Baibel i Tok Wanem?

Stap Gut Long Marit​​—⁠Wanem Mining Tru Bilong En?

Planti man i bilip olsem ol marit i mas i stap gut long poroman marit bilong ol. Dispela tingting i stret wantaim tok bilong Baibel, olsem: “Yupela ol marit i mas lukautim gut marit bilong yupela, bai em i stap klin tru long ai bilong God.”​—⁠Hibru 13:⁠4.

BILONG i stap gut long marit, yu ting dispela i makim tasol olsem yu no ken slip wantaim wanpela husat i no poroman marit bilong yu, o i gat sampela samting moa i insait long en? Olsem wanem long pasin bilong tingting nabaut long mekim maritpasin wantaim wanpela husat i no poroman marit bilong yu? Sapos yu man na yu pren gut wantaim wanpela meri, yu ting dispela i olsem yu “no stap gut long marit” bilong yu?

Em Inap Bagarapim Yu o Nogat?

Baibel i soim olsem i stret tupela marit i ken mekim maritpasin​—⁠em samting bilong kamapim amamas. (Sindaun 5:​18, 19) Tasol planti saveman bilong nau i ting em nomol​—⁠na i helpim bodi​—⁠sapos wanpela maritman o maritmeri i tingting nabaut long mekim maritpasin wantaim narapela husat i no poroman marit bilong em. Tasol maski yu no slip tru wantaim narapela na yu tingting nabaut tasol long en, yu ting dispela i no inap bagarapim yu?

Taim wanpela i tingting nabaut long mekim maritpasin, em i tingting long inapim laik bilong bel bilong em yet tasol. Pasin bilong tingim em yet tasol i no stret wantaim tok bilong Baibel long ol marit. Baibel i tok long maritpasin olsem: “Meri i no bos bilong bodi bilong em yet. Nogat. Man bilong en em i bos. Na olsem tasol, man i no bos bilong bodi bilong em yet. Nogat. Meri bilong en em i bos.” (1 Korin 7:⁠4) Sapos ol marit i bihainim dispela tok bilong Baibel, maritpasin bai i no kamap olsem samting bilong inapim laik bilong wanpela poroman tasol, nogat. Tupela poroman wantaim bai kisim bikpela amamas moa.​—⁠Aposel 20:35; Filipai 2:⁠4.

Sapos man i tingting nabaut long mekim maritpasin wantaim narapela husat i no meri tru bilong em, na bihain em i kirap mekim tru dispela pasin, dispela bai bagarapim tru bel bilong meri bilong em. Yu ting pasin bilong tingting nabaut long maritpasin inap kirapim man long mekim pasin pamuk? Yes. Baibel i soim olsem tingting bilong man i save kirapim em long mekim samting: “Bel bilong yumi olgeta wan wan i save kirap na pulim yumi . . . bilong kirapim yumi long mekim sin. Orait na dispela pasin bilong bel i kirap . . . bihain em i save kamapim sin.”​—⁠Jems 1:​14, 15.

Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Taim yu sakim pasin bilong tingting nabaut long pasin pamuk, i olsem yu “was gut tru long tingting bilong yu” na lukautim gut marit bilong yu.​—⁠Sindaun 4:⁠23.

Stap Gut Long Poroman Long Tingting na Bel

Bilong marit i ken i stap gutpela, yu mas givim bel olgeta long poroman marit bilong yu. (Solomon 8:6; Sindaun 5:​15-18) Tru, i orait long sampela man na meri i stap olsem pren bilong yu, tasol yu mas givim bikpela taim moa long meri bilong yu na tingim em na strongim bel bilong em. Sapos yu pas gut moa wantaim narapela na yu no pas gut tumas wantaim meri bilong yu, i olsem yu “no stap gut” long meri bilong yu, maski yu no bin mekim pasin pamuk.a

Dispela kain pasin bilong prenim narapela em inap kamap olsem wanem? Ating yu lukim olsem wanpela meri i gat gutpela skin moa na i save pilim ol hevi bilong yu. Sapos yu lusim bikpela hap taim long toktok wantaim dispela meri long ples wok o long pati samting, dispela inap mekim na bai yu kirap toktok wantaim em long ol samting bilong yu yet na ol hevi i kamap insait long marit bilong yu. Isi isi yu pilim olsem yu mas kamapim ol tingting na hevi bilong yu long dispela meri. Yu bungim em na yutupela i toktok, o yu ringim em o toktok wantaim em long rot bilong Intenet, na yu tokim em long ol samting we i no stret long em i save long en. I stret tupela marit i ken ting olsem i gat sampela samting em tupela tasol i ken toktok long en, na poroman i no ken kamapim sampela “tok hait” bilong tupela yet long narapela man o meri.​—⁠Sindaun 25:⁠9.

Yu mas lukaut, nogut yu ting yu no gat laik long dispela meri! Jeremaia 17:9 i tok, ‘Bel i save tingting oltaim long mekim pasin giaman.’ Sapos yu maritman na yu pren gut wantaim narapela meri, askim yu yet: ‘Taim sampela i askim mi long dispela pren bilong mi, mi save mekim olsem mi no gat asua o mi laik haitim dispela samting? Bel bilong mi bai i stap isi sapos meri bilong mi i harim ol toktok mipela i save mekim? Mi bai pilim olsem wanem sapos meri bilong mi tu i kirap pren gut wantaim wanpela man?’​—⁠Matyu 7:⁠12.

Sapos maritman i pren wantaim narapela meri na tupela i pas gut wantaim, dispela inap bagarapim marit bilong em, long wanem, dispela pasin bai kirapim tupela long mekim pasin pamuk. Jems i tok lukaut olsem, “samting i save kamap long tingting bilong man, em . . . pasin pamuk.” (Matyu 15:19) Tasol maski man i no mekim pasin pamuk, meri bilong em i no inap bilip moa long em, na bai i hatwok tru long stretim dispela hevi namel long tupela. Wanpela maritmeri, em Karen,b em i tok: “Taim mi painimaut olsem Mark i save hait na toktok wantaim wanpela meri long telefon long olgeta de, bel bilong mi i bagarap stret. I hatwok tru long ting olsem tupela i no bin mekim pasin pamuk. Mi no ting bai mi inap bilip moa long em.”

No ken pren tumas wantaim meri husat i no meri bilong yu. Sapos sampela tingting kranki i kamap long bel, dispela i olsem tok lukaut em yu no ken sakim. Sapos yu pren gut wantaim wanpela meri na yu pilim olsem dispela inap bagarapim marit bilong yu, orait, kirap kwik long pinisim dispela kain pasin pren, o no ken toktok tumas wantaim em. Baibel i tok: “Man i gat gutpela tingting, em i save olsem, hevi i laik kamap long em na em i abrusim.”​—⁠Sindaun 22:⁠3.

Lukautim Gut Marit

Man Bilong Wokim yumi em i bin tingting olsem marit i mas pasim gut man na meri olsem ol gutpela poroman tru. Em i tok, maritman na meri bilong em, tupela i “kamap wanpela bodi tasol.” (Stat 2:24) Tupela i kamap wanpela bodi long taim bilong mekim maritpasin, na i no long dispela taim tasol, nogat. Tupela i mas pas gut wantaim tu long tingting na bel, na bilong strongim dispela pasin, narapela i mas tingim ol tingting na laik bilong narapela, na trastim na rispektim em. (Sindaun 31:11; Malakai 2:​14, 15; Efesus 5:​28, 33) Sapos yu bihainim ol dispela stiatok, dispela bai helpim yu long stap gut long poroman marit long tingting na long bel na dispela bai lukautim gut marit bilong yu.

[Ol Futnot]

YU LAIK SAVE?

◼ Yu ting pasin bilong tingting nabaut long maritpasin inap kirapim man long mekim tru dispela pasin?​—⁠Jems 1:​14, 15.

◼ Sapos yu man na yu pren gut wantaim wanpela meri, yu ting dispela inap bagarapim marit bilong yu?​—⁠Jeremaia 17:9; Matyu 15:⁠19.

◼ Olsem wanem yu inap strongim marit bilong yu?​—⁠1 Korin 7:4; 13:8; Efesus 5:​28, 33.

[Rait long pes 21]

“Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.”​—⁠Matyu 5:⁠28