Ol Askim Planti Man i Save Mekim

Bilong wanem sampela man i mekim tok i daunim ol Witnes Bilong Jehova?

Planti man i harim ol stori i no tru. Ating sampela narapela i no laikim wok autim tok ol Witnes i save mekim. Tasol ol Witnes i mekim dispela wok, long wanem, ol i laikim ol man. Ol i save olsem “olgeta manmeri i askim Bikpela long helpim ol, em bai i kisim bek ol.”​—Rom 10:13.

Ol Witnes Bilong Jehova i wanpela lotu Protestan, o lain Fandamental, o wanpela liklik lain lotu?

Ol Witnes Bilong Jehova ol i Kristen, tasol ol i no wanpela lotu Protestan na ol i no bilong lain Katolik tu, long wanem, ol i save olsem Baibel i no as bilong sampela tok ol dispela lotu i lainim ol man long en. Olsem: Baibel i no tok God​—em Man bilong pasin laikim​—i save givim bikpela pen oltaim long ol manmeri long paia bilong hel. Nogat. Na tu, Baibel i no tok olsem ol man i gat wanpela spirit i no save dai, na Baibel i no tok ol Kristen i ken insait long wok politik.​—Saveman 9:​4, 5; Ezekiel 18:4; Jon 15:19; 17:14; Rom 6:23.a

Buk The World Book Encyclopedia i tok: “Lain Fandamental i wanpela lain insait long lain Protestan long Amerika.” Sampela lain Fandamental “i ting olgeta tok bilong Baibel i makim samting tru tru na i no gat wanpela tok piksa long en, na dispela i stiaim tingting ol i gat long sindaun bilong ol man na wok politik.” Ol Witnes Bilong Jehova i no bihainim dispela kain tingting. Olsem yumi stori pinis, ol i no insait long wok politik na ol i no yusim wok politik o sampela narapela rot bilong kirapim ol man long bihainim tingting bilong ol. Nogat. Ol i save toktok wantaim ol man, planti taim wantaim wanpela man o meri, na ol i mekim ol tok i klia tru na i kirapim tingting, olsem ol Kristen bilong bipo i bin mekim.​—Aposel 19:8.

Liklik lain lotu em wanpela grup insait long wanpela lotu em ol i no wanbel wantaim ol tok bilong dispela lotu, o em wanpela lain i bruk long wanpela lotu na i kamapim nupela lotu. Ol Witnes Bilong Jehova i no bin bruk long wanpela lotu. Olsem na ol i no wanpela liklik lain lotu, nogat.

Wanem samting i save kamap long ol miting bilong ol Witnes?

Long miting bilong ol​—em ol pablik i welkam long en​—ol i save stadi long Baibel, na planti taim odiens i ken insait long en na bekim tok. Wanpela miting bilong ol long olgeta wik, em Skul Tiokratik Bilong Autim Tok, i helpim ol lain insait long kongrigesen long lain gut moa long pasin bilong skulim ol man, ritim tok, na mekim wok painimaut. Long narapela 30 minit miting, ol i mekim wanpela tok bilong Baibel em ol man i no Witnes i laik kisim save long en. Bihain long en, ol i stadi long Baibel long rot bilong nius Wastaua. Ol miting i kirap na pinis long rot bilong singsing na beten, na ol i no singaut long mani o salim plet.​—2 Korin 8:12.

Ol Witnes Bilong Jehova i kisim mani we bilong mekim wok bilong ol?

Ol i kisim mani bilong mekim wok bilong ol long rot bilong ol kontribiusen ol man i givim long laik bilong ol yet. Ol Witnes i no askim ol man long baim ol, taim ol i baptaisim man, wokim weding, fiuneral, o mekim ol narapela wok lotu. Na ol i no tokim ol man long givim hap mani bilong ol olsem ofa long lotu. Ol man husat i laik givim kontribiusen, ol i ken mekim olsem long rot bilong putim mani long kontribiusen boks i stap long Haus Kingdom. Ol Witnes Bilong Jehova i save wokim ol buk na nius bilong Baibel em ol i yusim, na dispela i mekim na pe bilong ol buk na nius i no antap tumas, na ol volantia i save sanapim ol Haus Kingdom na ol brens ofis bilong ol.

Ol Witnes Bilong Jehova i orait long kisim helpim long ol dokta?

Yes. Ol i laik kisim nambawan gutpela helpim long ol dokta bilong helpim ol yet na famili bilong ol. Na tu, planti Witnes i wok olsem ol nes, ol ambulens lain, ol dokta, na ol dokta bilong katim man. Tasol ol Witnes Bilong Jehova i sakim blut. Baibel i tok, ‘no ken kaikai blut.’ (Aposel 15:​28, 29) I gat planti dokta moa i tingim pasin bilong i no mekim wok long blut, i olsem gutpela rot tru bilong helpim ol sikman, long wanem, ol sikman inap abrusim planti sik i kamap long rot bilong blut.

[Futnot]

[Blok/Piksa long pes 7]

OL I ORAIT NA RISPEK LONG NARAPELA NARAPELA

Taun Bejucal de Ocampo i stap long sauten Meksiko, i wanpela narakain taun. Nius Excélsior i tok: “Planti bilong ol man i stap long dispela taun, ol i Witnes Bilong Jehova. Long dispela taun, ol man i orait na rispek long gavman na ol man bilong narapela lotu. . . . Ol i lusim pasin bilong dring longlong na smok, na ol i kisim pasin bilong singsing na ritim Baibel. Ol i save rispek tu long wok bos.”

Dispela nius i tok, maski i gat ol narapela narapela lotu i stap long dispela taun, “ol man i no save kros na tok pait long lotu.” Nius i tok moa: “I no gat pasin birua i stap, na maski ol manmeri i bilong kain kain lotu, dispela i no pasim ol long tok gude long narapela narapela . . . Olgeta famili i amamas long tokaut long lotu bilong ol, na dispela i no pasim ol long sindaun gut wantaim ol narapela na stap bel isi. Ol man i no kirap nogut long i gat planti Witnes Bilong Jehova long taun Bejucal.” Na wanpela haiskul tisa long dispela hap, em i no wanpela Witnes, em i tok olsem ol pikinini bilong ol Witnes ‘i save bilas gut, kisim gutpela mak long skul, na mekim gutpela pasin insait long klas.’