Ol Yangpela i Laik Save . . .

Pasin Gei na Lesbien​—⁠Olsem Wanem Mi Ken Sakim?

“Taim mi gat 12-pela krismas, mi gat laik long wanpela gel long skul. Mi paul na tingting planti, nogut mi wanpela lesbien.” a​​—⁠Anna.b

“Taim mi yangpela mi gat laik long ol narapela man na mi gat hevi long dispela. Insait long bel bilong mi, mi save olsem ol dispela tingting i no nomol.”​​—⁠Olef.

“Mi na meri pren bilong mi i kis inap wanpela o tupela taim. Mi laikim ol mangi tu, olsem na mi ting nogut mi wanpela meri i gat laik long slip wantaim man na meri.”​​—⁠Sarah.

PASIN bilong planti man long nau long orait tasol long kain kain pasin i bin kirapim planti yangpela long traim pasin gei o lesbien. Becky i gat 15 krismas, em i tok: “Planti gel long skul bilong mi i tok ol i lesbien, o ol i save slip wantaim man na meri, o ol i gat laik long save long pasin bilong slip wantaim man na meri.” Wankain samting i save kamap long skul bilong Christa i gat 18 krismas. Em i tok: “Tupela meri wanklas bilong mi i bin askim mi long slip wantaim ol. Wanpela i raitim liklik pas long mi na i askim mi sapos mi gat laik long save long pasin bilong tupela meri i slip wantaim.”

Ol man i save hambak na kamapim long ples klia pasin gei na lesbien, olsem na ating yu laik save: ‘Tru tru pasin gei em i wanpela pasin nogut tru? Olsem wanem sapos mi man na mi gat laik long narapela man, o mi meri na mi gat laik long narapela meri? Dispela i makim olsem mi wanpela gei o lesbien?’

God i Ting Olsem Wanem Long Pasin Gei na Lesbien?

Planti man long nau​—⁠ol pris pasto tu​—⁠i tok pasin gei na lesbien i no gat rong tumas long en. Tasol Baibel i tokaut stret long dispela samting. Em i tok, God Jehova i wokim man na meri na em i laik bai man na meri i marit wantaim, ol tasol i ken inapim laik bilong ol long mekim maritpasin. (Stat 1:​27, 28; 2:24) Olsem na yumi no kirap nogut long Baibel i tok olsem pasin gei na lesbien i no stret.​—⁠Rom 1:​26, 27.

Tru, planti man i save tok olsem ol tok bilong Baibel i no stret long taim bilong yumi long nau. Olsem: Megan i gat 14 krismas, em i tok: “Sampela tok bilong Baibel i no bikpela samting long yumi ol man bilong nau.” Tasol bilong wanem sampela i save hariap na mekim dispela kain tok? Long wanem, planti taim tok bilong Baibel i pait wantaim tingting bilong ol. Ol i sakim tok bilong Baibel, long wanem, Baibel i no lainim ol long samting ol i laik bilip long en. Tasol dispela tingting i no stret, na Baibel i strongim yumi long daunim ol kain tingting olsem i no gat as bilong en! Long Baibel, God Jehova i kirapim yumi long tingim dispela trupela tok, olsem ol lo bilong em i gutpela bilong helpim yumi. (Aisaia 48:​17, 18) Dispela em i stret, long wanem, Man Bilong Wokim yumi i save gut long pasin bilong yumi ol man.

Yu wanpela yangpela na ating yu wok long kisim kain kain filings. Olsem wanem sapos yu man na yu gat laik long narapela man, o yu meri na yu gat laik long narapela meri? Yu ting dispela i makim wantu tasol olsem yu wanpela gei o lesbien? Nogat, i no olsem. Tingim, nau yu yangpela na laik bilong skin long mekim maritpasin i strong na i save kirap nating. (1 Korin 7:36) Olsem na sapos yu man, ating inap liklik haptaim yu gat tingting long narapela man, o sapos yu meri, yu gat tingting long narapela meri. Tasol dispela i no makim olsem yu wanpela gei o lesbien. Nogat. Ol ripot i soim olsem ol dispela kain tingting i save pinis. Tasol ating yu laik save, ‘Olsem wanem ol dispela kain tingting i save kirap?’

Sampela i tok pasin gei i stap long ol jin bilong man. Sampela narapela i tok man i lainim dispela pasin. Dispela stori i no laik skelim wanem samting i as bilong dispela pasin. Yumi no inap tru long kolim wanpela samting tasol na tok em i as bilong dispela pasin. Pasin gei na lesbien​—⁠olsem ol narapela pasin tu​—⁠i gat kain kain samting i as bilong en.

Maski wanem samting i as bilong pasin gei na lesbien, em i bikpela samting long save olsem Baibel i no orait long en. Olsem na man i gat hevi long em i gat laik long mekim pasin gei o lesbien, em inap winim wanpela mak olsem: Em i ken sakim dispela pasin. Yumi ken mekim tok piksa olsem: Wanpela man i gat pasin bilong “belhat kwik.” (Sindaun 29:22) Ating bipo em i save belhat hariap na i no bosim bel. Tasol taim em i stadi long Baibel, em i luksave olsem em i mas lain long bosim bel bilong em. Yu ting dispela i makim olsem bihain bel bilong em i no inap kirap long kros? Nogat, i no olsem. Tasol em i save Baibel i tok wanem long pasin bilong belhat kwik, olsem na em i daunim dispela pasin. Na i wankain long man i gat laik long narapela man, tasol nau em i save long tok Baibel i mekim long pasin gei. Ating sampela taim, laik nogut inap kamap. Tasol long rot bilong bihainim tok bilong Baibel, dispela man inap daunim dispela laik.

Tru, laik bilong mekim pasin gei o lesbien inap strong tru. Tasol yu ken save tru olsem yu inap daunim ol laik nogut i stap long bel bilong yu. (1 Korin 9:27; Efesus 4:​22-​24) Tingim, yu inap makim rot yu bai bihainim. (Matyu 7:​13, 14; Rom 12:​1, 2) Na maski ol man i tok wanem, yu inap lain long bosim ol laik bilong yu​—⁠o yu inap sakim ol na yu no inapim ol laik nogut.

Sakim Ol Pasin Nogut

Yu ken mekim wanem na bai yu no insait long pasin gei o lesbien?

◼ Namba wan Putim olgeta hevi bilong yu long han bilong Jehova long rot bilong beten, na bilip olsem em i ‘save wari long yu.’ (1 Pita 5:7; Song 55:22) Jehova inap givim yu bel isi “i gutpela samting tru.” Dispela inap mekim na ‘bel na tingting bilong yu bai i stap gut tru’ na yu bai kisim “bikpela strong” long sakim ol laik nogut. (Filipai 4:7; 2 Korin 4:⁠7) Sarah, em i tingting planti, nogut em i wanpela meri i gat laik long slip wantaim man na meri, em i tok: “Taim ol tingting bilong mi i bagarapim bel isi bilong mi, mi save beten, na Jehova i strongim mi. Mi no inap tru long karim dispela hevi, sapos Jehova i no bin helpim mi. Beten em i bikpela samting tru bilong helpim mi!”​—⁠Song 94:​18, 19; Efesus 3:⁠20.

◼ Namba tu Larim ol gutpela tok bilong God i pulap long tingting bilong yu. (Filipai 4:⁠8) Ritim Baibel long olgeta de. Tingim, Baibel i gat strong tru long stiaim tingting na bel bilong yu long mekim gutpela samting. (Hibru 4:12) Wanpela yangpela man, nem bilong em Jason, em i tok: “Baibel​—⁠olsem tok bilong 1 Korin 6:​9, 10 na Efesus 5:3​—⁠i gat bikpela strong long stiaim mi. Mi save ritim ol dispela skripsa taim ol laik nogut i kamap.”

◼ Namba tri Sakim ponografi na olgeta buk na piksa samting i strongim pasin gei, em ol dispela samting i save kirapim laik nogut. (Song 119:37; Kolosi 3:​5, 6) Sampela piksa wokabaut o TV program i strongim dispela tingting olsem pasin gei em i wanpela narapela kain pasin tasol ol man i laik bihainim na i no gat rong long en. Anna i tok: “Tingting kranki bilong ol man i stiaim tingting bilong mi na i paulim mi long ol samting bilong maritpasin. Nau mi save stap longwe long ol man na ol samting i save strongim pasin lesbien.”​—⁠Sindaun 13:⁠20.

◼ Namba foa Painim wanpela man o meri yu ken toktok wantaim, na kamapim ol tingting i stap long bel bilong yu. (Sindaun 23:26; 31:26; 2 Timoti 1:​1, 2; 3:10) Olef i bin askim wanpela elda Kristen long helpim em, na em i tok: “Tok bilong em i helpim mi tru, na mi ting i gutpela sapos mi bin toktok hariap wantaim em.”

No Ken Givap!

Tru, sampela bai tok olsem maski long mekim ol dispela samting, yu mas orait tasol long pasin bilong yu yet na long laik bilong yu long mekim maritpasin wantaim man o meri. Tasol Baibel i tok yu ken mekim pasin i gutpela moa! Olsem: Em i tok sampela Kristen bilong bipo em ol i bin mekim pasin gei, ol i senisim pasin bilong ol. (1 Korin 6:​9-​11) Yu tu inap winim dispela pait​—⁠maski sapos nau dispela pait i stap long bel bilong yu tasol na yu no mekim yet pasin gei.

Sapos laik nogut bilong yu i stap, no ken givap o ting olsem yu no inap senisim pasin bilong yu. (Hibru 12:​12, 13) Sampela taim yumi olgeta i save hatwok long daunim sampela laik nogut. (Rom 3:23; 7:​21-​23) Sapos yu sakim ol laik nogut, ating isi isi ol dispela laik bai i wok long pinis. (Kolosi 3:​5-8) Na bikpela samting tru, askim Jehova long helpim yu. Em i laikim yu tru na em i save long wanem samting i mekim yu i stap amamas. (Aisaia 41:10) Yes, “yu mas bilip tru long God, na mekim gutpela pasin . . . na em bai i givim yu ol samting yu laikim tru.”​—⁠Song 37:​3, 4.

SAMTING BILONG TINGIM

◼ Bilong wanem God i no orait long pasin gei na lesbien?

◼ Yu ken mekim wanem sapos yu gat hevi long pasin gei o lesbien?

◼ Yu ken toktok wantaim husat sapos laik bilong mekim pasin gei na lesbien i putim hevi long yu?

[Ol Futnot]

[Piksa long pes 30]

Askim wanpela strongpela Kristen i bikpela pinis long helpim yu