Baibel i Tok Wanem?
Bihainim “Gutpela Pasin”—Dispela Tasol Em Inap?
WANPELA yangpela meri nem bilong em Allison, em i tok: “Mi save bihainim gutpela pasin long laip bilong mi, na mi wok strong long i stap gutpela meri.” Olsem Allison, planti man i ting em dispela kain pasin tasol God i laik ol i mas bihainim.
Sampela narapela i ting olsem maski ol i mekim bikpela sin tru, God i no tingim dispela sapos olgeta narapela samting long laip bilong ol em i stap stret. Ol i ting olsem God i save redi long fogivim rong na em i no sutim tok long man.
Ol wan wan man i gat narapela narapela tingting long dispela tok “gutpela pasin” i makim wanem samting. Tasol Baibel i tok wanem? Yumi mas mekim wanem bambai God i ken orait long yumi? Wanem samting i makim olsem man i stap gutpela man long ai bilong God?
Redi Long Bihainim Tok Bilong Man Bilong Wokim Yumi
Man Bilong Wokim yumi, God Jehova, em i gat rait long givim ol lo bilong stretpela pasin long yumi. (KTH 4:11) Long Baibel, God i givim ol lo na ol stiatok bilong stiaim pasin na lotu bilong yumi. God i tokim ol manmeri bilong em: “Yupela i mas bihainim olgeta tok bilong mi, na bai yupela i stap lain manmeri bilong mi, na bai mi stap God bilong yupela.”—Jeremaia 11:4.
Olsem na bilong bihainim tingting bilong God long “gutpela pasin,” dispela i makim olsem yumi mas kisim save long ol lo bilong em na stretim ol samting long laip bilong yumi bambai wokabaut bilong yumi i stret wantaim ol dispela lo. Tingim olsem yu laik kamap pren bilong wanpela. Bai yu gat laik long save long pasin dispela man o meri i laik bai ol narapela i mekim long em, na bihain yu mekim ol pasin em i laikim. Baibel i tok, kain olsem Abraham yumi inap kamap pren bilong Jehova—olsem man em Jehova i amamas na orait long em. (Jems 2:23) Na tu, ol tingting na pasin bilong God i antap moa winim yumi, olsem na yumi no ken ting olsem em i mas senisim ol tingting na pasin bilong em na bai i stret long yumi.—Aisaia 55:8, 9.
Em i Bikpela Samting Long Bihainim Tok
Tru tru God bai no orait long yumi sapos yumi sakim ol “liklik” lo i no bikpela samting tumas? Sampela inap ting i no bikpela samting long bihainim sampela “liklik” lo. Tasol i no gat wanpela lo em God i bin putim em i olsem liklik lo tasol na i no bikpela samting, nogat. Lukim tok bilong 1 Jon 5:3, Baibel i no tok olsem sampela lo i liklik samting na sampela i bikpela samting, nogat: “Sapos yumi laikim tru God, orait yumi save bihainim ol lo bilong en.” Taim yumi strong long bihainim olgeta lo bilong God, yumi kamapim klia olsem yumi laikim em tru.—Matyu 22:37.
Jehova i no ting yumi mas kamap nambawan olgeta long olgeta samting yumi mekim, nogat. Sapos yumi bel hevi tru long ol rong yumi bin mekim na wok strong long yumi no ken mekim gen ol dispela pasin, orait em i redi long lusim rong bilong yumi. (Song 103:12-14; Aposel 3:19) Tasol olsem wanem? Yumi inap sakim sampela lo na tingting olsem taim yumi bihainim tok long ol narapela samting, dispela bai karamapim pasin bilong yumi long sakim ol dispela lo? Wanpela eksampel long Baibel i kamapim olsem dispela pasin i no stret.
King Sol bilong Israel i laik bihainim sampela lo tasol bilong God. Taim em i pait wantaim ol Amalek, God i tokim em long no ken larim wanpela animal i stap laip. Em i mas kilim olgeta i dai. Maski Sol i bin mekim ol narapela samting God i tokim em long mekim, em i sakim tok bilong God na em i no kilim “ol gutpela sipsip na bulmakau.” Bilong wanem? Sol na ol narapela man i laik kisim ol dispela animal.—1 Samuel 15:2-9.
Taim profet Samuel i askim Sol, bilong wanem em i no bin bihainim tok bilong God, Sol i tok em i bin bihainim tok bilong God. Em i kolim ol gutpela samting em na lain bilong em i bin mekim, na tu, ol ofa ol i bin mekim long God. Samuel i askim em: “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en? Harim. Pasin bilong bihainim tok bilong en, em i namba wan pasin tru. Na pasin bilong ofaim ol gutpela abus long em, em i namba 2 tasol.” (1 Samuel 15:17-22) Olsem na yumi no inap givim ol ofa o mekim sampela gutpela wok bilong karamapim pasin bilong sakim tok bilong God.
Ol Lo Bilong God i Kamapim Pasin Laikim Bilong Em
Jehova i kamapim klia olsem wanem yumi inap amamasim em. Long Baibel em i kamapim klia ol lo bilong stretpela pasin. Em i tok, dispela ‘em rot yupela i mas bihainim.’ (Aisaia 30:21) Taim yumi bihainim tok bilong em, yumi abrusim pasin bilong bel kaskas na pasin bilong skelim skelim ol tingting bilong ol man i save pait wantaim, long wanem pasin i stret long bihainim. Yumi save olsem tok bilong God i gutpela bilong helpim yumi long olgeta taim, na i ‘skulim yumi na bai yumi i stap gut.’—Aisaia 48:17, 18.
Pasin bilong yumi yet long makim wanem ol pasin i “gutpela pasin,” dispela inap nogutim yumi olsem wanem? Yumi olgeta i bin kisim pasin bilong tingim yumi yet tasol. Bel bilong yumi yet inap giamanim yumi. (Jeremaia 17:9) Em i isi long yumi kisim tingting olsem ol lo God i givim ol i hatwok tumas long bihainim na i save pasim yumi tumas.
Olsem: Tupela singel i laik slip wantaim, ol i ting dispela em samting bilong tupela yet. Ating ol i save olsem pasin ol i mekim i no stret wantaim tok bilong Baibel, tasol ol i ting sapos dispela ‘i no bagarapim wanpela,’ ating God i no gat tok long dispela. Dispela laik bilong ol i pasim tingting bilong ol long luksave olsem samting ol i laik mekim em i no stret na ol samting nogut bai kamap long dispela pasin. Baibel i mekim tok lukaut olsem: “Sampela man i save ting, pasin bilong ol i gutpela na ol i bihainim gutpela rot. Tasol nogat. Ol i mekim i go i go, na bihain bai ol i dai.”—Sindaun 14:12.
Olgeta lo Jehova i putim i kamapim olsem em i laikim tru yumi na em i laik bai yumi abrusim ol pen na hevi. Pasin bilong abrusim ol lo bilong God long pasin pamuk o ol narapela pasin, dispela i no bin helpim ol man long kisim bikpela amamas na stap gutpela, nogat. Dispela pasin i bin putim bikpela hevi long laip bilong ol man. Tasol pasin bilong bihainim ol lo bilong God i helpim yumi taim yumi wok strong long i stap gut na long abrusim ol pasin inap bagarapim yumi yet na ol narapela.—Song 19:7-11.
Sapos yu laik tru long i stap gutpela man em God i orait long em, orait mekim olgeta samting yu inap mekim bilong bihainim tok bilong em. Bai yu lukim olsem “ol lo bilong [God] i no givim hevi long yumi.”—1 Jon 5:3.
YU LAIK SAVE?
◼ Bilong wanem yumi mas bihainim ol tok bilong Man Bilong Wokim yumi?—KTH 4:11.
◼ Olsem wanem? Yumi mas bihainim olgeta lo bilong God?—1 Jon 5:3.
◼ Bilong wanem em i no gutpela tingting long yumi yet i makim wanem pasin i gutpela long yumi bihainim?—Sindaun 14:12; Jeremaia 17:9.
[Piksa long pes 15]
Yu gat wankain tingting olsem God long ol lo bilong stretpela pasin?