Mipela i Gutpela Pren Tasol—O Mi Gat Laik Long Em? Hap 1

TAIM YU RITIM DISPELA HET TOK, WANTU YU TINGIM WANPELA?

YES → YU MAS RITIM DISPELA STORI. ATING OL TOK BILONG EM BAI HELPIM YU.

NOGAT → YU MAS RITIM TU DISPELA STORI. EM BAI HELPIM YU NA GUTPELA PASIN PREN BILONG YU WANTAIM MAN O MERI BAI I STAP STRET NA I NO KAMAPIM HEVI.

Raitim tok olsem, tru o i no tru, long dispela tok:

Mi no ken i stap pren bilong wanpela man o meri, inap mi tingting long marit orait nau mi ken prenim wanpela.

․․․․․ TRU ․․․․․ I NO TRU

Tingim: Jisas i no tingting long marit, tasol em i bin stap gutpela pren bilong sampela meri. (Matyu 12:46-50; Luk 8:1-3) Na i wankain long singel man Timoti, long wanem, Pol i tokim, em long “mekim tok long ol yangpela meri olsem yu save mekim long ol susa bilong yu na mekim long pasin i klin tru.”—1 Timoti 5:1, 2.

Pol i luksave olsem Timoti i save raun lukim ol narapela narapela kongrigesen, na ating em i bungim planti yangpela meri. (Mak 10:29, 30) Yu ting i gat rong long Timoti i bung na toktok wantaim ol? Nogat. Timoti i no tingting yet long marit, olsem na em i mas putim sampela mak em yet i mas bihainim na bai em i no ken kirap long laikim, o tok gris, o pilai long filings bilong ol meri.—Luk 6:31.

Olsem wanem long yu? Yu redi tru long marit?

Sapos YES ⇨ Pasin bilong i stap gutpela pren wantaim wanpela, ating dispela bai opim rot long yu painim wanpela man o meri yu inap maritim.—Sindaun 18:22; 31:10.

Sapos NOGAT ⇨ Yu mas putim sampela mak long yu yet i ken bihainim. (Jeremaia 17:9) Yu ting em isi long stap gutpela pren bilong wanpela man o meri na em tasol? Nogat! Niaa i gat 18 krismas, em i tok: “I hatwok long i stap olsem gutpela pren tasol, long wanem, i hatwok long save yu mas mekim gutpela pasin long em inap long wanem mak.”

Bilong wanem yu mas putim ol mak em yu yet i mas bihainim? Sapos yu no mekim olsem, yu inap bagarapim bel bilong yu yet o bagarapim bel bilong narapela. Skelim as na i olsem.

SAMTING TRU TRU I SAVE KAMAP: Taim yu kirap pinis long laikim wanpela man o meri tasol yu no gat tingting long maritim em, orait dispela inap bagarapim bel bilong yutupela wantaim. Kelli i gat 19 krismas, em i tok: “Dispela samting i kamap long mi tupela taim. Wanpela taim mi yet i kirap laikim wanpela mangi, na narapela taim wanpela mangi i kirap laikim mi. Long dispela tupela taim, mipela tripela i pilim nogut long samting i bin kamap, na i kam inap long nau mi no inap lusim tingting long dispela samting.”

Tingim ol dispela samting:

● Long wanem ol taim i gutpela long bung na toktok wantaim ol narapela yangpela? Long wanem ol taim i no gutpela long bung na toktok wantaim ol?

● Bilong wanem em i no savetingting long raun o toktok wantaim seim man o meri long olgeta taim? Dispela man o meri bai kisim wanem tingting long yu? Na yu bai kisim wanem tingting long em?

“Sampela taim, mi giamanim mi yet na tok olsem, ‘Mitupela i gutpela pren tasol. Em olsem brata bilong mi.’ Tasol taim mi lukim em i toktok wantaim narapela meri, dispela i bagarapim filings bilong mi—mi ting olsem em i mas toktok o raun wantaim mi tasol.”—Denise.

Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.”—Sindaun 22:3.

SAMTING TRU TRU I SAVE KAMAP: Taim yu kirap pinis long laikim wanpela man o meri tasol yu no gat tingting long maritim em, dispela inap bagarapim gutpela pasin pren bilong yutupela. Kati i gat 16 krismas, em i tok: “Mi na wanpela mangi i save teks i go i kam. Tasol i no longtaim na em i kirap mekim tok gris long mi na mitupela i save teksim narapela narapela long olgeta de. Wanpela taim em i tokim mi olsem, em i laikim mi na em i laik bai mi kamap gelpren bilong em. Tasol mi no gat laik long em. Taim mi tokim em long dispela, gutpela pasin pren bilong mitupela i pinis na bihain mipela i no toktok moa wantaim.”

Tingim ol dispela samting:

● Long stori bilong Kati, filings bilong husat i bagarap, na bilong wanem? Tupela inap long mekim wanem na pasim hevi long kamap?

● Taim man o meri i salim teks i go i kam, olsem wanem em inap givim tingting kranki long narapela olsem em i laik i stap olsem boipren o gelpren bilong em?

“Sampela taim mi pasim mi yet long no ken lusim bikpela haptaim wantaim wanpela mangi. Em i orait long stap gutpela pren bilong ol mangi, tasol mi no laik bagarapim pasin pren bilong mipela sapos mi kirap laikim wanpela.”—Laura.

Baibel i tok: “Man i gat gutpela tingting, em i save was gut long ol pasin em i mekim.”—Sindaun 14:15.

Poin em olsem: I no gat rong long bung na toktok wantaim ol narapela yangpela. Tasol sapos yu no gat tingting long marit, yu mas putim sampela mak long yu yet i mas bihainim.

LONG NARAPELA STORI BILONG “OL YANGPELA I LAIK SAVE” . . .

Taim yu kirap pinis long laikim wanpela man o meri tasol yu no gat tingting long maritim em, dispela inap bagarapim gutnem bilong yu—kisim save long wanem rot dispela samting inap kamap.

Bilong lukim sampela atikol moa bilong “Ol Yangpela i Laik Save,” lukim Web-sait www.watchtower.org/ype

[Futnot]

[Blok/Piksa long pes 14]

BAI YU MEKIM WANEM?

STORI TRU: “Mi teksim wanpela pren bilong mi i stap longwe inap 1,500 kilomita. Mipela i teksim narapela narapela wanpela taim long olgeta wik. Mi no gat laik long em, na mi ting em tu i no gat laik long mi. Tasol wanpela taim em i salim teks olsem: ‘Hei lewa, mi misim yu stret. Yu mekim wanem nau?’ Man! Mi kirap nogut! Mi tokim em olsem, mi tingim em i gutpela pren bilong mi, na mi no gat laik long em. Em i salim teks na tok ‘Noks bisi.’ Bihain long dispela em i no teks moa long mi.”—Janette.

● Sapos yu no gat tingting yet long i gat wanpela boipren o gelpren, bai yu mekim wanem sapos yu kisim teks mesis kain olsem ol teks Janette i bin kisim?

● Sapos yu wanpela mangi, yu ting ol teks mesis dispela mangi i salim long Janette, em i gutpela? Bilong wanem yu ting olsem?

● Long tingting bilong yu yet, yu ting em i isi moa long kirap laikim wanpela sapos yutupela i teks i go kam, winim pasin bilong lukim em na toktok wantaim em? Bilong wanem yu ting olsem?

[Blok long pes 15]

TOKTOK WANTAIM PAPAMAMA

Kisim tingting bilong papamama bilong yu long ol askim i stap aninit long liklik het tok “Tingim ol dispela samting.” Tingting bilong ol i narapela long tingting bilong yu? Sapos olsem, bilong wanem? Yu inap kisim wanem gutpela save long tok bilong ol?—Sindaun 15:22.

[Blok/Ol Piksa long pes 15]

TOK BILONG OL WANLAIN

Joshua—Sapos olgeta taim yu toktok o raun wantaim seim man o meri, em i isi tru long yu kirap laikim em.

Natasha—Sapos yu laik i stap gutpela pren bilong wanpela man o meri tasol olgeta taim yupela i save mekim ol samting wantaim, yupela inap kirap laikim narapela narapela.

Kelsey—Maski pastaim yutupela i stap gutpela pren, tasol sapos olgeta taim yupela i save toktok o raun wantaim, em i isi moa long filings bilong yutupela i senis. Man na meri inap i stap gutpela pren, tasol bilong mekim olsem ol i mas bihainim savepasin na skelim gut ol samting.

[Piksa long pes 14]

Taim yu kirap pinis long laikim wanpela man o meri tasol yu no gat tingting long maritim em, dispela inap kamapim hevi