Baibel i Tok Wanem?
Yu Ting Lotu Kristen i No Inapim Wok Bilong En?
INAP 30 pesen samting bilong ol manmeri bilong graun i tok ol i Kristen. Tasol ol gavman i bruk bruk nabaut na i gat planti pait moa i kamap, winim bipo. Yu ting dispela i makim olsem lotu Kristen em Jisas i bin skulim ol man long en em i no gutpela olgeta? O pasin planti man i mekim bilong bihainim ol tok bilong Krais i no gutpela?
Long dispela stori bai yumi skelim ol samting tru tru Krais i bin skulim ol man long en, na ol pasin em i bin mekim na ol wokman bilong em i ken bihainim. Long dispela stori bai yumi skelim tu wanpela tingting ol man i tok ol i Kristen ol i holim, em dispela tingting i pait wantaim mining tru bilong dispela tok lotu Kristen.
Lotu Kristen i Go Nogut
Planti handet yia bihain long dai bilong Krais, lotu Kristen i bin senis na i go nogut, na planti man i stap long ol hap em Gavman Rom i bosim ol i laikim dispela lotu. Ol Rom i orait long ol lain i tok ol i Kristen, olsem na i no longtaim na ol i insait long ol wok politik bilong Rom na ol i bung wantaim ol man Rom i gat nem. Taim dispela senis i kamap, ol hetman bilong lotu, olsem Augustine, i kirap skulim ol man olsem dispela Kingdom Bilong God ol i bin wok long wetim em i kamap nau. Ol dispela hetman i skulim ol man olsem dispela namba ol i kisim bilong stiaim ol samting insait long wok politik na lotu, em i rot bilong kamapim laik bilong God long graun. Olsem na ol i strongim dispela tingting olsem em wok bilong ol man long stiaim ol samting bilong graun.
Dispela i mekim na planti man i ting olsem Kristen i gat wok long insait long wok politik. Bilong mekim olsem, planti i ting sampela taim Kristen i mas daunim sampela bilip bilong em bilong bihainim laik bilong ol man long hap em i stap long en. Olsem: Long maus planti man i save toktok long pasin laikim na bel isi em Krais i bin skulim ol man long en, tasol long wankain taim ol i save sapotim ol pait nogut tru i save kamap. Na tu, ol lotu i save strongim lain bilong ol long beten long Kingdom Bilong God, tasol long wankain taim ol i sapotim ol hetman i save mekim pasin nogut tru long ol man.
Dispela lotu Kristen giaman em i no lotu Kristen em Jisas i bin kamapim. Nogat, em lotu ol man yet i bin kamapim na planti man i tok ol i Kristen, ol i save bihainim dispela lotu long nau. Dispela lotu Kristen giaman i no inapim tru wok bilong en, olsem yumi lukim long pasin bilong olgeta lotu Kristendom long nau, ol i sakim ol stiatok bilong Baibel.
Jisas i Skulim Ol Man Long Wanem Samting Tru?
Ating sampela bai kirap nogut long tok bilong Jisas olsem ol wokman bilong em ol “i no bilong dispela graun, olsem [em] yet [em] i no bilong dispela graun.” (Jon 17:15, 16) Bilong wanem Krais i strongim ol disaipel bilong em long mekim olsem? Dispela disaipel Jisas i laikim tumas, em aposel Jon, i bekim dispela askim. Em i tok: “Dispela graun olgeta em i stap aninit long strong bilong Satan.”—1 Jon 5:19.
Olsem na ol tok Jisas i skulim ol man long en, i no stiaim ol long bilip long ol oganaisesen bilong graun, nogat. Tok bilong em i stiaim ol long bilip long Kingdom Bilong God long heven, olsem rot bilong mekim graun i kamap gutpela ples i gat stretpela pasin long en. (Matyu 6:10) Jisas i no bin kamapim liklik olsem em i laik insait long ol wok bilong ol man long taim bilong em, nogat tru. Em i sakim ol man i laik mekim em i kamap king bilong ol. (Jon 6:15) Na tu, em i no orait long pasin bilong pait na bagarapim man bilong stretim ol tok pait. (Matyu 26:50-53; Jon 18:36) Jisas i no bin putim ol lo em gavman i mas bihainim bilong bosim kantri, o ol lo i bosim raits bilong ol wan wan man. Em i no bin sapotim wok politik long taim bilong em. Olsem: Em i no bin kamap man bilong kempein long sapotim raits bilong ol wokboi nating, na em i no bin insait long ol pait bilong ol Juda long sakim ol Rom.
Tasol dispela i no makim olsem Jisas i no tingim ol man na ol hevi bilong ol, nogat. Jisas i mekim planti tok long wok em man i mas mekim long helpim narapela man. Em i tokim ol long no ken giaman taim ol i baim takis, na ol i mas daun long ol man i gat namba long bosim ol. (Matyu 22:17-21) Em i lainim ol long pasin bilong tingim tru ol man i sot long samting. Em i skulim ol tu long tingim gut ol narapela man na rispek long ol, pilim hevi bilong ol, lusim rong bilong ol, na marimari long ol. (Matyu, sapta 5 i go 7) Planti man i save tru olsem bikpela samting long ol tok Krais i lainim ol man long en, em pasin bilong laikim tru God na ol narapela man.—Mak 12:30, 31.
Lotu Kristen Tru Long Nau
Orait, man i bihainim tru Krais em i mas bihainim wanem kain pasin? Em bai mekim pasin Jisas i bin mekim. Em i bihainim gut ol lo bilong ol kantri, tasol em i no ken tru insait long wok politik. (Jon 12:47, 48) Em i no inap sakim ol lo Kristen, maski ol man i putim bikpela hevi long em. (1 Pita 2:21-23) Tasol i no olsem em i lukluk tasol na i no laik helpim ol man, nogat. Trupela Kristen i save amamas long helpim ol man i sot long samting, olsem Jisas i bin mekim. (Mak 6:34) Em i givim taim, mani, na strong bilong em bilong helpim ol long stap amamas, long rot bilong helpim ol long kisimgut ol tok bilong Krais na bihainim gut long i stap bilong ol.—Jon 13:17.
Olsem tasol, ol Witnes Bilong Jehova long nau i wok strong long bihainim pasin bilong Krais taim ol i stap namel long ol manmeri bilong graun. Ol i stap isi na bihainim gut ol lo bilong kantri, tasol ol i no bilong dispela graun. Olsem Jisas i bin mekim, ol i no laik insait long ol pait na tok pait bilong ol lain politik i kamap planti long nau. Ol i bilip na wet long Kingdom Bilong God tasol i rot bilong stretim ol hevi bilong graun. Ol man i bihainim lotu Kristen tru ol i save stap amamas na narapela i stap wanbel wantaim narapela. (Jon 13:34, 35) Tru tumas, lotu Kristen tru i save inapim tru wok bilong en.
YU LAIK SAVE?
◼ Yu ting ol Kristen i mas insait long wok politik?—Jon 6:15.
◼ Olsem wanem? Krais i bin tok pasin bilong pait na bagarapim man em i rot bilong stretim ol tok pait? —Matyu 26:50-53.
◼ Wanem samting i makim ol man i Kristen tru?—Jon 13:34, 35.
[Piksa Kredit Lain long pes 18]
EL COMERCIO, Quito, Ecuador