Ol Yangpela i Laik Save . . .
Poromanim Ol Wanskul—Inap Long Wanem Mak?
“Ol pikinini long skul i save stori long ol amamas ol i bin kisim wantaim long wiken. Mi pilim olsem mi stap wanpis olgeta.”—Michelle.a
“Sampela taim mi lukim sampela yangpela i bung wantaim na mi save tingting, ‘Man, ol i save poroman gut wantaim. Mi tu laik poroman wantaim ol.’ ”—Joe.
“Mi no gat hevi long kamap pren bilong ol narapela long skul. Em i isi stret long mi. Dispela em i hevi bilong mi.”—Maria.
YU SAVE stap wantaim ol wanskul bilong yu inap planti aua long olgeta de. Yu save bungim ol wankain bel hevi na hatwok olsem ol, na yu save inapim ol wankain mak. Ating long sampela rot, yu pilim olsem planti samting bilong yu na ol wanskul i wankain, winim papamama, ol bratasusa, o ol wanbilip Kristen bilong yu. Olsem na ating yu gat laik long poromanim ol. Olsem wanem? I gat rong long mekim olsem? Sampela samting nogut inap kamap long dispela rot? I gutpela long poromanim ol wanskul inap long wanem mak?
Yu Mas i Gat Ol Pren
Olgeta man i mas i gat ol pren—em ol man ol i ken malolo wantaim long gutpela taim na kisim helpim long ol long taim bilong hevi. Jisas i bin i gat ol pren, na em i amamas long bung wantaim ol. (Jon 15:15) Taim em i laik i dai long diwai pos, gutpela pren bilong Jisas, em Jon “dispela disaipel em i laikim tumas,” em i stap klostu. (Jon 19:25-27; 21:20) Yu mas i gat ol dispela kain pren—em ol man i stap gut long yu long gutpela taim na long taim nogut. Wanpela savetok bilong Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.”—Sindaun 17:17.
Yu inap ting yu bin painim kain poroman olsem long skul, wanpela klasmeit yu save poroman gut wantaim em. Yupela i gat interes long ol wankain samting na yupela i amamas long toktok gut wantaim. Em i no wanbilip bilong yu, tasol long tingting bilong yu em i no wanpela ‘poroman nogut.’ (1 Korin 15:33) Tru, sampela yangpela husat i no gat wankain tingting olsem yu long ol tok bilong Baibel, ol i save bihainim sampela gutpela stiatok. (Rom 2:14, 15) Tasol yu ting dispela i makim olsem yu mas pas gut wantaim ol?
Ol Kristen i Laik Bung Wantaim Ol Arapela
Ol Kristen tru i no save sakim ol man i no bilip. Nogat. Ol i save inapim wok bilong ol long “mekim olgeta lain manmeri i kamap disaipel,” na ol Kristen i save toktok wantaim ol man na meri bilong olgeta kain skin, lotu, na ples. (Matyu 28:19) Ol i no save stap longwe long ol neiba, wanwok, o wanskul. Nogat. Ol Kristen i save tingim tru ol arapela.
Aposel Pol i stap gutpela piksa long dispela samting. Em i save long pasin bilong toktok wantaim “olgeta kain man” maski ol i no gat wankain bilip olsem em. Tru, Pol i no tingting long poromanim ol. Nogat. Em i tok: “Mi save mekim dispela olgeta wok bilong mekim gutnius bilong Jisas i kamap strong, bai mi tu mi ken kisim ol gutpela samting Bikpela i redim pinis bilong givim long ol man i bilip long gutnius.”—1 Korin 9:22, 23.
Yu ken bihainim pasin bilong Pol. Mekim gutpela pasin long ol wankrismas bilong yu. Lain long toktok gut wantaim ol. Ating sampela wanskul bilong yu i wok long painim gutpela tok bilong Baibel, em samting yu holim pinis. Tingim stori bilong yangpela meri Kristen, nem bilong em Janet. Tisa i tokim em na ol klasmeit bilong em long raitim sotpela stori long olgeta wan wan sumatin, na bihain wan wan sumatin inap ritim ol tok i stori long em. Wanpela pepa Janet i kisim i tok: “I luk olsem yu save stap amamas tru long olgeta taim. Plis tokim mipela long as bilong dispela!”
Olsem dispela ekspiriens i kamapim, ating sampela klasmeit bilong yu i redi long kisim save long ol bilip bilong yu. Sapos yu mekim pasin pren long ol kain lain olsem, dispela inap helpim yu. Dispela bai opim rot long yu ken stori long ol bilip bilong yu. Larim ol klasmeit i kamapim tingting bilong ol tu, na putim gut yau long tok ol i mekim. Dispela save yu kisim long pasin bilong toktok gut wantaim ol wankrismas bilong yu bai helpim yu long bihain taim yu kirap mekim wok mani na ol wankain samting inap painim yu long ples wok. Sapos yu mekim pasin pren long skul na long ples wok, dispela bai helpim yu long “givim biknem long dispela tok yumi save autim, em tok tru bilong God, em Man bilong kisim bek yumi.”—Taitus 2:10.
Ol Man i No Wanbilip
Pasin bilong mekim gutpela pasin long klasmeit i no wankain olsem pasin bilong pas gut tru wantaim em. Pol i tok: “Ol haiden ol i narakain, olsem na yupela i no ken pas wantaim ol na wok bung wantaim ol.” (2 Korin 6:14) Bilong pas gut wantaim wanpela, yu mas i gat wankain tingting olsem em na laik long winim ol wankain mak. Yu no inap mekim olsem wantaim wanpela husat i no bihainim ol wankain bilip na lo olsem yu. Sapos yu pas gut wantaim wanpela klasmeit i no wanbilip, dispela inap pulim yu i go insait long sampela pasin nogut o bagarapim ol gutpela pasin bilong yu.
Maria i lainim dispela samting taim hevi i painim em. Pasin bilong em long toktok na amamas i mekim na ol wanskul bilong em i laik kamap pren bilong em, tasol em i hatwok long save i stret long prenim ol inap long wanem mak. Em i tok: “Mi amamas long ol boi na ol gel i save laikim mi. Olsem na isi isi mi wok long i go insait moa long ol pasin bilong dispela graun.”
Olsem Maria, ating yu hatwok long luksave long wanem taim yu pas tumas wantaim wanpela i no wanbilip bilong yu. Tasol yu inap abrusim ol hevi, taim yu makim klia husat bai yu no pas tumas wantaim na husat inap kamap gutpela pren bilong yu. Olsem wanem yu ken mekim dispela?
Rot Bilong Makim Ol Gutpela Pren
Olsem mipela i stori pinis long en, Jisas i pas gut wantaim sampela man taim em i stap long graun. Em i mekim olsem long rot bilong bihainim stretpela pasin na em i toktok long ol samting bilong lotu i tru. Sapos ol man i save bihainim tok na wokabaut bilong em, ol i go klostu long em. (Jon 15:14) Olsem: Taim fopela man i harim tok bilong Jisas, ol i pilim tru tok bilong em na ol i “lusim olgeta samting bilong ol, na ol i bihainim Jisas.” Ol dispela man—Pita, Andru, Jems, na Jon—ol i kamap gutpela pren bilong Jisas.—Luk 5:1-11; Matyu 4:18-22.
Tok na pasin bilong Jisas i kamapim klia olsem bilip bilong em i bikpela samting long em na em i strong long holimpas dispela bilip. Ol man husat i no laikim Jisas na ol tok bilong em ol i lusim em, na Jisas i larim ol i go.—Jon 6:60-66.
Olsem: Wanpela yangpela man i pilim tru tok bilong Jisas. Baibel i tok: “Jisas i lukluk long em na i laikim em tumas.” Tasol taim man ya i kisim save long ol samting Jisas i laik bai ol pren bilong em i mas mekim, em i lusim Jisas na “i go.” I luk olsem dispela man i gutpela man na Jisas “i laikim em tumas.” Tasol Jisas i laik bai ol pren bilong em i mas mekim sampela samting. (Mak 10:17-22; Matyu 19:16-22) Olsem wanem long yu?
Ating yu save poroman gut wantaim wanpela klasmeit. Tasol askim yu yet: ‘Dispela man i redi long bihainim ol tok bilong Jisas? Em i laik kisim save long Jehova, em dispela man Jisas i tok yumi mas lotuim em?’ (Matyu 4:10) Taim yu toktok wantaim ol klasmeit bilong yu na yu wok long bihainim ol stiatok bilong Baibel, bekim bilong ol dispela askim bai i stap ples klia.
Em i gutpela long mekim gutpela pasin long ol klasmeit bilong yu, wankain olsem Jisas i bin mekim pasin pren long olgeta kain man. Tasol Jisas i poromanim tasol ol man i laikim tru Papa bilong em long heven, em Jehova. Yu inap mekim wankain pasin. ‘Yu mas wokabaut stret’ long skul, na long gutpela pasin toktok wantaim ol narapela long ol bilip bilong yu. Na bikpela samting tru, yu mas poromanim ol gutpela man tasol.—1 Pita 2:12.
SAMTING BILONG TINGIM
◼ Wanem ol samting nogut inap kamap sapos bihain long skul yu raun wantaim wanpela klasmeit i no wanbilip? Yu ting i gutpela long mekim olsem?
◼ Taim yu ritim pinis dispela stori, yu ting yu save pas tumas wantaim wanpela klasmeit? Sapos olsem, yu inap mekim wanem?
[Futnot]
a Mipela i senisim sampela nem.
[Blok/Ol Piksa long pes 29]
How Can I Make Real Friends?
Dispela vidio, em ol Witnes Bilong Jehova i wokim, i gat ol inteviu ol i mekim long ol yangpela bilong Amerika, Itali, Frans, na Spen. Vidio i stap long 36 tok ples.
[Piksa long pes 29]
Ating sampela klasmeit i laik kisim save long ol bilip bilong yu