“Narakain Nus!”

EM TOK planti man i save mekim taim ol i lukim wanpela kain monki man i gat traipela longpela nus i hangamap.a Nus bilong sampela monki man i save gro i go longpela inap 18 sentimita. Nus bilong em i hangamap i kam karamapim maus, olsem na taim em i laik kaikai em i save subim nus i go long sait na em i ken kaikai! Sapos nus bilong yu i kain olsem, em bai hangamap i kam daun klostu long bros bilong yu.

Longpela nus bilong dispela monki man i save helpim em olsem wanem?b Ol man i gat kain kain tingting long dispela. Ating nus bilong em i save rausim sampela hat bilong bodi bilong em o i save mekim krai bilong nek i strong moa. O em i stap olsem samting bilong tok lukaut long ol narapela monki man. us bilong en i save solap na i go ret taim em i kros o taim em i amamas. Ating narapela as i olsem, nus bilong em i save kirap ol monki meri long laikim em! Tasol nus bilong em i gat planti wok bilong en em yumi no klia gut long en.

Ol i Gat Traipela Bel

Dispela monki—man na meri wantaim—i gat traipela bel. Bel bilong ol inap holim bikpela kaikai. Olsem na monki man na monki meri wantaim ol i luk olsem ol i gat bel! Wai na bel bilong ol i traipela?

Olsem bel bilong bulmakau, bel bilong dispela monki i pulap long ol kain kain gras na lip samting, na ol binatang. Ol binatang insait long bel bilong en i save bruk brukim ol samting em i kaikai, na tu, dispela binatang i save kilim i dai ol posin i stap long ol lip samting em i bin kaikai. Bel bilong en i gutpela, olsem na em inap kaikai ol lip, ol prut i no swit, ol bin samting, ol lip bilong diwai pam, na ol narapela lip nabaut—em ol kain kaikai we ol narapela monki i no inap long kaikai.

Tru em i ken kaikai ol dispela samting, tasol i gat sampela samting em i mas was gut long en. Em i no ken kaikai ol switpela prut, long wanem, ol dispela prut i no save stap longpela taim long bel. Ol inap mekim bel bilong en i solap, na ating dispela inap givim bikpela pen long em na em inap i dai.

Ol dispela monki i gat narapela kain bel, olsem na taim ol i kaikai, i mas i gat bikpela haptaim bilong kaikai i ken i go daun gut na bel i ken mekim wok bilong en. Olsem na bihain long ol i kaikai bikpela kaikai pinis, ol i mas slip, sampela taim ol i slip inap planti aua, na bihain ol i kirap na kaikai gen.

Ol i Save Bung Bung

Long olgeta taim maski ol i kaikai o malolo, ol i save bung bung na stap. Monki man em i stap bos bilong famili bilong em we i gat 8-pela monki meri na ol pikinini. Taim ol pikinini monki man i kamap bikpela, papamama bilong ol i save larim ol i go na ol pikinini i ken lukautim ol yet. Ol dispela pikinini man i save go bungim ol narapela pikinini man na ol i kamapim wanpela grup we i gat wanpela o tupela bikpela monki man i insait long en. Sapos yu no save, bai yu ting olsem ol i wanpela lain meri bilong wanpela monki man.

Ol dispela monki i gat narapela kain pasin—ol lain monki meri i save go bung wantaim ol narapela lain monki meri, moa yet long ol apinun taim ol i save go long wara. Long kain taim olsem, wanpela monki man bai soim strong bilong em sapos em i lukim olsem narapela monki man i gat laik long ol meri bilong em. Dispela monki—hevi bilong em inap olsem 20 kilo—em bai sanap long tupela han lek bilong em na redi i stap, maus bilong em i op bikpela na em bai lukluk strong long birua bilong em. Wanpela buk (Proboscis Monkeys of Borneo) i tok: “Sapos dispela i no pretim birua bilong em, wantu dispela monki man bai singaut wantaim na kalap long wanpela diwai i go long narapela diwai, na planti taim em i kalap long han bilong ol diwai we i drai pinis na i bruk na pairap strong.” Na tupela bai pait, tasol dispela i save kamap wan wan taim tasol.

Dispela buk i tok moa: “Lukluk bilong ol dispela monki i narapela kain, na tu, ol i save mekim kain kain nois.” Ol i save krai, singaut, na kros, ol i save mekim olsem long ol apinun taim ol i bung klostu long wara. Ol mama monki ol i save bisi long givim susu long ol bebi bilong ol na klinim ol. Taim tudak i kamap, ol bai go antap long ol longpela diwai klostu long wara na slip antap long ol dispela diwai.

Lek Bilong Ol i Olsem Pato!

Narapela samting long dispela monki i narapela kain em lek bilong em i olsem bilong pato. Lek bilong ol i helpim ol long swim gut, na tu, i helpim ol long wokabaut gut antap long ol diwai mangro. Taim yu tingim mangro, ating bai yu tingim tu pukpuk. I gat planti pukpuk i stap long dispela hap we ol monki i save stap long en. Ol dispela monki i save mekim wanem na bai pukpuk i no ken kaikaim ol?

Wanpela pasin ol i bihainim, em ol i save go isi insait long wara na swim isi isi tru i go na ol i no pairapim wara. Tasol sapos wara i no op tumas, ol i save bihainim narapela pasin. Ol i save go antap long diwai, na ran i go kalap long han bilong narapela diwai, na kalap i go olsem 9 mita, na go insait long wara, na swim hariap i go long hapsait bilong wara. Na ol mama tu i save karim bebi wantaim na mekim olsem. Sampela taim bikpela lain monki bai kalap i go long wara na swim hariap i go long narapela sait! Tasol ol pukpuk i no namba 1 birua bilong ol.

Dispela Monki i Wok Long Pinis

Ol saveman i tok olsem namba bilong dispela monki i go daun inap sampela tausen na dispela namba i wok yet long go daun—planti taim ol man i as bilong dispela. Ol i wokim paia, katim ol diwai, katim bikbus bilong planim oil pam, na planti turis i kam insait long kantri. Narapela samting em ol man i save painim abus. Sampela man i save kilim dispela animal olsem spot. Ol narapela i save kilim bilong kaikai o yusim olsem marasin. Ol dispela animal i save slip long ol diwai klostu long wara, olsem na em i isi long ol man i kilim ol i dai. Long wanpela hap, planti taim ol man i save kam long moto na kilim ol dispela monki, olsem na insait long 5-pela yia, namba bilong ol monki long dispela hap i go daun inap 50 pesen!

Ol man bilong lukautim ol animal i tokaut olsem dispela monki i wok long pinis, na long Borneo i gat lo i lukautim ol. Tasol dispela bai wok gut o nogat, bai yumi wet na lukim. Sapos dispela animal i no stap moa, dispela em samting nogut, long wanem, dispela kain monki em i narakain animal we i gutpela long save long en! Na tu, sapos ol i putim dispela animal insait long banis, em i no inap stap longpela taim.

Wankain olsem ol narapela animal i wok long pinis, dispela monki i gat traipela longpela nus, em tu i wok long pinis. Planti ol narapela animal ol tu i pinis olgeta. Tasol gutpela samting tru em olsem, God i tingting pinis long em bai bosim dispela graun, pinisim ol man nogut, na skulim lain bilong em long stretpela rot bilong lukautim dispela graun. (Sindaun 2:21, 22) God Jehova i tok promis olsem: “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”—Aisaia 11:9.

[Ol Futnot]

[Piksa long pes 10]

Dispela monki i gat longpela nus na traipela bel

[Kredit Lain]

© Peter Lilja/age fotostock

[Piksa long pes 11]

Nus bilong monki man i hangamap i kam daun long maus bilong em. Em i mas subim i go long sait taim em i laik kaikai

[Kredit Lain]

© Juniors Bildarchiv/Alamy

[Piksa long pes 12]

Long olgeta taim maski ol i kaikai o malolo, ol i save bung bung na stap

[Kredit Lain]

© Peter Lilja/age fotostock