Nius i Kam Long Olgeta Hap
◼ “Winim 46,000 pipia plastik i drip long solwara long nau.”—UNITED NATIONS ENVIRONMENT PROGRAMME.
◼ Ol i tok yia 2006 “em i namba 6 yia san i hat liklik winim ol narapela yia.” Tenpela yia em ol i bin hat moa winim ol narapela yia ol i bin kamap insait long 12-pela yia i go pinis.—WORLD METEOROLOGICAL ORGANIZATION.
◼ Lain Beijing Public Security Bureau i tokaut olsem “wan wan famili i mas i gat wanpela dok tasol,” na bai dispela i daunim sik rabies bilong ol dok. Long 2004, inap olsem 2,660 manmeri long Saina i bin i dai long dispela sik.—XINHUA ONLINE, SAINA.
Ol Vidio Gem—Tingting Bilong Ol Man Long Pait
Ol saveman long Iowa State University, long Amerika i tok: “Ol man i pilaim vidio gem i gat pasin bilong pait na bagarapim man long en, dispela inap mekim na ol i no moa pilim olsem em i samting nogut.” Ol wok painimaut bilong pastaim i soim olsem taim man i pilaim dispela kain gem, dispela i save “kirapim tingting bilong em long mekim pasin birua, kros, na klok bilong em i save wok hariap hariap.” Long dispela wok painimaut ol i skelim klok na filings bilong tupela lain i pilaim vidio gem: wanpela lain i pilaim vidio gem i gat pasin bilong pait na bagarapim man, na narapela lain i pilaim vidio gem i no gat pait long en. Bihain tasol long dispela, tupela grup wantaim i lukim sampela piksa i soim pasin bilong pait na bagarapim man. Ol i kisim save olsem “lain i pilaim vidio gem i gat pasin bilong pait na bagarapim man ol i lain pinis long dispela pasin, olsem na taim ol i lukim piksa i soim pasin bilong pait na bagarapim man, ol i no pilim olsem em i samting nogut tru.”
Kaunim Ol Binatang Long Amason
Ol saveman bilong skelim ol binatang i painim pinis 60,000 kain kain binatang long bus bilong Amason. Nius Folha Online i tok ol binatang ol i no painim yet em inap olsem 180,000. Long nau i gat 20 saveman i wok i stap long Amason bilong painim ol binatang. Ol ripot bilong nau i soim olsem ol saveman i painim klostu 3-pela kain kain binatang long olgeta wan wan yia. Dispela i makim olsem bilong ol i ken painim dispela 180,000 binatang olgeta, wan wan saveman i mas wok inap 3,300 yia!
Sot Long Pawa
Nius Our Planet em lain United Nations Environment Programme i kamapim i tok: “Inap olsem 1.6 bilion manmeri—25 pesen bilong ol man—i no gat pawa, na 2.4 bilion i save mekim wok long kain samting olsem pekpek bilong bulmakau na diwai bilong kukim kaikai na hatim skin. Smok bilong ol dispela samting i save kilim i dai 2 na hap milion meri na pikinini long olgeta yia.”
Ol Balus i Flai Long Nait na Graun i Hat
Nius Scientific American i tok smok bilong ol bikpela balus i flai antap i save mekim sampela samting long win. Long san dispela smok i save pasim lait bilong san na dispela i save mekim win i kol. Tasol long nait, em i save holim hat bilong san. Ol saveman bilong Inglan i painimaut olsem “ol balus i flai namel long 6 klok long apinun na 6 klok long moning ol i kamapim inap 60 i go 80 pesen bilong smok i mekim na graun i kamap hat, maski ol dispela balus i flai long nait ol i no planti, ol inap olsem 25 pesen bilong olgeta balus i save flai.”