Baibel i Tok Wanem?
Yu Inap Helpim Ol Man i Dai Pinis?
“Kirap long bipo yet, Sios i bin . . . mekim ol beten bilong helpim [ol man i dai pinis] . . . na bai ol i kamap klin, na stap bel isi na amamas long lukim God.”—Buk “Catechism of the Catholic Church.”
WANPELA tingting em ol man bilong olgeta kain skin i save tingting planti long en, em ol man i dai pinis ol i stap olsem wanem. Ating yu pilim pinis bel hevi i save kamap taim wanpela long famili i bin i dai. Na ating yu laik save, ol man i dai pinis ol i gat tingting o nogat, na ol i karim pen o ol i stap bel isi, na i gat sampela samting yu ken mekim bilong helpim ol o nogat.
Planti man bilong lotu i bilip olsem ol inap helpim ol man i dai pinis. Olsem: Ol Hindu i bilip olsem taim ol i kukim bodi bilong famili bilong ol i dai pinis, arere long wara Ganges na tromoi sit bilong paia long wara, spirit bilong dispela daiman bai stap amamas oltaim oltaim. Long ol kantri bilong Esia, ol Buda i save kukim ol samting ol i wokim long pepa, olsem ka, haus, klos na mani, long wanem, ol i bilip olsem ol man i dai pinis bai mekim wok long ol long ples ol i go long en. Long Afrika, ol i save kapsaitim alkohol arere long matmat, as na ol i mekim olsem em bilong helpim daiman.
Misin Katolik i skulim ol man olsem sapos wanpela man i dai na em i no bin tanim bel long ol “bikpela sin tru” em i bin mekim, orait God i no ken orait long em. Man i stap olsem em i stap long “hel.” Tasol misin i skulim ol tu olsem, man em God i orait long en em bai kisim “bikpela amamas tru” wantaim God long heven, tasol paslain long dispela em i mas kamap klin olgeta. Na bilong kamap klin, ating inap sampela taim em i mas stap long pegatori, olsem “klinpaia,” em strafe bilong ol sin God inap fogivim em long en. Tasol taim man i stap long klinpaia, em inap kisim helpim long rot bilong ol beten—ol beten em ol man i mas mekim long rot bilong wanpela pater—na tu, long rot bilong Misa. Ol pren na famili bilong daiman i mas baim pater bilong mekim ol dispela lotu.
Em pasin bilong yumi man long mekim ol samting bilong helpim famili taim hevi i painim ol. Tasol sapos i gat rot bilong helpim ol, ating God bai kamapim klia dispela rot, laka? Orait, yumi ken lukim Baibel i tok wanem long dispela samting.
Ol Man i Dai Pinis Ol i Stap Olsem Wanem?
Ol dispela pasin bilong helpim ol man i dai pinis em yumi stori pinis long en, olgeta i kamap long wanpela asbilip olsem man i gat spirit i no inap i dai, em olsem taim man i dai bodi i dai, tasol dispela spirit i stap laip yet. Tasol yu ting Baibel i tok olsem? Em i tok: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Taim ol manmeri i dai, laik na kros na mangal bilong ol i pinis olgeta, na ol dispela manmeri i no inap mekim wanpela samting moa long graun. Sapos yu mekim wanpela wok, orait taitim bun na mekim save tru. Long wanem, bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” (Saveman 9:5, 6, 9, 10) Ples bilong ol man i dai pinis i makim matmat tasol.
Man bilong raitim song i tok long samting dai i mekim long tingting bilong man, olsem: “Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”—Song 146:4.
Ol tok bilong Baibel i stret na i gat strong. Yu gat wanem tingting? Yu ting wanpela gutpela papa inap givim hevi long pikinini bilong em long samting em sin i stap long skin i as bilong en? (Stat 8:21) Nogat, a? Olsem na Papa bilong yumi long heven tu i no inap mekim kain pasin olsem. Taim sampela long lain Israel bilong bipo i kirap bihainim pasin bilong ol haiden long kukim ol pikinini bilong ol olsem ofa long ol giaman god, Jehova i tambuim kain pasin nogut olsem, em i tok ‘mi no bin tokim ol long mekim dispela pasin, na tu, mi no bin tingting long givim dispela kain lo long ol.’—Jeremaia 7:31.
Man i mekim sin em i dai tru, em i no stap long wanpela ples spirit na wok long kisim pen. Baibel i tok: “Sin i save givim pe long ol wokboi bilong en. Dispela pe em dai tasol,” na “man i dai pinis, em i no pas moa long sin.”—Rom 5:12; 6:7, 23.
Ol man i dai pinis ol i no inap pilim pen. Em i olsem ol i slip i dai tru na tingting i no wok. Tru tumas, olgeta wok ol man i mekim bilong helpim man i dai pinis, dispela i no stret wantaim tok bilong Baibel.
Gutpela Samting i Wetim Ol Man i Dai Pinis
Dispela i no makim olsem wanpela yu laikim tru na em i bin i dai em bai slip oltaim long matmat, nogat. I gat gutpela samting tru i wetim ol man i dai pinis.
Paslain long Jisas i kirapim bek pren bilong em Lasarus, Jisas i tok em “bai go na kirapim em.” (Jon 11:11) Long narapela taim em i stori olsem “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Ol man i kirap bek long matmat, ol bai no pas moa long sin em ol i mekim bipo, olsem na ol i no ken kisim strafe long samting ol i bin mekim paslain long ol i bin dai. Bai i gat rot bilong ol i stap laip long gutpela ples i no gat hevi long en. Man! Em gutpela samting tru, laka?
Sapos yu laik tru long i stap long dispela gutpela ples, no ken surik long skelim gut ol dispela tok promis, na bai yu inap bilip tru long ol. Ol Witnes Bilong Jehova bai amamas long helpim yu.
YU LAIK SAVE?
◼ Ol man i dai pinis ol i gat tingting?—Song 146:4; Saveman 9:5, 6, 10.
◼ Yu ting God bai larim ol man i dai pinis i kisim pen long bikpaia?—Jeremaia 7:31.
◼ I gat gutpela samting i wetim ol man i dai pinis?—Jon 5:28, 29.