ASKIM BILONG OL YANGPELA
Yu Ting i No Gat Rong Long Man i Slip Wantaim Man na Meri i Slip Wantaim Meri?
“Taim mi wok long kamap bikpela, wanpela bilong ol samting mi hatwok tru long daunim em laik bilong slip wantaim ol man. Mi ting em samting bai kamap insait long wanpela haptaim, tasol dispela filings i stap yet wantaim mi.”—David, 23.
David em wanpela Kristen husat i laik long amamasim God. Olsem wanem? Em i ken laikim God na long wankain taim em i ken gat laik bilong slip wantaim ol man? God i gat wanem tingting long man i slip wantaim man na meri i slip wantaim meri?
Baibel i tok wanem?
Tingting ol man i gat long man i slip wantaim man na meri i slip wantaim meri i no wankain long narapela narapela kalsa na insait long narapela narapela haptaim. Tasol ol Kristen i no ken larim tingting planti man i gat i stiaim ol, ol i no ken putim yau long “olgeta kain tok i pulim ol nabaut” olsem “win i sakim nabaut ol samting,” nogat. (Efesus 4:14) Ol i mas bihainim ol lo bilong Baibel long tingting ol i holim long man i slip wantaim man na meri i slip wantaim meri (na ol i mekim olsem long taim ol i skelim ol narapela pasin tu).
Lo bilong Baibel long man i slip wantaim man na meri i slip wantaim meri i klia. Baibel i tok:
“Yu no ken slip wantaim wanpela man olsem yu save slip wantaim meri.”—Wok Pris 18:22.
“God i lukim laik i stap long bel bilong ol, . . . na larim ol i bihainim ol dotipela pasin nogut. Ol meri namel long ol, ol i no tingting long slip wantaim ol man, nogat, ol i laik mekim pasin sem wantaim ol meri tasol.”—Rom 1:24, 26.
“No ken giamanim yupela yet. Ol man i save mekim pasin pamuk, lotuim ol imis, mekim pasin adaltri, na ol man i orait long ol man i mekim pasin sem long ol, na ol man i slip wantaim ol man, na ol stilman, ol gridi man, ol spakman, ol man bilong toknogutim ol arapela, na ol man bilong pulim ol samting bilong ol arapela, olgeta dispela kain man bai i no inap i go insait long Kingdom Bilong God.”—1 Korin 6:9, 10.
Tru tumas, ol lo bilong God i bilong olgeta manmeri, maski em ol man i gat laik long slip wantaim man o meri i gat laik long slip wantaim meri, o ol man i gat laik long slip wantaim meri na meri i gat laik long slip wantaim man. Bikpela samting em, olgeta i mas bosim ol yet taim laik bilong mekim ol pasin we God i no orait long en i kamap strong long bel.—Kolosi 3:5.
Yu ting dispela i makim olsem . . . ?
Yu ting dispela i makim olsem Baibel i wanbel long pasin bilong heitim ol gei?
Nogat. Baibel i no wanbel long pasin bilong heitim wanpela, maski em gei o nogat. Tasol Baibel i kirapim yumi long “wok strong long stap bel isi wantaim olgeta manmeri,” maski ol i gat wanem kain sindaun. (Hibru 12:14) Olsem na em i no stret long mekim pasin buli, heitim, o mekim ol narapela samting bilong mekim nogut long ol man i gat laik long slip wantaim man o meri i gat laik long slip wantaim meri.
Yu ting dispela i makim olsem ol Kristen i mas sakim ol lo we i tok orait long man i maritim man na meri i maritim meri?
Baibel i soim olsem lo bilong God i orait long wanpela man na wanpela meri i ken marit. (Matyu 19:4-6) Tasol ol lo ol man i kamapim long man i ken maritim man na meri i ken maritim meri em insait long ol samting bilong wok politik, na i no bikos dispela lo i stret o i no stret. Baibel i tokim ol Kristen long no ken insait long wok politik. (Jon 18:36) Olsem na ol i no sapotim o birua long ol lo bilong gavman we i orait long man i maritim man na meri i maritim meri o man i slip wantaim man o meri i slip wantaim meri.
Tasol olsem wanem sapos . . . ?
Tasol olsem wanem sapos wanpela i wok long bihainim pasin bilong man i slip wantaim man na meri i slip wantaim meri? Em inap long senis?
Yes. Sampela long taim bilong ol aposel i bin mekim olsem! Bihain long Baibel i kamapim olsem ol man i slip wantaim man bai i no inap long go insait long Kingdom Bilong God, Baibel i tok: “Sampela bilong yupela i bin i stap kain man olsem.”—1 Korin 6:11.
Yu ting dispela i makim olsem bihain long ol i lusim dispela pasin, laik bilong man i slip wantaim man na meri i slip wantaim meri i no save kamap gen? Nogat. Baibel i tok: “Yupela i mas werim nupela pasin olsem yupela i werim klos. Stretpela save i mekim na dispela pasin i wok long kamap nupela.” (Kolosi 3:10) So senis em samting wanpela i mas mekim i go i go yet.
Tasol olsem wanem sapos wanpela husat i laik bihainim lo bilong God i gat laik yet long bihainim pasin bilong man i slip wantaim man na meri i slip wantaim meri?
Olsem ol narapela laik i save kamap, man inap mekim disisen long rausim o no ken bihainim dispela laik. Hau bai em i mekim olsem? Baibel i tok: “Yupela i mas larim holi spirit i bosim yet wokabaut bilong yupela, na long dispela rot yupela bai i no bihainim liklik ol laik nogut bilong bel.”—Galesia 5:16.
Lukim dispela ves i no tok laik nogut bai i no kamap long bel, nogat. Olsem na bilong i gat strong long daunim dispela laik nogut, dispela man o meri i mas i gat pasin bilong beten na stadi long Baibel.
David, em yumi stori long en long kirap bilong dispela atikol, i luksave olsem dispela tok em tru—moa yet bihain long em i toktok wantaim Kristen papamama bilong em long dispela hevi bilong em. David i tok: “Bikpela hevi i lusim sol bilong mi, na sapos mi bin hariap long toktok wantaim ol, ating bai mi amamas long laip bilong mi long taim mi bin stap tineja.”
Em tru olsem, yumi stap amamas moa taim yumi bihainim ol lo bilong Jehova. Yumi bilip olsem ol lo “i stret tru na i save mekim man i belgut” na taim “man i bihainim ol, em bai kisim gutpela pe tru.”—Buk Song 19:8, 11.