Sapta 29

I Orait Mitupela i Wokabaut Wantaim?

LONG planti kantri yangpela man na meri i save wokabaut wantaim. Ol i amamas tasol long mekim na i no olsem tupela i laik marit. Tupela i save pasim tok long i go long wanpela gutpela haus kaikai na kaikai wantaim, o mekim sampela samting olsem. O tupela i amamas tasol long poroman na toktok wantaim. Sampela yangpela i save poroman wantaim long olgeta taim, na tupela i tok ol i poroman nating tasol. Tupela i wokabaut wantaim na i no gat was bilong ol.

Long taim bilong ol man bilong Baibel i no gat dispela pasin. Na em i no pasin bilong Papua Niugini tu. Olsem na ating yu laik save​—i orait yu mekim olsem o nogat?

Sampela Samting i Subim Ol long Mekim

Ating yu lukim sampela wanlain bilong yu ol i save wokabaut wantaim na yu no laik bai ol i ting yu narapela kain, olsem na yu ting yu mas bihainim dispela pasin bilong ol. O ating sampela poroman bilong yu i wok long pulim yu long mekim. O yu lukim sampela man bilong narapela kantri ol i mekim, o yu lukim sampela Papua Niugini i mekim, em ol i bihainim pasin bilong ol Yuropin, olsem na yu ting i orait yu tu yu mekim. Sampela taim papamama o sampela famili bilong meri i tingting long kisim mani na planti samting bilong skin na ol i subim pikinini meri bilong ol long poromanim wanpela man i gat bikpela mani o bikpela wok. Wanpela yangpela meri, nem bilong em Meri-an, em i stori long anti i laik kirapim em long poromanim wanpela yangpela man i gat ka na planti mani. Meri-an i tingim tok bilong anti na em i tingting olsem: ‘Sapos mi sakim dispela yangpela man, ating bai mi lus long sampela gutpela samting. Tasol olsem wanem? I gutpela mi wokabaut wantaim em o nogat?’

Sampela yangpela i laik painim poroman em i ken laikim ol na mekim gut long ol. Ol i pilim ol i sot long dispela na ol i kirap bihainim dispela pasin bilong wokabaut wantaim. Wanpela yangpela meri i gat 18 krismas, nem bilong em An, em i tok: “Mi no pas gut wantaim papamama, olsem na mi poromanim wanpela yangpela man em i save laikim mi, long wanem mi laik bai mi gat wanpela poroman mi inap pas gut wantaim em na toktok gut wantaim em.”

Tasol maski i gat ol dispela samting inap kirapim yu long bihainim dispela pasin, yu no ken larim ol dispela samting i subim yu long bihainim! Tru long sampela kantri, long lain Kristen sampela man singel na meri singel i save raun wantaim, tasol i no bilong amamas tasol​—em bilong painim poroman bilong marit. Tasol sapos tupela i no tingting long marit, orait i no gat as na tupela i poroman wantaim, a? Sapos yu mekim olsem, hevi inap painim yu. Wanem ol hevi?

Ol Samting Nogut i Kamap long Dispela Pasin

Yu yangpela yet na ating strongpela laik long mekim maritpasin i kamap long bel bilong yu. I no gat rong long dispela. Dispela samting i save painim ol yangpela taim ol i laik kamap man tru o meri tru.

Tasol dispela em i nupela samting long ol na ol i no lain yet long bosim dispela laik bilong bel. Olsem na sapos yangpela man na meri i wokabaut wantaim, samting nogut inap kamap​—nogut bel bilong tupela i kirap na tupela i no inap bosim skin moa na daunim dispela laik i kamap long bel bilong tupela na tupela i trabel. Tru, yu save long ol lo bilong God i tambuim ol singel long mekim maritpasin, na ating yu laik tru long i stap stret. (Lukim Sapta 23.) Tasol sapos yu meri na yu wok long poromanim wanpela man, o yu man na yu wok long poromanim wanpela meri, laik bilong skin long mekim maritpasin bai wok long kamap strong moa; maski yu laik o nogat, skin i save wok olsem. (Lukim pes 232, 233.) God i wokim yumi olsem! Olsem na taim yu yangpela yet, sapos yu poroman olsem, orait trabel inap painim yu, long wanem yu no inap bosim gut skin. Sori tru! Planti yangpela i no tingting gut na ol i bihainim dispela pasin bilong wokabaut wantaim, na bikpela hevi i bin painim ol.

Wanpela yangpela man i tok, “Mi kirap wokabaut wantaim wanpela yangpela meri, . . . pastaim mitupela i no holim han o kis. Mi amamas tasol long raun wantaim em na toktok wantaim em. Tasol em i save mekim sampela samting i kamapim bel bilong em olsem em i laikim mi. Taim em i sindaun klostu long mi, em i save sindaun klostu tru. Bihain mitupela i kirap long holim han na kis. Dispela i mekim na bel bilong mi i kirap strong tru. Dispela i paulim tingting bilong mi na mi no amamas long toktok tasol wantaim em​—oltaim mi laik i stap wantaim em na holim em na kis long em. Mi laik mekim mekim moa yet! . . . Sampela taim mi sem long dispela pasin mi mekim.”

Olsem na pasin bilong wokabaut wantaim i kirapim planti yangpela long mekim pasin pamuk. Sampela lain i bin skelim tingting bilong sampela yangpela, na planti yangpela meri (87 pesen) na yangpela man (95 pesen) ol i ting, taim man na meri i wokabaut wantaim, maritpasin i bikpela samting long tupela. Tasol planti yangpela meri (65 pesen) na yangpela man (43 pesen) ol i tokaut olsem taim ol i wokabaut wantaim ol i bin mekim maritpasin, maski ol i no gat laik long mekim!

Yangpela meri Loreta i gat 20 krismas em i tok: “Mitupela i poroman wantaim long olgeta taim na dispela i kirapim moa yet bel bilong mipela. I no longtaim na mipela les long kis tasol na narapela i kirap long holim skin bilong narapela. Tingting bilong mi i bagarap stret, long wanem bel i kotim mi na mi sem long pasin nogut mi mekim. Mipela mekim i go na bihain man ya i laik bai mi slip wantaim em. . . . Tingting bilong mi i paul olgeta, long wanem mi no laik mekim dispela pasin, tasol mi tingting planti, nogut em i lusim mi. Mi bel hevi stret!”

Tru sampela yangpela i poroman wantaim na tupela i no mekim pasin pamuk; sampela i pilai pilai, tasol ol i no pamuk. Tasol wanem samting bai kamap sapos bel bilong yu i kirap pinis na yu no marit yet bambai yu gat stretpela rot bilong inapim dispela laik bilong skin? Bai yu painim taim stret, a? Bai tingting na bel i bagarap olgeta.

Taim Em i No Laikim Yu Moa

Wanpela yangpela man i tingting planti na em i tok: ‘Pastaim mi laikim tru Kati na mi grisim em long mekim sampela samting em i ting i no stret long mekim. Nau mi no laikim moa Kati na bel bilong mi i gat tok, long wanem mi bin grisim em long mekim ol dispela samting em i no laik mekim. Mi laik lusim em, tasol mi no laik bagarapim bel bilong em. Bai mi mekim wanem?’ Em nau, yangpela man i ken mekim wanem? Na dispela samting i bin painim Kati, sapos kain samting olsem i painim yu, bel bilong yu bai olsem wanem?

Dispela kain bel hevi i save painim planti yangpela. Planti yangpela i kirap long wokabaut wantaim, tasol i no longtaim na ol i bruk. Taim tupela yangpela i kirap long wokabaut wantaim, planti ol i no save marit​—tupela i save bruk na bikpela bel hevi i kamap.

Taim yu yangpela, tingting bilong yu i no strong yet. Yu no save tru wanem samting yu laikim na wanem samting yu no laikim; na yu no save gut long ol samting yu laik mekim long bihain. Ating nau bel bilong yu i kirap na yu laikim wanpela man (o meri), tasol tumora yu les long em na yu no laikim em moa. Tasol olsem wanem sapos yu larim bel bilong yu i kirap long laikim dispela man (o meri) na dispela laik i kamap strong? Sapos bihain em i no gat laik moa long yu na yutupela i bruk, ating bel bilong yu bai bagarap stret. Sampela man i bin skelim ol samting i kirapim ol yangpela long kilim i dai skin bilong ol, na ol dispela man i tok, planti i mekim olsem long wanem ol i kros wantaim pren bilong ol o pren i no laikim ol moa na bel bilong ol i bagarap.

Mi Redi long Marit?

God i tokim ol yangpela: “Yupela yangpela manmeri, yupela i mas amamas long taim yupela i yangpela yet. Yupela i ken bihainim tingting na laik bilong yupela yet.” Na tru planti yangpela i save bihainim tingting na laik bilong ol yet. Taim ol i bihainim dispela rot, pastaim ating ol i kisim amamas, tasol bihain ol i kisim hevi. Olsem na Baibel i tok moa, ‘Yu no ken bihainim pasin i mekim yu i tingting planti o i givim pen long bodi bilong yu.’ (Saveman 11:​9, 10) Sapos yu bihainim sampela pasin i mekim yu i “tingting planti,” o dispela pasin yu mekim i “givim pen long bodi,” olsem bagarapim skin bilong yu, bai yu no i stap amamas, a?

Orait, olsem wanem long pasin bilong yangpela man na meri i wokabaut wantaim? Dispela inap bagarapim bel bilong yangpela man o meri na bai em i tingting planti, na dispela inap bagarapim skin bilong em tu. Long wanem tupela i no redi long marit na tupela i raun nating wantaim bilong amamas tasol. Olsem na yu ken lukim ol dispela askim hia, na dispela bai helpim yu long save bilong wanem i no gutpela sapos yangpela man na meri i wokabaut wantaim:

Sapos mi bihainim dispela pasin, dispela bai helpim mi long kisim gutpela tingting na pasin bilong bosim gut bel o nogat? Taim yangpela man na meri i wokabaut wantaim, tupela i no save poromanim ol narapela manmeri; tupela yet i save poroman wantaim. Tasol sapos yu poromanim ol narapela manmeri, dispela bai helpim yu, a? (Lukim 2 Korin 6:​12, 13.) Yangpela meri Susan em i tok: “Mi kirap long poroman wantaim sampela meri long kongrigesen ol i gat bikpela krismas, winim mi, na ol i kamap pren tru bilong mi. Ol i sot long poroman, na mi sot long gutpela tingting, olsem na narapela i helpim narapela. Mi save go lukim ol na dring kopi wantaim ol, na mipela save toktok wantaim na stori na lap. Ol i kamap pren tru bilong mi na mipela i stap olsem yet.”

Sapos yu gat kain kain poroman​—olsem ol lapun, na yangpela, na singel, na marit, na man, na meri​—bai yu lain long i stap isi na toktok gut wantaim kain kain man na meri. Tasol sapos yu poroman oltaim wantaim wanpela yangpela tasol, bai yu no lain long mekim olsem, na yu inap pundaun tu, a? Na sapos yu poroman wantaim sampela marit, dispela bai helpim yu long kisim stretpela tingting long marit​—bai yu save, marit i no samting bilong amamas tasol; i gat sampela hevi bilong en tu. Na bihain bai yu inap skelim gut na painim wanpela gutpela poroman bilong marit long em, na bai yu gat gutpela tingting olsem bilong man o meri i bikpela pinis na yu inap mekim gut wok bilong yu olsem man o meri marit i mas mekim. (Sindaun 31:10) Yangpela meri Geil em i tingim ol dispela samting na em i tok: “Mi no redi yet long marit na lukautim famili. Mi no save gut yet long ol tingting na laik bilong mi, na i gat planti wok bilong God mi tingting long mekim pastaim. Olsem na mi no gat wok long poroman wantaim wanpela man.”

Olsem wanem sapos mi bagarapim bel bilong narapela? Sapos yu poromanim wanpela yangpela na yutupela i no gat bikpela krismas inap long yupela i marit, na bihain yu no laikim em moa o em i no laikim yu moa, em nau bel bilong wanpela bai bagarap stret. Orait, yu ting i stret sapos yu poromanim wanpela man (o meri) bilong kisim amamas tasol na bihain yu les long em na lusim em na dispela i bagarapim bel bilong em?​—Lukim Matyu 7:12.

Papamama i tok wanem? Planti yangpela i no save long hevi inap kamap long pasin ol i mekim, tasol papamama i save, long wanem bipo ol tu i yangpela. Ol i save pinis long ol hevi inap kamap taim yangpela man na meri i poroman wantaim. Olsem na sapos papamama i no orait long yu bihainim dispela pasin, orait yu no ken bikhet long tupela. (Efesus 6:​1-3) Ol i save, yu no redi yet long marit.

Bai mi inap bihainim lo bilong Baibel? Ol man i bikpela pinis i gat hatwok long bosim laik bilong skin, tasol taim yu yangpela i hatwok moa yet. Olsem na yu mas askim skin bilong yu: Sapos mi bihainim dispela pasin bilong wokabaut wantaim, mi inap i stap stret? Em, yu mas tingim gut dispela samting, nogut yu pundaun.

Planti yangpela i tingim ol dispela askim na ol i kisim tingting wankain olsem bilong Meri-an (em pastaim yumi bin stori long em). Em i tok: “Mi pasim tok pinis long bel olsem mi no ken bihainim pasin bilong ol narapela meri na wokabaut wantaim wanpela yangpela man. Mi laik wet inap long taim mi redi long marit na mi lukim pinis wanpela gutpela man mi laik marit long em.”

Em, taim yu skelim pasin bilong yangpela man na meri i wokabaut wantaim, yu mas tingim dispela tok bilong Meri-an. Em bikpela samting tru.

Toktok Wantaim long Ol Dispela Askim

◻ Olsem wanem long dispela pasin bilong yangpela man na meri i wokabaut wantaim?

◻ Wanem samting i subim sampela yangpela long bihainim dispela pasin bilong wokabaut wantaim?

◻ Bilong wanem i no gutpela sapos yangpela man na meri i wokabaut wantaim?

◻ Yangpela inap mekim wanem bilong abrusim ol hevi i save kamap long dispela pasin?

◻ Maski yangpela man na meri i tok ol i poroman nating tasol, wanem ol hevi inap kamap long dispela rot?

[Rait long pes 231]

“Mipela les long kis tasol na narapela i kirap long holim skin bilong narapela. . . . bel i kotim mi na mi sem long pasin nogut mi mekim. . . . na bihain man ya i laik bai mi slip wantaim em”

[Rait long pes 234]

‘Mi laik lusim Kati, tasol mi no laik bagarapim bel bilong em. Bai mi mekim wanem?’

[Blok/Piksa long pes 232, 233]

Inap Wanpela Yangpela Man na Meri i Stap ‘Poroman Nating Tasol’?

Planti yangpela man na meri i save poroman wantaim, tasol ol i tok ol i poroman nating tasol, i no olsem narapela i gat laik long narapela o tupela i tingting long marit. Nogat. Wanpela yangpela man i gat 17 krismas, nem bilong em Gregori, em i tok, ‘Mi save laik long toktok wantaim ol yangpela meri na kamapim tingting bilong mi long ol, long wanem ol i save putim yau long ol tok bilong mi na ol i pilim ol hevi na tingting bilong mi.’ Na sampela yangpela ol i tok, taim yangpela man i poroman nating wantaim meri, dispela i save helpim ol long kisim sampela gutpela pasin moa, na ol i lain long toktok gut wantaim ol man na meri.

Baibel i tok yangpela man i mas tingim ‘ol yangpela meri olsem ol i susa bilong em, long klinpela pasin tru.’ (1 Timoti 5:2) Sapos ol yangpela i bihainim dispela lo bilong Baibel, ol inap i stap stret na bihainim ‘klinpela pasin tru.’ Aposel Pol em i singel, tasol sampela sista long kongrigesen Kristen ol i stap olsem gutpela poroman bilong em. (Lukim Rom 16:​1, 3, 6, 12.) Taim em i raitim pas long ol Filipai, em i stori long tupela meri na em i tok, “Tupela i bin poroman gut wantaim mi long wok bilong autim gutnius.” (Filipai 4:3) Krais Jisas tu i bin poroman wantaim sampela meri na em i amamas long toktok wantaim ol, tasol em i no gat sampela tingting long ol. Nogat. Em i mekim stretpela pasin tru long ol. Planti taim tupela meri, em Marta na Maria, ol i singautim em i go long haus bilong ol na kaikai wantaim ol, na Jisas i amamas long toktok wantaim tupela meri hia.​—Luk 10:​38, 39; Jon 11:5.

Tasol planti yangpela man na meri, ol i tok ol i ‘poroman nating wantaim,’ tasol long bel bilong ol ol i gat laik long poroman bilong ol, o ating yangpela man i laik pren nating wantaim meri na holim em, na meri i no ken ting olsem em i laik maritim em. Na sampela yangpela meri tu i gat dispela kain tingting. Tasol dispela tingting i no gutpela. Bel bilong tupela inap senis na nau narapela i gat laik long narapela. Olsem na ol yangpela i mas was gut long dispela pasin. Wanpela dokta, nem bilong em Marion Hilliard, em i tok: ‘Sampela taim tupela i poroman nating wantaim, na wantu bel bilong tupela i kirap na ol i no inap daunim.’

Yangpela man Maik em i pilim pinis dispela samting. Em i gat 16 krismas na em i poroman wantaim wanpela yangpela meri i gat 14 krismas tasol. Maik i tok, “Nau mi save pinis, sapos oltaim wanpela yangpela man na meri i poroman wantaim, i no inap tupela i stap olsem poroman nating tasol. Oltaim mitupela i poroman wantaim na isi isi mi wok long laikim em na em tu i wok long laikim mi. I no longtaim na mi gat bikpela laik tru long em, na em tu i gat wankain tingting long mi, na dispela laik i stap yet long mitupela.” Tasol tupela i no gat bikpela krismas na bai ol inap marit, olsem na tupela i gat hatwok long daunim bel bilong tupela, na dispela i givim hevi long tupela.

Sapos yangpela man na meri i poroman wantaim long olgeta taim, dispela inap kamapim bikpela hevi tru long tupela. Wanpela yangpela man i poroman nating wantaim wanpela yangpela meri, na wanpela taim meri i kamapim sampela hevi bilong em na yangpela man i laik mekim gut bel bilong meri. Tasol i no longtaim na bel bilong tupela i kirap na narapela i holim narapela na mekim ol kain pasin olsem. Bihain bel bilong tupela i gat tok long dispela samting na narapela i bel nogut long narapela. Na sampela yangpela, pastaim ol i poroman nating wantaim, tasol bihain bel bilong tupela i kirap na ol i mekim maritpasin. Wanpela nius (Psychology Today) i bin skelim dispela pasin bilong ol yangpela man i poroman nating wantaim yangpela meri na dispela nius i tok, ‘Planti (inap 49 pesen), pastaim ol i poroman nating tasol, na bihain ol i kirap mekim maritpasin.’ Na dispela nius i tok, inap 31 pesen bilong ol i tok, insait long dispela mun em ol man bilong nius i bin toktok wantaim ol, ol i bin slip wantaim poroman bilong ol.

Tasol ating bai yu tok, ‘Mi no gat laik o tingting long poroman bilong mi, na mi save pinis, bihain tu mi no inap kisim dispela kain tingting long em​—mitupela i poroman nating tasol.’ Tru nau yu gat dispela kain tingting. Tasol olsem wanem long bihain? Tingting bilong yu inap senis, a? Na olsem Baibel i tok, “Sapos man i ting, save bilong em yet inap helpim em long mekim olgeta samting, orait em i no gat gutpela tingting.” (Sindaun 28:26) Bel bilong yumi i save giamanim tru yumi na yumi ting yumi gat gutpela tingting, tasol nogat; bel i gat sampela laik nogut. Na poroman bilong yu i gat wanem tingting long yu? Yu no save gut long dispela samting, a?

Wanpela buk (The Friendship Factor, bilong Alan Loy McGinnis) i givim gutpela tok long ol yangpela, em i tok, “Yu no ken bilip long bel bilong yu na yu ting yu inap bosim bel; nogat.” Olsem na yu mas lukaut long dispela kain pasin. I no gutpela sapos yu raun wantaim wanpela yangpela tasol na holim han samting na i go long ples i no gat man. Bung wantaim ol narapela yangpela i gat was bilong ol. Sapos yu yangpela meri, orait taim yu bel hevi long wanpela samting, yu no ken kamapim dispela hevi long wanpela yangpela man; na yu yangpela man, yu no ken kamapim ol hevi bilong yu long yangpela meri​—kamapim long papamama o sampela manmeri moa ol i bikpela pinis na ol inap helpim yu.

Na sapos wanpela yangpela man (o meri) i gat laik long yu, tasol yu no gat laik long em, orait yu ken mekim wanem? Yu no ken giamanim em. Baibel i tok yu “mas mekim tok tru” long em na tokim em olsem yu no gat tingting long em. (Efesus 4:25) Sapos em i holim yet dispela tingting, orait gutpela sapos yu klia long em na stap longwe long em. Baibel i tok: “Man i gat gutpela tingting, em i save olsem, hevi i laik kamap long em na em i abrusim.”​—Sindaun 22:3.

[Ol Piksa long pes 227]

I gat sampela samting i save subim yangpela man na meri long poroman wantaim

[Piksa long pes 228]

Sapos yangpela man na meri i wokabaut wantaim, narapela inap subim narapela long mekim samting em i no laik mekim

[Piksa long pes 229]

Sapos yangpela i stap wantaim planti poroman na em i no poromanim wanpela tasol, em inap kisim amamas na i no ken pundaun

[Piksa long pes 230]

Sampela yangpela i tok ol i poroman nating, tasol taim tupela i bruk, bikpela bel hevi i kamap