Rot Namba 7
Stap Gutpela Piksa na Dispela Bai Skulim Pikinini
Bilong wanem yu mas mekim olsem? Pasin yu mekim inap skulim narapela. Olsem: Ating papamama i tokim pikinini long rispek long ol man na mekim tok tru tasol. Tasol sapos papamama yet i singaut bikmaus long narapela narapela o long ol pikinini na ol i mekim tok giaman bilong abrusim sampela wok ol i no laik mekim, ol i skulim ol pikinini olsem ol manmeri i bikpela pinis ol i mas mekim pasin olsem. Saveman Sal Severe, em man bilong raitim buk, em i tok: “Wanpela bikpela rot bilong pikinini i ken lain na kisim save,” em bilong bihainim pasin bilong papamama.
Hatwok bilong en: Ol papamama i save popaia. Aposel Pol i tok: “Olgeta man i bin mekim sin, na olgeta i no inap i stap olsem piksa i soim biknem na strong bilong God.” (Rom 3:23, NW ) Disaipel Jems i toktok long hatwok bilong bosim maus, olsem: “I no gat wanpela man inap long bosim maus bilong em yet. Nogat.” (Jems 3:8) Na tu, sampela pikinini i save traim bel bilong papa o mama i go i go na bihain em i belhat. Larry, em wanpela papa i gat tupela pikinini na em i man bilong i stap isi na bosim bel, tasol em i tok: “Mi kirap nogut olsem, i no hatwok long ol pikinini i mekim mi belhat.”
Wanem samting inap helpim yu? Wok strong long i stap gutpela piksa. Na taim yu popaia na mekim pasin kranki, mekim wok long en bilong skulim pikinini long em i no ken mekim wankain samting. Chris, em wanpela papa i gat tupela pikinini, em i tok: “Sapos mi belhat long ol pikinini o mi mekim samting mi bin tingting pinis long mekim tasol em i nogutim ol pikinini, mi save tokaut olsem mi bin popaia na mi tok sori long ol. Dispela i bin skulim ol pikinini olsem papamama tu i save popaia na yumi olgeta i mas wok strong long mekim pasin bilong yumi i kamap gutpela.” Kostas, em yumi stori pinis long em, em i tok: “Taim mi belhat na mi tok sori long dispela, mi lukim olsem dispela i bin lainim ol pikinini meri bilong mi long tok sori taim ol yet i popaia.”
God Jehova i tok: “Yupela i no ken bagarapim tingting bilong ol pikinini bilong yupela na mekim ol i belhat long yupela. . . . Stretim gut ol pikinini bilong yupela na skulim ol long tok bilong Bikpela.” (Efesus 6:4) Sapos man i gat namba em i no bihainim tok bilong em yet, dispela i save skrapim bel bilong ol wokman na i wankain long ol pikinini tu. Olsem na long pinis bilong olgeta de yu ken askim yu yet olsem: Sapos mi no bin mekim wanpela tok long dispela de olgeta, ol pasin mi bin mekim inap lainim ol pikinini long wanem samting? Em ol wankain samting mi laik skulim ol long en taim mi toktok long ol?
[Rait long pes 9]
“Yupela i save skulim ol arapela manmeri, tasol bilong wanem yupela i no save skulim yupela yet ?”—Rom 2:21
[Ol Piksa long pes 9]
Taim papa o mama i tok sori, pikinini tu i save lain long mekim olsem