Rot 4: Rispek

“Yupela i mas rausim olgeta pasin bilong . . . belhat na bikmaus na tok bilas.”​​—⁠Efesus 4:⁠31.

Mining bilong dispela. Long olgeta famili, maski ol i stap gut wantaim o ol i gat sampela hevi, sampela taim ol i no wanbel. Tasol ol famili i stap gut wantaim, ol i save toktok gut wantaim na ol i no tok kros na sutim tok i go i kam na mekim tok nogut long narapela narapela. Ol wan wan insait long famili i save mekim pasin long narapela olsem ol i laik bai em i mekim long ol.​—⁠Matyu 7:⁠12.

As na em i bikpela samting. Ol tok man i mekim inap kamap olsem bainat i bagarapim man. Wanpela savetok bilong Baibel i tok: “Sapos man i stap long ples wesan nating, dispela pasin i winim pasin bilong i stap wantaim meri bilong tok kros na toktok planti.” (Sindaun 21:19) Dispela tok i stret tu long wanpela man em maus bilong em i sap tumas. Na Baibel i givim tok long ol papamama olsem: “Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.” (Kolosi 3:21) Sapos oltaim papamama i toktok planti long ol pikinini, bihain ol bai ting ol i no inap mekim wanpela samting papamama i amamas long en. Ating bihain bai ol i les na i no laik traim mekim moa.

Traim mekim olsem. Mekim wok long ol askim i stap daunbilo bilong skelim pasin bilong rispek insait long famili bilong yu.

◼ Long famili bilong mi, taim mipela i no wanbel, wanpela i save belhat na kirap lusim rum i go?

◼ Taim mi toktok wantaim meri o pikinini, mi save mekim kain tok olsem “yu longlong,” o “yu kranki stret,” o kain tok olsem?

◼ Mi bin kamap bikpela insait long famili i save mekim tok nogut long narapela?

Pasim tok long bel. Tingim wanpela o tupela mak yu laik winim long pasin bilong soim rispek long rot bilong toktok bilong yu. (Samting yu ken mekim: Pasim tok long bel olsem yu bai tok “mi” na yu no ken tok “yu.” Olsem: “Mi save bel hevi taim yu . . . ,” na yu no ken tok: “Olgeta taim yu save . . . ”)

I gutpela yu tokim poroman long (ol) mak yu laik winim. Orait tripela mun bihain, skelim wantaim poroman bilong yu olsem yu wok long winim ol dispela mak o olsem wanem.

Tingim sampela rot na bai yu no ken mekim tok nogut taim yu toktok wantaim ol pikinini.

I gutpela yu tok sori long ol pikinini long yu bin mekim tok bilas long ol.

[Piksa long pes 6]

Solwara inap brukim ol ston isi isi, na olsem tasol pasin bilong mekim hatpela tok inap bagarapim pasin wanbel insait long famili