Bilong Wanem Mi Save Airaun na Pundaun?
Dokta i laik sekim ai bilong mi, na bilong mekim olsem em i mas holim wanpela liklik tul na tatsim kiau bilong ai. Mi save long samting bai kamap, long wanem, em i save kamap long olgeta taim. Em i wankain tu long taim nes i save sutim han bilong mi bilong kisim hap blut. Na wankain samting i save kamap sampela taim sapos mi toktok tasol long wanpela i kisim bagarap long skin—mi save airaun na pundaun.
Wanpela ripot bilong Inglan i tok, inap 3 pesen bilong yumi i save airaun na pundaun taim kain samting olsem i kamap. Sapos dispela samting i save painim yu, ating yu bin wok strong bambai yu no ken airaun na pundaun. Ating yu bin traim long wokabaut i go long toilet na bai yu no ken pundaun long ai bilong planti man. Tasol dispela i no gutpela. Nogut taim yu wokabaut i go wantu yu airaun na pundaun na yu kisim hap bagarap. Dispela samting i bin painim mi planti taim, olsem na mi tingting long painim as bilong en.
Mi toktok wantaim wanpela gutpela dokta na mi sekim sampela buk, na mi kisim save long nem bilong dispela sik (vasovagal reaction). Ol i ting wanpela samting bilong bodi i no mekim gut wok bilong en long helpim blut long ron long mak stret insait long ol rop, olsem long taim yumi bin sindaun na yumi laik kirap sanap.
Sampela taim, olsem taim yu lukim blut o dokta i glasim ai bilong yu, ol nev insait long skin i mekim olsem yu slip i stap, tasol tru tru yu sindaun o yu sanap i stap. Pastaim klok bilong yu i wok hariap tru, long wanem, yu tingting planti. Orait, nau em i wok isi tru na ol rop bilong blut long lek i op bikpela. Olsem na bikpela hap blut i ron long lek na i no gat planti blut i go long het. Em nau, kru bilong het i sot long win oksijen, na yu airaun na pundaun. Yu ken mekim wanem na bai dispela samting i no ken kamap?
Taim dokta i laik kisim hap blut bilong yu, lukluk i go long narapela hap, o yu ken slip long bet taim dokta i kisim blut. Taim dispela airaun i laik kirap, yu inap luksave long sampela mak bilong en. Olsem na yu gat hap taim bilong mekim sampela samting pastaim. Planti dokta i tok, i gutpela long slip long plua na putim tupela lek i go antap long sia samting. Dispela bai mekim na blut i no ken i go daun insait long lek, olsem na ating bai yu no airaun olgeta na pundaun. Insait long sampela minit tasol bai yu pilim orait.
Sapos dispela tok i helpim yu olsem i bin helpim mi, bai yu inap luksave long ol mak bilong dispela sik i laik kamap. Orait nau yu inap mekim kwik ol samting bilong pasim dispela airaun taim em i no kamap yet.—Wanpela man i salim dispela stori i kam.
[Rait long pes 21]
Sapos yu slip long bet taim dokta i laik mekim wanpela samting long yu, ating dispela bai helpim yu