Yu Ting Wanpela i Bin Wokim?
Silk Bilong Spaida
◼ Em i no hevi olsem koten, tasol em i strongpela tru winim ain. Inap planti yia ol saveman i skelim silk em orb weaver spaida i save wokim. Wanpela kain silk em ol dispela spaida i save wokim, nem bilong en dragline, em i strongpela tru, winim 7-pela narapela kain silk ol dispela spaida i save wokim. Planti man i laik save tru long dispela silk, long wanem, em i strongpela tru na wara i no inap bagarapim. Em i winim tru silk ol narapela binatang bilong wokim silk i save wokim—em silk ol i save yusim bilong wokim ol klos.
Tingim: Bilong wokim wanpela kain laplap ol i kolim Kevlar, ol kampani i mas hatim tru wanpela kain strongpela marasin. Tasol ol spaida i save yusim wara bilong wokim silk na ol i no hatim. Na tu, dispela dragline silk em i strongpela moa winim Kevlar. Sapos ol i wokim dragline silk i go bikpela olsem sais bilong wanpela soka fil, ol rop bilong en inap pasim wanpela bikpela balus taim em i flai!
Ol saveman i kirap nogut tru long strong bilong dragline silk. Long magasin Science News, Aimee Cunningham i tok: “Ol saveman i laik wokim ol samting i strong tru olsem dispela silk na yusim long kain kain samting olsem ol strongpela saket bilong pasim ol katres bilong gan na ol strongpela rop waia bilong holim ol bris.”
Tasol i hatwok long wokim samting i gat strong olsem dispela dragline silk, long wanem, spaida i save wokim dispela silk insait long bodi bilong em yet na ol saveman i no kliagut long olsem wanem spaida i save wokim. Long magasin Chemical & Engineering News ol i kamapim tok bilong wanpela savemeri, nem bilong em Cheryl Y. Hayashi, olsem: “Yumi pilim olsem yumi samting nating taim yumi tingim olsem planti saveman i traim long wokim samting ol spaida i save wokim, tasol ol saveman i no inap long wokim.”
Wanem tingting bilong yu? Yu ting spaida na strongpela silk bilong em i kamap nating tasol o wanpela Man i gat bikpela save i bin wokim?
[Piksa long pes 24]
Lukluk bilong silk em spaida i wokim (piksa i bikpela)
[Kredit Lain]
Copyright Dennis Kunkel Microscopy, Inc