Jehova—Yu Save Liklik Tasol Long Em o Em i Pren Bilong Yu?
“JON, mi laik bai yu sekanim dispela pren bilong mi, nem bilong em—ahh, nem bilong yu husat?”
Yu bin harim man i mekim kain tok olsem? Dispela i kamapim klia wanpela pasin bilong sampela man, em ol i save kolim dispela tok “pren” long man ol i save liklik tasol long em, o ol i no save long em. Ating yu save long nem bilong man i stap long haus long narapela hapsait bilong rot em haus bilong yu i stap long en, tasol sapos yu save long nem tasol bilong dispela man, i no olsem em i pren bilong yu, a?
Wanpela buk i stori long dispela samting na i tok, man yu save liklik long em i olsem man yu bin bungim sampela taim, tasol yu no givim bel long em, o pas tru wantaim em, o poromanim em, o mekim gut long em, olsem yu mekim long man i stap pren bilong yu.
Kain man olsem yumi no givim bel long em na ating dispela i as na yumi no tingim tumas ol samting i painim em. Tasol yumi save tingim tru ol samting i painim ol pren bilong yumi. Taim ol i amamas, yumi amamas wantaim ol; taim ol i bel hevi, yumi bel hevi wantaim ol. Yumi pilim tru ol amamas na hevi bilong ol. Tasol yumi mas was gut, nogut bel i kirapim yumi long insait long ol samting em i samting bilong ol yet tasol.—1 Pita 4:15.
Yumi givim bel tru long ol pren bilong yumi, olsem na yumi save mekim pasin ol i laikim bai ol i ken amamas long yumi. Man yumi save liklik tasol long em, sapos em i no amamas long pasin bilong yumi o em i ting pasin bilong yumi i no stret, ating dispela i no ken kirapim yumi long senisim pasin bilong yumi. Tasol ol pren bilong yumi inap kirapim yumi long senisim tru pasin na tingting na bilas samting bilong yumi.
Sapos yumi stap pren bilong wanpela man, i gat wok yumi mas mekim—yumi mas bilip long em, na laikim em, na harim tok bilong em, na stap gut long em. Tasol sapos yumi save liklik tasol long wanpela man, yumi no gat wok long mekim olsem long em. Sapos wanpela man i laik bai yu kamap pren bilong em na em i no laik mekim ol dispela wok bambai yutupela i pas gut wantaim, dispela man i no laik kisim wanpela pren; em i laik kisim wanpela poroman nating em i save liklik tasol long em. Ol pren tru i amamas long mekim ol wok bilong pasin bilong givim bel tru long narapela. Ol i save, taim ol i mekim olsem, dispela i kamapim klia olsem tupela i stap pren tru.
Pren Bilong God
Jehova em i Man bilong wokim yumi na em i Papa bilong yumi i stap long heven, olsem na i stret yumi mas givim bel long em, na bihainim tok bilong em, na daun long em. Tasol God i no laik bai yumi tingting tasol long dispela em i wok bilong yumi na yumi mekim olsem. Nogat. Em i laik bai yumi givim bel tru long em na dispela i kirapim yumi long mekim. (Matyu 22:37) Na tu, em i laik bai yumi laikim em tumas, olsem Pren bilong yumi. (Buk Song 18:1) “God i bin laikim yumi pastaim,” olsem na i gat gutpela as na yumi inap kamap pren bilong em.—1 Jon 4:19.
Namba wan tumbuna papamama bilong yumi, em Adam tupela Iv, i save long Jehova, na em i laik bai tupela i kamap pren bilong em, tasol olsem wanem? Tupela i bin kamap pren bilong em? Sori tumas, tupela i no bin kamap pren bilong Jehova. Tupela i tingim tupela yet tasol, na tupela i no laik daun long God Jehova na larim em i stap bos bilong ol. Olsem na yumi save, tupela i no bin givim bel tru long God. Tupela i laik kisim ol blesing ol inap kisim sapos ol i stap pren bilong God, tasol tupela i no laik mekim ol wok ol i mas mekim bambai ol i ken kamap pren bilong em. I olsem ol i laik kisim gutpela sindaun long wanpela gutpela haus, em Paradais, tasol tupela i no laik baim haus.
Yumi lain bilong tupela, olsem na yumi tu yumi kisim pasin bilong bikhet na i no laik tenkyu—sampela i kisim liklik tasol na sampela i kisim moa yet. (Stat 8:21) Laik bilong i stap fri i stap long skin bilong yumi, tasol sampela yangpela i larim dispela laik i kirapim ol long mekim pasin bikhet—ol i no pilim gutpela pasin papamama i mekim bilong helpim ol na ol i no tenkyu long tupela. Long dispela rot gutpela pasin pren i mas i stap namel long ol pikinini na papamama i go inap long ol i dai, em i bagarap. Em samting nogut. Tasol sapos pasin pren i stap namel long yumi na Papa bilong yumi long heven i bagarap, dispela i moa nogut. Dispela inap mekim na bai yumi lus olgeta!
Rot Bilong Kamap Pren
Sapos yumi kamap pren bilong wanpela man o bilong God, tasol yumi no bilip long dispela pren bilong yumi, bai dispela pasin pren i no ken i stap longtaim. Abraham i save long dispela samting, olsem na long olgeta taim em i kamapim klia olsem em i bilip tru long God. Kaunim Stat 12:1-5 na Stat 22:1-18 long Baibel, na bai yu save long tupela bikpela samting Abraham i bin mekim i kamapim klia tru olsem em i bilip long God Jehova. Baibel i tok, “Abraham em i bilip long God, na God i kolim em stretpela man.” Na long dispela as, “God i kolim Abraham olsem, ‘Pren bilong mi.’ ”—Jems 2:23.
Narapela samting yumi mas mekim bilong kamap pren bilong God em olsem: Yumi mas mekim ol wok bilong dispela. Yumi man nating bilong graun na Jehova em i God Antap Tru, olsem na ol wok yumi mas mekim bilong i stap pren bilong God i winim tru ol wok yumi mas mekim bilong i stap pren bilong wanpela man bilong graun. Yumi no ken ting long mekim sampela pasin tasol God i laikim, olsem yumi save mekim taim yumi stap pren bilong wanpela man bilong graun. Yumi mas laik tru long mekim olgeta pasin God i laikim. Jisas i kamapim klia dispela samting. Em i Pikinini bilong God na pren tru bilong God na em i tok: “Oltaim mi save mekim ol samting em i laikim.”—Jon 8:29.
Olsem na sapos yumi laik i stap pren bilong Jehova o bilong Pikinini bilong em, dispela pasin pren i no inap kamap nating—i gat ol wok yumi mas mekim, olsem tupela i kolim pinis. (Lukim Buk Song 15:1-5.) Jisas i kamapim klia dispela samting long taim em i toktok wantaim ol disaipel bilong em na em i tok: “Sapos yupela i mekim olsem mi bin tokim yupela, orait yupela i stap pren bilong mi.”—Jon 15:14.
Narapela samting yumi mas mekim bambai yumi inap i stap pren bilong wanpela man o bilong God, em olsem: Yumi mas toktok gut wantaim em, na kamapim tingting bilong yumi long em. Long de Jisas i dai, em i tokim ol gutpela aposel bilong em: “Wokboi i no save long ol samting bikman bilong en i save mekim. Olsem na mi no kolim yupela ‘wokboi’ moa. Nogat. Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren.’ ” (Jon 15:15) Taim Jisas i kamapim ol tingting bilong em long ol dispela pren bilong em, em i bihainim pasin bilong Papa bilong em i stap long heven, em Amos 3:7 i stori long Papa olsem: “Olgeta samting God, Bikpela i laik mekim, em i save autim pastaim long ol wokman bilong en, em ol profet.”
Ol pren i save mekim olsem, a? Yumi no save go long man i stap long narapela hapsait bilong rot na stori long em long ol samting i bin painim yumi. Na yumi no laik kamapim tingting na bel bilong yumi long em. Em i no pren bilong yumi; yumi save liklik tasol long em. Tasol yumi hariap tru i go long ol pren bambai yumi ken stori long ol na kamapim tingting bilong yumi long ol, a?
Na yumi save mekim wankain pasin long pren bilong yumi, God. Yumi laik tru long beten toktok long em—yumi hariap i go long em long dispela rot bambai yumi ken tokim em long ol samting yumi sot long en na ol laik bilong yumi, na yumi ken kamapim ol tingting i stap long bel bilong yumi. Tasol sapos wanpela tasol i toktok, pasin pren bai pinis. Olsem na yumi mas larim God tu i toktok—yumi mas larim em i toktok long yumi. Bilong mekim olsem, yumi mas harim gut ol tok bilong em i stap long Baibel, na tingim gut ol dispela tok, na wok strong long bihainim.
Stap Pren Bilong Jehova—Em Bikpela Samting Long Yu?
Bilong helpim yu long bekim dispela askim, yumi ken stori long wanpela gutpela pasin pren i save kamap namel long man na meri. Sapos yu wanpela yangpela man o meri, ating yu laik painim wanpela pren, olsem wanpela poroman, bilong yu ken marit long em. Yu save, sapos yu save liklik tasol long dispela poroman, dispela i no gutpela as bilong marit. Olsem na pastaim yu mas wok long kamap pren tru bilong dispela poroman yu save liklik tasol long em, na bai i gat gutpela as bilong marit long em, na sapos yutupela i marit bai yupela inap i stap amamas.
Orait, yu tingim: Ol manmeri i save wok strong tru long kamap pren olsem o nogat? Ol i redi long lusim hamas aua na hamas mani samting bambai ol inap kamap pren olsem na holimpas dispela gutpela pasin pren? Ol i save lusim liklik hap taim tasol o bikpela hap taim tru long tingim dispela poroman bilong ol? Ol i save tingim planti samting ol i laik mekim—na ol i redi long senisim tingting na mekim narapela samting—bambai ol i ken kamap pren bilong em na holimpas dispela gutpela pasin pren?
Tingim ol dispela samting ol manmeri i save mekim bambai ol i ken pren gut wantaim olsem, na nau askim skin bilong yu yet: ‘Mi save wok strong olsem bambai mi ken kamap pren bilong Man bilong wokim mi o bilong strongim dispela pasin pren? Mi save lusim liklik hap taim tasol long mekim o bikpela hap taim? Planti taim mi tingim wok bilong i stap pren bilong Jehova, o wan wan taim tasol mi tingim? Mi tingim sampela samting mi laik mekim—o mi redi long senisim tingting na mekim narapela samting—bambai mi ken kamap gutpela pren moa bilong God na holimpas dispela pasin pren?’
Ating yangpela Kristen i gat planti pren, ol man na meri, na ating bai wanpela i kamap poroman marit bilong em, tasol em i mas save, olgeta dispela pren i nambatu tasol. Ol yangpela Kristen i mas save, nambawan bikpela samting em olsem: Ol i mas i stap pren bilong Man i bin wokim ol. Olsem na long Saveman 12:1, Baibel i kirapim ol long tingim God long taim ol i “yangpela yet.” Planti yangpela i mekim olsem long nau—ol i mekim wok bilong God na autim tok bilong em long ol man. Na planti ol i mekim dispela wok long olgeta de, olsem mekim wok painia.
Maski planti man long nau i no bilip tumas long God na ol i no laik lotuim Em, ol dispela yangpela manmeri i no pret long litimapim nem bilong God Jehova long taim ol narapela i mekim tok bilas long em o sutim tok giaman long em. I stret Jehova i laik bai ol i mekim olsem, long wanem, ol i pren bilong Em. Yumi laik bai ol pren bilong yumi yet i mekim olsem, a? Na sapos ol pren bilong yumi i bilip tru long yumi na wok strong tru long bekim tok long ol man i sutim tok long yumi, bai yumi belgut tru, a?—Lukim Sindaun 27:11.
Tru tumas, bilong i stap pren bilong God—o bilong ol man—i gat ol wok yumi mas mekim bambai dispela pasin pren i no ken pinis. Man i no laik mekim ol dispela wok, na em i no laik dediket long God Jehova na truim dediket bilong em, ating em i save liklik long Jehova, tasol em i no kisim yet ol amamas bilong man i stap pren bilong Jehova.
[Piksa long pes 25]
Abraham i bilip long God, olsem na God i kolim em pren bilong em