Baibel i Tok Wanem?
Wanem Samting i Makim Man i Wanpela Kristen?
KINGSLEY, man bilong wanpela kantri long Afrika, i tok: “Long kantri bilong mi, sapos man i save go lotu wanpela taim long olgeta wik, dispela man em i wanpela Kristen.” Raad, bilong Midel Is, em i tok: “Long komiuniti bilong mipela, mipela i tingim ol Kristen olsem wanpela lain husat i save bihainim pasin bilong ol waitman long bilas, selebretim ol bikpela de, na pasin ol i save mekim long ol meri.”
Tasol olsem wanem? Man i save go lotu wanpela taim long olgeta wik, na i save bihainim sampela kain pasin bilong bilas na pasin tumbuna, dispela samting i makim olsem em i wanpela Kristen? Yumi save dispela tok “Kristen” i makim man i bihainim tingting na pasin Krais i bin autim tok long en na em yet i bin bihainim. Taim lotu Kristen i bin kamap nupela ol i bihainim wanem kain pasin?
Lotu Kristen Long Pastaim—Rot Ol i Bihainim
Jisas i tokim lain bilong em: “Sapos yupela i mekim olsem mi bin tokim yupela, orait yupela i stap pren bilong mi.” (Jon 15:14) Ol tok Jisas i skulim ol disaipel long en i bin senisim olgeta samting long laip bilong ol, olsem na ol disaipel bilong Krais i kolim lotu bilong ol olsem “Rot Bilong Bikpela.” (Aposel 9:2, NW ) I no longtaim bihain, God i stiaim ol samting na “ol disaipel i kisim nem Kristen namba wan taim.” (Aposel 11:26) Dispela nupela nem ol i kisim i makim olsem ol i bilip Jisas em i Pikinini Bilong God, na em i bin helpim ol man long save long laik bilong Papa bilong em long heven. Dispela bilip i stiaim ol long bihainim wanpela rot i narapela kain long ol man bilong dispela graun.
Ol tok Krais i skulim ol disaipel long en i kirapim ol long bihainim ol tok bilong Baibel, dispela i makim olsem ol i mas sakim “pasin pamuk, pasin doti, pasin bikhet na i no sem, lotuim imis, olkain wok bilong ol spirit nogut, birua, tok pait, jeles, belhat tumas, resis long daunim narapela, . . . dring longlong, mekim pati i gat planti pairap, na olkain pasin olsem.” (Galesia 5:19-21, NW; Efesus 4:17-24) Aposel Pol i bin kirapim gen ol Kristen bilong Korin long tingim olsem, bipo sampela bilong ol i bin mekim ol dispela pasin. Na em i tok: “Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais . . . , God i mekim yupela i kamap stretpela manmeri long ai bilong en.”—1 Korin 6:9-11.
Long buk The Rise of Christianity bilong E. W. Barnes, em i tok: “Ol buk samting ol Kristen i bin raitim long bipo i kamapim olsem ol Kristen i save bihainim stretpela pasin na ol i bihainim ol lo bilong gavman. Ol i laik i stap gut long gavman na stap gutpela sitisen. Ol i sakim ol pasin nogut bilong ol haiden. Ol i laik i stap ol gutpela neiba na ol pren em man i ken bilip long ol. Ol i lain long no ken dring planti na mekim nabaut, ol i wok strong na bihainim stretpela pasin. Maski ol narapela man i bihainim pasin nogut na pasin sem, ol Kristen i bihainim stretpela pasin na ol i save tok tru. Ol lo ol i bihainim long maritpasin i gutpela tru: ol i tingim tru olsem marit em i bikpela samting na ol i bihainim stretpela pasin insait long famili.” Em pasin bilong ol Kristen long dispela taim bipo.
Narapela bikpela mak bilong lotu Kristen bilong pastaim, em ol i save givim bel tru long autim tok. Krais i tokim lain bilong em: “Yupela i mas i go mekim olgeta lain manmeri i kamap disaipel bilong mi.” (Matyu 28:19, 20) Jean Bernardi, em wanpela profesa bilong Sorbonne University long Paris, Frans, em i tok: “Ol Kristen bilong bipo i save raun na toktok wantaim ol man nabaut; ol i go long olgeta hap na autim tok long olgeta man. Long ol bikrot na long ol taun, long ol maket na long ol haus. Maski man i laik harim tok bilong ol o nogat. Ol i toktok wantaim ol rabisman, na ol maniman em mani kago bilong ol i pasim ol long harim tok. . . . Ol i save wokabaut long rot, kalap long ol sip, na ol i save go long ol longwe longwe hap bilong graun.”
Lotu Kristen Long Nau
Wankain olsem ol Kristen bilong pastaim, ol pasin ol Kristen tru long nau i bihainim i mekim na i no hatwok long ol man inap luksave long ol. Olsem na, ol Witnes Bilong Jehova i wok strong long bihainim gut ol stiatok em ol Kristen bilong pastaim i bin bihainim. Ol narapela i lukim hatwok ol i mekim bilong stretim sindaun bilong ol na bai i stret long ol tok bilong Baibel.
Olsem: Buk New Catholic Encyclopedia i tokaut olsem ol Witnes Bilong Jehova i gat nem olsem “wanpela lain i save bihainim gutpela pasin tru, winim planti ol narapela lain.” Niuspepa Deseret News bilong Salt Lake City, Utah, i tok olsem ol Witnes Bilong Jehova i “wok long strongim ol famili long pas gut wantaim na ol i save helpim ol man long kamap ol gutpela man i save mekim pasin i tru.” Dispela niuspepa i tok moa: “Lain bilong ol i save olsem em i bikpela samting long bihainim ol stretpela lo. Ol i save olsem smok, spak, mekim nabaut long drak, pilai laki, pamuk na man i slip wantaim man, ol dispela pasin i save bagarapim pasin bilong man long pas gut wantaim God. Ol i skulim ol man long mekim pasin i tru na long pasin bilong mekim gut ol wok.”
Na tu, ol Witnes i tingim tru wok ol i kisim olsem ol man bilong wok strong long autim tok. Buk New Catholic Encyclopedia i stori long dispela olsem: “Nambawan wok bilong ol wan wan . . . em long autim tok bilong Jehova na tokaut long Kingdom bilong Em i kam klostu pinis. . . . Bilong i stap Witnes tru ol i mas mekim gut wok bilong autim tok.”
I klia tru olsem man i stap Kristen tru dispela i no makim olsem em i stap memba insait long wanpela lotu i kolim ol yet olsem Kristen na em tasol, nogat. Jisas yet i bin tok profet long ol Kristen giaman bai kamap planti. (Matyu 7:22, 23) Ol Witnes Bilong Jehova i singautim yu long kisim save long ol samting Jisas i bin skulim ol man long en na wok long bihainim. Em dispela samting tasol i makim man i wanpela Kristen. Jisas i tok: “Yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.”—Jon 13:17.
YU LAIK SAVE?
◼ Jisas i kolim husat olsem pren?—Jon 15:14.
◼ Ol Kristen tru i mas sakim wanem ol kain pasin?—Galesia 5:19-21, NW.
◼ Ol Kristen i mas insait long wanem wok?—Matyu 28:19, 20.
[Ol Piksa long pes 22]
Ol Kristen tru i save wok strong long autim tok bilong God, wankain long ol Kristen i bin i stap planti handet yia bipo