Yu Ting Ol Witnes Bilong Jehova i Gat Lo Long Deitim Wanpela?

Ol Witnes Bilong Jehova i bilip olsem ol stiatok na lo i stap long Baibel inap helpim yumi long mekim ol gutpela disisen we i amamasim God na i bilong helpim yumi. (Aisaia 48:17, 18) Yumi no kamapim ol dispela stiatok na lo, tasol yumi save bihainim long i stap bilong yumi. Skelim hau sampela bilong ol i stret long sait bilong deitim wanpela man o meri.a

• Marit em samting bilong i stap oltaim. (Matyu 19:6) Bikos ol Witnes Bilong Jehova i tingim pasin bilong deitim narapela olsem samting wanpela i mekim na bai em i marit, mipela i tingim olsem em i bikpela samting.

• Pasin bilong deitim wanpela man o meri em bilong ol lain husat i bikpela pinis na ol inap long marit. Ol dispela lain “i no yangpela tumas,” o ol i abrusim pinis taim we laik bilong mekim maritpasin i save kamap strong.​—1 Korin 7:36.

• I no gat samting i mas pasim lain husat i deitim narapela long marit. Long ai bilong kot sampela manmeri i divos, tasol long ai bilong God ol i no stap fri long marit gen, bikos pasin pamuk em wanpela risen tasol bilong divos.​—Matyu 19:9.

• Ol Kristen husat i laik marit i mas bihainim lo long makim wanpela wanbilip tasol bilong maritim. (1 Korin 7:39) Ol Witnes Bilong Jehova i tingim dispela lo olsem em i no makim man husat i rispektim tasol bilip bilong yumi, nogat, em i makim wanpela husat i autim na bihainim dispela bilip olsem wanpela baptais Witnes. (2 Korin 6:14) Oltaim God i save stiaim ol wokman bilong em long maritim tasol wanpela husat i gat wankain bilip. (Stat 24:3; Malakai 2:11) Dispela lo i bilong helpim yumi, olsem ol wok painimaut bilong nau i soim.b

• Ol pikinini i mas bihainim tok bilong papamama bilong ol. (Provep 1:8; Kolosi 3:20) Long ol pikinini i stap yet wantaim papamama, dispela lo i makim tu olsem ol i mas bihainim tok bilong papamama long makim wanpela man o meri ol bai deitim. Ating dispela inap makim pikinini man o meri i mas i gat hamas krismas na bai em i ken deitim wanpela na wanem ol samting ol i ken mekim.

• I gat ol stiatok bilong Baibel, olsem na wan wan Witnes yet i mas makim olsem em bai deitim wanpela o nogat na em bai deitim husat. Dispela i stret wantaim stiatok: “Olgeta wan wan i mas mekim ol samting em ol yet i gat wok long mekim.” (Galesia 6:5) Maski i olsem, bilong deitim wanpela, planti i kisim edvais bilong ol Witnes husat i bikpela pinis na i gat laik tru long helpim ol.​—Provep 1:5.

• Planti samting ol manmeri i mekim long taim ol i deitim wanpela inap kamapim ol bikpela sin. Olsem, Baibel i tokim yumi long sakim pasin pamuk. Dispela i no makim tasol man na meri i slip wantaim, nogat, em i makim tu ol narapela pasin i no klin namel long man na meri husat i no marit, olsem pilai long sem bilong narapela o putim sem long maus o as bilong narapela. (1 Korin 6:9-11) Na tu, ol i mas sakim ol pasin we i stret long ol marit tasol i mekim na bai ol i no insait long pasin pamuk, em “pasin i no klin” na God i no laikim. (Galesia 5:19- 21) Stori bilong ol samting long maritpasin na ol “tok doti” tu em ol samting Baibel i tambuim.​—Kolosi 3:8.

• Bel i save tingting oltaim long mekim pasin giaman. (Jeremaia 17:9) Bel i ken kirapim man long mekim samting em i save olsem i no stret. Bilong tingting i no ken giamanim ol, tupela husat i pren i mas sakim pasin bilong ol yet tasol i stap long ples i no gat narapela na bai ol i sakim ol traim. Ol i ken mekim ol samting i soim olsem ol i was gut long rot bilong bung wantaim ol narapela long wanpela grup o makim wanpela long raun wantaim ol. (Provep 28:26) Ol singel Kristen husat i laik painim wanpela bilong maritim i mas luksave long ol hevi pasin bilong prenim wanpela long rot bilong ol deiting sait i save kamapim, moa yet long prenim wanpela ol i no save gut long em.​—Buk Song 26:4.