses, Moses i mas kolim nem bilong God. Taim Moses tupela Eron i toktok wantaim king bilong Isip, em i no bilip, tupela i kolim dispela nem. Na taim king i bekim tok, em i kolim. Em i tok: “Jehova em i husat? Bilong wanem mi mas harim tok bilong em na larim yupela Isrel i go?”—Eksodas 5:1-3, NW; 3:15.
Planti handet yia bihain, ol manmeri i kolim yet nem bilong Jehova; ol i no pret long kolim. Taim ol i toktok wantaim Samyuel, ol i kolim; na taim Samyuel i bekim tok long ol, em i kolim. (1 Samyuel 12:19, 20) Stretpela man King Devit, em i mekim singsing long ai bilong ol manmeri na em i kolim dispela nem, em i tok: “Bai mi autim tok long ol brata bilong mi long wok yu bin mekim. Ol i bung wantaim long lotu na bai mi litimapim nem bilong yu namel long ol. Bai mi tok olsem, ‘Yupela ol lain bilong God, litimapim nem bilong em.’”—Sam 22:22, 23.
Profet Aisaia em i no ting em i mas lusim dispela nem. Nogat. Long hap bilong Aisaia long Baibel dispela nem i stap 400 samting taim.
Aisaia i no tokim ol Juda ol i no ken kolim dispela nem. Nogat. Em i tok: “Yupela ol manmeri, yupela tenkyu long Jehova! Singaut long nem bilong em. Kamapim wok bilong em long ol man. Tokim ol man, em i litimapim nem bilong em i go antap tru. Yupela mekim singsing long Jehova, long wanem, em i bin mekim bikpela wok tru. Long olgeta hap bilong graun ol man i harim dispela tok.”—Aisaia 12:4, 5, NW.
“Taim yu harim ol dispela tok, yu ting dispela bikpela nem i mas i stap hait? na ol man i no ken kolim? o ol i mas senis na kolim narapela tok? Ol man bilong tanim tok bilong Baibel ol i lusim nem long God, ol i no tingim gut dispela nem olsem Ebraham na Sera na Jekop na Moses na Eron na Samyuel na Devit na Aisaia i bin mekim, em ol i save lotu long God na aninit long Em.
Ol profet bilong bihain, ol tu i no haitim dispela nem o ting em i holi tumas na ol i no ken kolim. Ol i no ting ol man bilong raitim Baibel i stap paslain long ol, ol i kranki. Nogat. Ol i no ting ol i mas senisim dispela nem na raitim narapela tok. Taim ol i raitim ol tok bilong Baibel, ol i raitim ol kain tok, olsem: “Harim tok bilong Jehova.” “Jehova bilong bikpela lain, em i God bilong Isrel, em i tok olsem.” “Nambawan Bikpela King Jehova em tok olsem.”—Jeremaia 2:4, NW; 19:15 NW; Esikiel 21:28, NW.
Na ol i no kolim dispela nem long taim bilong lotu tasol. Ol i kolim long ol narapela taim tu. Ol tisa bilong lotu i kolim, na ol man nating tu ol i save kolim. Taim ol i toktok wantaim long ol narapela samting, ol i save kolim. Baibel i tok, Boas i tokim ol wokman bilong em: “Jehova i stap wantaim yupela.” Na ol i save bekim tok olsem: “Jehova i ken mekim gut long yu.”—Rut 2:4.
Ol man bilong painim ol samting bilong bipo i hait insait long graun, ol i painim pinis sampela samting i makim tok bilong Baibel i stret taim Baibel i tok ol man save kolim dispela nem. Long yia 1930 samting ol i painim sampela rait ol man i bin katim long sospen graun, ol i kolim Ol Pas Bilong Lekis. Ol saveman bilong saiens i ting dispela rait em i bilong taim ol Babilon i daunim ol Isrel, olsem yia 607 samting paslain long taim bilong Krais. Long ol dispela rait planti taim i gat tok olsem: “YHWH [Yawe o Jehova] i mas mekim na long dispela de stret bikpela bilong mi i mas harim sampela gutpela tok!”
Ol manmeri bilong ol narapela lain, ol i no bilong lain Isrel, ol tu i save long dispela nem bilong God na ol i save kolim. Ol Gibion i tokim Josua: “Mipela i Kam long wanpela longwe ples, long wanem, mipela i harim stori long Jehova, God bilong yupela. Mipela i harim tok bilong olgeta samting em i bin mekim long Isip.” (Josua 9:9, NW)Nain handet samting yia paslain long taim bilong Krais, birua bilong ol Isrel, em Mesa king bilong Moap, em i tokim ol man long katim dispela nem long wanpela ston. Long 1868 ol man i painim pinis dispela ston na nau i stap long bikpela haus museum long Frans.
Yumi no ken kirap nogut long ol dispela samting. Dispela nem i no wanpela nem i mas i stap hait na ol man i no ken kolim. Nogat. Moses i tokim ol Isrel: “Olgeta lain bilong graun ol i mas save nem bilong Jehova i stap long yupela.” (Diuteronomi 28:l0, NW) Sapos ol man bilong lotuim Jehova i no kolim nem! bilong Em, olsem wanem bai “olgeta graun” inap save nem bilong Em i stap long ol? Olsem na yumi save, ol i bin kolim dispela nem.
Ol manmeri bilong bipo ol i save kolim dispela nem. Ol i litimapim na laikim tumas. Ol i kolim dispela nem taim ol i givim nem long sampela ples o sampela man. Ples Ebraham i laik kilim Aisak long en olsem ofa bilong God, Ebraham, i kolim dispela ples “Yawe i givim” (tok Hibru: “Jehovah-jireh”) (Jenesis 22:14) Na nem bilong ol dispela man i gat nem bilong Jehova o Jah (tok Pisin “aia”) long nem bilong ol, olsem: Hesekaia, Aisaia, Josaia, Niemaia, Obadaia, Sekaraia, Sefanaia. Sampela man long nau, taim ol i givim nem long pikinini ol i kolim nem bilong Jehova long em. Ating gutpela nem bilong God i stap long nem bilong yu! Olsem wanem? Nem bilong yu “Joel”? Insait bilong dispela nem i olsem: “Jehova em i God.” Olsem wanem? Nem bilong yu “Jonatan”? Insait bilong dispela nem i olsem: “Jehova i givim” Insait bilong nem “Josua” i olsem: “Jehova i kisim bek yumi.” Sapos nem bilong yu “Jon,” insait bilong dispela nem i olsem: “Jehova i mekim pasin marimari.”
Olsem na maski sampela man i ting nem bilong God i holi tumas na ol i no ken kolim, na sampela ol i laik sakim, tasol dispela nem i stap long Baibel. Em i stap insait long ol dispela nem, em ol man bilong bipo i save kolim. Ol dispela man bilong bipo i save long nem holi bilong God, JEHOVA, na taim ol i beten o lotu o toktok wantaim, ol i save kolim dispela nem.
Tasol olsem wanem long Nupela Testamen? Nem Jehova i stap insait long ol nem olsem Jisas na Jon, na long dispela tok “Aleluya” (“litimapim nem bilong God”). Tasol bilong wanem yumi no lukim planti taim long dispela hap bilong Baibel ol i bin raitim pastaim long tok Grik, olsem Nupela Testamen? Orait, nau yumi ken stori long dispela bikpela askim.
[Ol piksa long pes 6]
OL I KOLIM NEM BILONG GOD
Ebraham
Sera
Resel
Devit
Samyuel
[Rait long pes 7]
Bambai ol man i ken save, yu, nem bilong yu Jehova, yu wanpela tasol yu Nambawan Bikpela bilong olgeta hap graun.—Sam 83:18, NW.