“Yupela i Stap Pren Bilong Mi”
“Sapos yupela i mekim olsem mi bin tokim yupela, orait yupela i stap pren bilong mi.”—JO. 15:14.
1, 2. (a) Ol pren bilong Jisas, ol i bin i gat wanem kain sindaun? (b) Bilong wanem em i bikpela samting long yumi stap pren bilong Jisas?
OL MAN i sindaun wantaim Jisas long wanpela rum antap, ol i bilong kain kain sindaun. Tupela brata wanblut, em Pita na Andru, bipo ol i man bilong painim pis. Matyu, bipo em i man bilong kisim takis—em wanpela wok ol Juda i no save laikim. Sampela, olsem Jems na Jon, ating ol i bin save long Jisas, long wanem, ol i kamap bikpela wantaim. Ol arapela, olsem Nataniel, ating em i bin save long Jisas insait long sampela yia tasol. (Jo. 1:43-50) Tasol long dispela nait bilong Pasova, olgeta yet i bin bilip tru olsem Jisas em dispela Mesaia God i bin tok promis long salim i kam, na em i Pikinini Bilong God i gat laip. (Jo. 6:68, 69) Ating ol i pilim gutpela tru taim ol i harim Jisas i tokim ol: “Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren’ ” bilong mi.—Jo. 15:15.
2 Tok Jisas i bin mekim long ol gutpela aposel bilong em, dispela tok i go tu long olgeta Kristen God i bin makim, em ol i stap long nau, na tu, i go long ol poroman bilong ol, em ol “arapela sipsip.” (Jo. 10:16) Maski yumi kam long wanem wanem sindaun, yumi tu inap i stap olsem ol pren bilong Jisas. Em i bikpela samting long yumi stap pren bilong Jisas, long wanem, sapos yumi stap pren bilong em, bai yumi stap pren bilong Jehova tu. Bilong i go klostu long Jehova, pastaim yumi mas i go klostu long Krais. (Ritim Jon 14:6, 21.) Orait, yumi mas mekim wanem bilong kamap pren bilong Jisas na stap yet olsem ol pren bilong em? Paslain long yumi stori long dispela samting, yumi ken skelim pasin bilong Jisas long i stap olsem gutpela pren, na kisim sampela skul long pasin ol disaipel i mekim taim Jisas i mekim gutpela pasin pren long ol.
Jisas i Stap Olsem Gutpela Pren
3. Jisas i gat nem long mekim wanem pasin?
3 Saveman King Solomon i tok: “Ol maniman i gat planti pren.” (Snd. 14:20) Dispela em pasin bilong ol man bilong graun em ol i gat sin, ol i laik kamap pren bilong ol arapela bambai ol i ken kisim ol samting long ol, na i no bilong ol i ken givim samting long ol narapela. Jisas i no bihainim dispela pasin. Em i no larim namba o planti mani bilong ol man i stiaim em long kamap pren bilong ol, nogat. Tru, Jisas i bin laikim wanpela yangpela maniman na i singautim em long bihainim em. Tasol Jisas i bin tokim em long salim ol samting bilong em na mani em i kisim em i mas givim long ol rabisman. (Mk. 10:17-22; Lu. 18:18, 23) Jisas i no kisim nem olsem man bilong i stap pren bilong ol maniman na ol man i gat biknem, nogat, em i gat nem olsem man bilong i stap pren bilong ol man i no gat nem na ol man em ol arapela i luk daun long ol.—Mt. 11:19.
4. Olsem wanem yumi save olsem ol pren bilong Jisas ol i gat ol pasin kranki?
4 Ol pren bilong Jisas i gat ol pasin kranki. Sampela taim Pita i no save bihainim tingting bilong God long skelim ol samting. (Mt. 16:21-23) Taim Jems na Jon i askim Jisas long givim bikpela namba long ol insait long Kingdom, dispela i soim olsem ol i gat strongpela laik long kisim biknem. Dispela pasin bilong tupela i hatim bel bilong ol arapela aposel. Planti taim ol i tok pait long husat bai kisim biknem. Tasol Jisas i no les long stretim tingting bilong ol pren bilong em, na em i no kros hariap long ol.—Mt. 20:20-28.
5, 6. (a) Bilong wanem Jisas i stap yet olsem pren bilong 11-pela aposel? (b) Bilong wanem Jisas i no stap moa olsem pren bilong Judas?
5 Jisas i stap yet olsem pren bilong ol dispela man i gat sin, tasol dispela i no makim olsem em i larim ol i mekim ol pasin kranki o em i no luksave long ol pasin kranki bilong ol, nogat. Em i lukim tingting i stap long bel bilong ol na ol gutpela pasin bilong ol. Olsem: Long taim we bel na tingting bilong Jisas i bagarap olgeta long ol samting bai painim em, Pita, Jems, na Jon ol i slip na ol i no was i stap bilong helpim Jisas. I gat as na Jisas i no amamas long ol, tasol maski i olsem, em i luksave long gutpela tingting i stap long bel bilong ol, olsem na em i tok: “Tru, bel em i gat laik bilong mekim samting, tasol bodi em i no gat strong.”—Mt. 26:41.
6 Tasol long Judas Iskariot, Jisas i no stap moa olsem pren bilong em. Maski i luk olsem Judas i stap pren bilong Jisas, Jisas i luksave pinis olsem dispela pren bilong em i larim tingting nogut i kamap long bel bilong em. Judas i kamap pren bilong ol pasin bilong dispela graun, olsem na em i mekim em yet i kamap birua bilong God. (Jem. 4:4) Olsem na Jisas i bin salim Judas i go na bihain em i tokim ol arapela 11-pela gutpela aposel olsem em i stap pren bilong ol.—Jo. 13:21-35.
7, 8. Jisas i mekim wanem bilong soim ol pren bilong em olsem em i laikim ol?
7 Jisas i no tingim tingim ol pasin kranki bilong ol gutpela pren bilong em, nogat, em i mekim ol samting bilong helpim ol. Olsem: Em i bin beten long Papa bilong em i ken lukautim ol taim ol i karim hevi. (Ritim Jon 17:11.) Jisas i tingim skel bilong strong bilong ol. (Mk. 6:30-32) Na em i amamas long tokim ol long tingting bilong em, na tu, em i amamas long harim na pilim tingting bilong ol.—Mt. 16:13-16; 17:24-26.
8 Taim Jisas i stap laip em i mekim ol samting bilong helpim ol pren bilong em, na dai bilong em tu i bin helpim ol. Tru, em i save olsem em i mas givim laip bilong em olsem ofa bilong inapim stretpela lo bilong Papa bilong em. (Mt. 26:27, 28; Hi. 9:22, 28) Tasol pasin laikim tu i kirapim Jisas long givim laip bilong em. Em i tok: “Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.”—Jo. 15:13.
Ol Disaipel i Mekim Wanem Taim Jisas i Mekim Gutpela Pasin Pren Long Ol?
9, 10. Ol manmeri i mekim wanem taim Jisas i mekim gutpela pasin long ol?
9 Jisas i laikim tru ol narapela na em i givim bikpela hap taim na ol samting bilong em long helpim ol. Long dispela as, ol manmeri i go klostu long em na ol i amamas long helpim em tu. (Lu. 8:1-3) Long ol samting i bin painim Jisas, em inap tok: “Yupela i mas givim ol samting long ol arapela, na bai God i givim ol samting long yupela. Em bai i skelim gutpela moa long yupela, na em bai i pulapim tru, na sakim i go daun, na pulapim moa yet, inap long ol samting i kapsait, na givim long yupela. Skel yupela i save givim long ol arapela man, long dispela skel tasol God bai i bekim long yupela.”—Lu. 6:38.
10 Tru, sampela i bin bihainim Jisas, long wanem, ol i laik kisim tasol ol samting long em. Tasol ol dispela pren giaman i lusim Jisas taim ol i no kliagut long wanpela tok em i mekim. Mobeta ol i bin bilip tasol long Jisas, tasol ol i no mekim olsem. Wantu ol i kisim tingting kranki na ol i sakim em. Tasol ol aposel i no mekim olsem, ol i stap gut long em. Planti taim ol samting i bin traim pasin bilong ol long stap pren bilong Krais, tasol ol i traim bes bilong ol long sapotim Jisas long gutpela taim na taim nogut. (Ritim Jon 6:26, 56, 60, 66-68.) Long laspela nait bilong Jisas long graun, em i kamapim olsem em i laikim tru ol pren bilong em, na em i tok: “Taim ol samting i kamap bilong traim mi, yupela i bin i stap wantaim mi, na yupela i no lusim mi.”—Lu. 22:28.
11, 12. Jisas i mekim wanem bilong strongim bel bilong ol disaipel? Ol i mekim wanem?
11 Jisas i tok amamas long ol disaipel bilong em long ol i stap gut long em, na i no longtaim bihain long dispela ol i lusim em. Inap sotpela taim, ol i larim pasin bilong pret long man i daunim pasin bilong ol long laikim Krais. Tasol Jisas i fogivim ol gen. Bihain long em i dai na i kirap bek, em i kamap long ol na i tokim ol gen olsem em i stap yet olsem pren bilong ol. Na tu, em i givim ol wanpela wok holi—long mekim “olgeta lain manmeri” i kamap disaipel na autim tok bilong em “long olgeta hap bilong graun.” (Mt. 28:19; Ap. 1:8) Ol disaipel i mekim wanem?
12 Ol disaipel i givim bel olgeta long autim tok bilong Kingdom. Holi spirit bilong Jehova i helpim ol na ol i autim tok long olgeta hap bilong Jerusalem. (Ap. 5:27-29) Maski ol inap lusim laip bilong ol, dispela i no pasim ol long bihainim tok bilong Jisas long kamapim ol disaipel. Sampela yia bihain long ol i kisim tok bilong Jisas long mekim dispela wok, aposel Pol inap tok olsem ol i bin autim gutnius long “olgeta manmeri i stap long graun.” (Kl. 1:23) Tru tumas, ol dispela disaipel i tingim tru pasin pren bilong ol wantaim Jisas!
13. Ol disaipel bilong Jisas i larim ol tok bilong em i helpim ol olsem wanem?
13 Ol man husat i kamap disaipel, ol tu i larim ol tok bilong Jisas i mekim sampela samting long i stap bilong ol. Planti i mas mekim ol bikpela senis long wokabaut na pasin bilong ol. Ol man husat i kamap nupela disaipel, bipo sampela bilong ol i bin mekim pasin sodom, pasin adaltri, dring spak, o stil. (1 Ko. 6:9-11) Ol arapela i mas senisim pasin na tingting nogut ol i gat long ol man bilong narapela lain. (Ap. 10:25-28) Ol i bin bihainim tok bilong Jisas. Ol i rausim olpela pasin bilong ol na kisim nupela pasin. (Ef. 4:20-24) Ol i kisim save long “tingting bilong Krais,” na kliagut long en na ol i kirap bihainim tingting na pasin bilong em.—1 Ko. 2:16.
Yumi Stap Pren Bilong Krais Long Nau
14. Jisas i tok promis long mekim wanem long taim pasin bilong “dispela graun i laik pinis”?
14 Planti Kristen long taim bilong ol aposel, ol i bin bungim Jisas o lukim em bihain long em i bin kirap bek. Tasol yumi, nogat. Orait, olsem wanem yumi inap kamap pren bilong Krais? Wanpela rot em long bihainim tok i kam long lain gutpela wokboi, em ol brata bilong Jisas em spirit bilong God i bin makim ol, na ol i stap yet long graun. Jisas i tok promis olsem taim pasin bilong “dispela graun i laik pinis,” em bai makim dispela wokboi long “bosim olgeta samting bilong en.” (Mt. 24:3, 45-47) Long nau, bikpela lain manmeri em ol i laik kamap pren bilong Krais, ol i no hap bilong dispela lain wokboi. Pasin bilong ol long bihainim tok i kam long gutpela wokboi, olsem wanem dispela i mekim sampela samting long pasin bilong ol long stap pren bilong Krais?
15. Wanem samting bai makim olsem man i olsem sipsip o meme?
15 Ritim Matyu 25:31- 40. Jisas i kolim ol lain husat i insait long lain gutpela wokboi olsem ol brata bilong em. Long tok piksa bilong wasman i tilim ol sipsip na meme, Jisas i tok klia olsem pasin yumi mekim long ol brata bilong em, i olsem yumi mekim long em yet. Em i tok klia olsem pasin man i mekim long “wanpela bilong ol dispela brata bilong [em] i no gat nem liklik,” dispela bai kamapim klia olsem dispela man i olsem sipsip o meme. Olsem na ol man husat i tingting long kisim laip long graun, nambawan samting ol i mekim bilong soim olsem ol i laik stap pren bilong Krais, em long sapotim lain gutpela wokboi.
16, 17. Long wanem rot yumi inap soim olsem yumi stap pren bilong ol brata bilong Krais?
16 Sapos yu tingting long kisim laip long graun aninit long Kingdom Bilong God, orait, olsem wanem yu inap soim olsem yu stap pren bilong ol brata bilong Krais? Bai yumi skelim 3-pela rot. Namba 1 rot em long givim bel tru long insait long wok bilong autim tok. Krais i tokim ol brata bilong em long autim gutnius long olgeta hap bilong graun. (Mt. 24:14) Tasol, hap lain bilong ol brata bilong Krais i stap yet long graun, ol bai i hatwok long inapim dispela wok sapos ol i no kisim helpim long ol poroman bilong ol, em ol arapela sipsip. Taim ol arapela sipsip i insait long wok autim tok, ol i helpim ol brata bilong Krais long inapim dispela wok holi bilong ol. Krais na lain wokboi i gat gutpela tingting ol i pilim tru dispela gutpela pasin pren bilong ol arapela sipsip.
17 Namba 2 rot we ol arapela sipsip inap helpim ol brata bilong Krais, em long givim kontribiusen bilong sapotim wok bilong autim tok. Jisas i kirapim ol disaipel bilong em long mekim wok long “mani nogut bilong dispela graun” long kamap pren bilong em wantaim Jehova. (Lu. 16:9) Tasol dispela i no makim olsem yumi mas baim Jisas o Jehova long kamap pren bilong tupela, nogat. Taim yumi yusim ol samting bilong yumi bilong helpim wok bilong Kingdom, yumi soim olsem yumi stap pren bilong tupela na yumi laikim tru ol. I no olsem yumi tok long maus tasol, nogat, “yumi . . . givim bel bilong yumi tru long ol na mekim gutpela pasin long ol.” (1 Jo. 3:16-18) Yumi helpim dispela wok taim yumi insait long wok bilong autim tok, na givim mani bilong helpim wok konstraksen na wok bilong stretim ol ples bung bilong yumi, na wok bilong autim tok long olgeta hap bilong graun. Maski yumi givim planti mani o nogat, Jehova wantaim Jisas i pilim tru pasin bilong yumi long amamas long givim samting.—2 Ko. 9:7.
18. Bilong wanem yumi mas bihainim tok kaunsel bilong Baibel em ol elda long kongrigesen i givim?
18 Namba 3 rot we yumi soim olsem yumi stap pren bilong Krais, em long taim yumi bihainim tok ol elda bilong kongrigesen i givim bilong stiaim yumi. Spirit bilong God i makim ol dispela man, long wanem, Krais i stap het bilong kongrigesen na em i stiaim kongrigesen long rot bilong holi spirit. (Ef. 5:23) Aposel Pol i tok: “Yupela i mas bihainim tok bilong ol na i stap aninit long ol.” (Hi. 13:17) Sampela taim, ating bai i hatwok long yumi bihainim tok kaunsel bilong Baibel em ol elda i givim yumi. Ating yumi save long sampela pasin kranki bilong ol, na dispela inap mekim na yumi no kisim stretpela tingting long tok kaunsel ol i givim. Tasol, Krais em i Het bilong kongrigesen, em i amamas long mekim wok long ol dispela man i gat sin. Olsem na pasin yumi mekim bilong daun long wok bos bilong ol, dispela bai mekim sampela samting long pasin bilong yumi long stap pren bilong Krais. Taim yumi amamas long bihainim tok bilong ol elda na yumi no tingim tasol ol pasin kranki bilong ol, yumi kamapim long ples klia olsem yumi laikim tru Krais.
Hap Bilong Painim Ol Gutpela Pren
19, 20. Yumi inap painim wanem kain lain insait long kongrigesen? Bai yumi skelim wanem samting long stadi i kamap bihain?
19 Jisas i wok yet long lukautim yumi long rot bilong ol gutpela wasman, na tu, em i givim yumi ol gutpela mama, brata, na susa insait long kongrigesen. (Ritim Mak 10:29, 30.) Long namba wan taim yu kirap bung wantaim oganaisesen bilong Jehova, ol famili bilong yu i bin mekim wanem? Ating ol i bin helpim yu long i go klostu long God na Krais. Tasol Jisas i bin tok lukaut olsem sampela taim “ol famili bilong man yet bai i kamap birua bilong en.” (Mt. 10:36) Tasol yumi belgut taim yumi save olsem insait long kongrigesen, yumi ken painim ol lain husat bai pas gut tru wantaim yumi winim pasin i stap namel long tupela brata wanblut!—Snd. 18:24.
20 Tok gude em Pol i raitim long pinis bilong pas i go long kongrigesen long Rom, dispela i soim olsem em i bin kamap gutpela pren bilong planti insait long kongrigesen. (Ro. 16:8-16) Long pinis bilong namba 3 pas em aposel Jon i raitim, em i tok: “Givim gude bilong mi long olgeta wan wan pren.” (3 Jo. 14, NW) Jon tu i kamap pren bilong planti na pasin pren i stap namel long ol i bin stap strong tru. Olsem wanem yumi inap bihainim pasin bilong Jisas na ol disaipel bilong em na stap gutpela pren bilong ol bratasista bilong yumi, na wok strong long holimpas dispela gutpela pasin pren? Stadi i kamap bihain long dispela bai bekim dispela askim.
Bai Yu Bekim Olsem Wanem?
• Jisas i mekim wanem na em i stap olsem gutpela pren?
• Ol disaipel i mekim wanem taim Jisas i soim gutpela pasin pren long ol?
• Olsem wanem yumi inap soim olsem yumi stap pren bilong Krais?
[Piksa long pes 14]
Jisas i tingim tru tingting bilong ol pren bilong em na ol samting ol i pilim long bel
[Piksa long pes 16]
Olsem wanem yumi ken soim olsem yumi laik i stap pren bilong Krais?