Baibel i Tok Wanem?
Namba Wan Sin Em i Wanem Samting?
BEKIM bilong dispela askim i gat bikpela mining long yumi. Bilong wanem i olsem? Bikos taim Adam tupela Iv i bikhet long God, dispela i bin nogutim olgeta man i kam inap long nau. Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Tasol olsem wanem samting ol i mekim, olsem kisim prut long wanpela diwai na kaikai, i mekim nogut tru long ol man?
Taim God i wokim Adam na Iv, em i putim ol long wanpela naispela gaden i gat planti gutpela gaden kaikai na ol diwai i karim prut. I gat wanpela diwai tambu tasol em “diwai bilong givim gutpela save long wanem samting i gutpela na wanem samting i nogut.” Adam na Iv i stap fri long makim wanem samting ol i laik mekim, olsem na ol inap bihainim tok bilong God o ol inap sakim tok. Tasol God i tok lukaut long Adam olsem, “sapos yu kaikai [prut bilong diwai tambu], wantu bai yu dai.”—Stat 1:29; 2:17.
Wanpela Tambu i Stret
Dispela wanpela tambu i no givim hatwok long ol; Adam na Iv inap kisim kaikai long olgeta narapela diwai long gaden. (Stat 2:16) Na tu, dispela tambu i no daunim ol na makim olsem tupela i gat sampela tingting nogut. Sapos God i bin tambuim ol long mekim ol kain samting nogut olsem mekim pasin sem wantaim ol animal o kilim man i dai, orait ating sampela inap tok olsem ol man i gutpela olgeta i gat sampela laik nogut God i mas pasim ol long mekim. Tasol pasin bilong kaikai em i samting i stret long mekim na em nomol.
Olsem wanem? Dispela prut tambu i makim maritpasin, olsem sampela man i tok? Baibel i no sapotim dispela tingting. Tingim, taim God i givim dispela tambu, Adam i stap wanpis na i luk olsem em i bin stap olsem inap longpela taim liklik. (Stat 2:23) Namba tu, God i tokim Adam na Iv long “kamap planti na i go sindaun long olgeta hap bilong graun.” (Stat 1:28) Yumi save em i no inap tokim ol long brukim lo bilong em na bihain tokim ol olsem ol i mas dai, long wanem, ol i brukim lo! (1 Jon 4:8) Namba tri, Iv i bin kisim prut paslain long Adam na bihain em i givim sampela long man bilong em. (Stat 3:6) Olsem na i klia tru olsem prut i no makim maritpasin.
Ol i Laik Bosim Wokabaut Bilong Ol Yet
Diwai “bilong givim gutpela save” em i wanpela diwai tru tru. Tasol dispela diwai i makim rait bilong God long makim wanem samting i stret na wanem samting i no stret long ol man i ken mekim. Olsem na bilong kisim na kaikai prut bilong dispela diwai i no pasin stil tasol—olsem ol i kisim samting bilong God—nogat, taim ol i kaikai prut bilong dispela diwai, dispela i makim olsem ol i bikhet na ol i laik makim wanem samting i stret na i no stret. Tingim, taim Satan i giaman pinis na tokim Iv olsem sapos em wantaim man bilong em i kisim dispela prut, ol i “no inap i dai,” em i tok moa: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.”—Stat 3:4, 5.
Tasol taim Adam na Iv i kaikai dispela prut pinis, ol i no kamap wankain olsem God na ol i save long wanem samting i gutpela na wanem samting i nogut. Iv yet i tokim God: “Snek i giamanim mi.” (Stat 3:13, NW ) Tasol maski i olsem, Iv i save pinis long lo bilong God, na em yet i bin kolim dispela lo taim em i toktok wantaim dispela snek Satan i yusim. (KTH 12:9) Olsem na long laik bilong em yet em i bikhet. (Stat 3:1-3) Snek i no bin giamanim Adam. (1 Timoti 2:14) Em i no stap gut long Man i bin wokim em, nogat, em i sakim tok bilong em na bihainim tok bilong meri bilong em. Tupela wantaim i laik bosim wokabaut bilong ol yet.—Stat 3:6, 17.
Pasin Adam na Iv i mekim i tokaut olsem ol i laik bosim ol yet, dispela i mekim na ol i no inap pas gut moa wantaim Jehova. Sin i pas tru long bodi bilong ol. Tru, ol i bin stap laip inap planti handet yia, tasol taim ol i mekim sin, “wantu” ol i kirap long dai, kain olsem wanpela han bilong diwai em man i katim na rausim. (Stat 5:5) Na em i namba wan taim bel bilong ol i no stap isi. Ol i luksave olsem ol i stap as nating na ol i laik hait long God. (Stat 3:7, 8) Na tu, ol i pilim gilti stret, wari na tingting planti, na sem. Sin ol i mekim i bagarapim tru bel bilong ol, na bel bilong ol i kotim ol long rong ol i bin mekim.
Bilong bihainim ol tok na lo holi bilong em yet, i stret God i mas givim strafe long Adam na Iv—tupela i mas i dai na ol i mas raus long gaden Iden. (Stat 3:19, 23, 24) Olsem na Paradais, amamas, na laip oltaim i lus, na ol man i kisim sin, pen, na indai. Em samting nogut tru i kamap long ol man! Tasol taim God i kolim strafe bilong tupela, wantu em i tok promis long stretim ol dispela samting nogut i bin kamap long sin bilong ol, na em bai mekim long wanpela rot we i no brukim ol stretpela lo bilong em.
Jehova i tingting pinis long kamapim wanpela rot we ol tumbuna pikinini bilong Adam na Iv i ken lusim kalabus bilong sin na dai. Em i mekim olsem long rot bilong Jisas Krais. (Stat 3:15; Matyu 20:28; Galesia 3:16) Long rot bilong Jisas, God bai pinisim sin na ol samting nogut sin i kamapim na mekim dispela graun olgeta i kamap wanpela paradais, olsem em i bin tokaut long mekim taim em i wokim man long pastaim.—Luk 23:43, NW; Jon 3:16.
YU LAIK SAVE?
◼ Olsem wanem na yumi save prut tambu i no makim maritpasin?—Stat 1:28.
◼ Taim ol i kaikai prut tambu, dispela i makim wanem samting?—Stat 3:4, 5.
◼ God i mekim wanem bilong stretim ol samting sin i bin kamapim?—Matyu 20:28.
[Rait long pes 27]
Prut tambu i no makim maritpasin
[Piksa long pes 26, 27]
Iv i laik kamap wankain olsem God, em yet i laik makim wanem samting i stret na i no stret