Ol Witnes Bilong Jehova i Bihainim Man o Olsem Wanem?

OL I bin sutim tok long Krais Jisas na i tok, em i man bilong kaikai planti, na dring planti, na brukim lo bilong Sabat, na tok giaman, na tok bilas long God, na mekim wok bilong Satan, na bikhet long gavman.​—⁠Matyu 9:34; 11:19; 12:24; 26:65; Jon 8:13; 9:16; 19:⁠12.

Jisas i dai na em i kirap bek, na bihain ol i sutim tok giaman long ol disaipel. Ol i pulim sampela Kristen i go long ol bikman na kotim ol na i tok: “Dispela ol man i save raun na mekim pasin nogut i kamap long olgeta hap bilong graun.” (Aposel 17:⁠6) Long narapela taim ol i kotim Pol tupela Sailas long ol bikman na i tok, tupela i bagarapim bel isi bilong ol man na kamapim pait long taun Filipai.​—⁠Aposel 16:20.

Na ol i sutim tok long Pol na i tok, em “i man bilong kamapim planti trabel. Em i save kirapim kros na pait . . . Na em i lida bilong dispela ol man i bin lusim lain bilong mipela na i kamapim narakain lain, em ol i kolim lain bilong Nasaret. Em i bin traim tu long mekim tempel i kamap doti.” (Aposel 24:​5, 6) Ol bikman Juda long Rom i tok stret taim ol i tok, “ol manmeri i save mekim tok nogut long dispela nupela lain [bilong Jisas] i bin kamap namel long yumi Juda.”​—⁠Aposel 28:⁠22.

Jisas i bin kamapim dispela nupela lain, na ol man i ting ol i gat bilip kranki i no stret long bilip na pasin bilong ol narapela man. Ating planti man bilong nau tu bai ting olsem long ol dispela Kristen. Ol bikman yet i sutim tok giaman long ol, olsem na ol man i ting em i tru. Planti man i bin bilipim tok giaman ol i bin sutim long Jisas wantaim lain disaipel bilong em, tasol yumi save ol dispela tok bilong ol i giaman tasol. Maski ol i bin mekim kain tok olsem, dispela i no makim olsem tok bilong ol i tru.

Orait, olsem wanem long nau? I stret yumi ken tok, ol Witnes Bilong Jehova ol i wanpela lain bilong lotu i gat sampela bilip na pasin kranki i pait wantaim bilip na pasin ol man i ting i stret na i gutpela?

Pasin Tru Bilong Ol

Wanpela bikman bilong gavman long biktaun Sen Pitasbek long Rasia i tok: “Sampela man i bin tokim mipela, ol Witnes i liklik lotu na ol i wok hait na ol i save kilim i dai ol pikinini wantaim ol yet.” Tasol kibung intenesenel bilong ol i bin kamap long Rasia, na ol man i lukim pasin tru bilong ol Witnes, ol i gat gutpela pasin tasol. Dispela bikman bilong gavman i bin mekim sampela wok wantaim ol Witnes long kamapim dispela kibung na bihain em i tok: “Nau mi save, ol Witnes i gutpela lain. Ol i stap amamas, na ol i winim planti man mi save long ol. Ol i stap bel isi, na ol i no pait. Narapela i laikim tru narapela. Olsem na bilong wanem ol man i sutim tok giaman long ol?”

Taim ol Witnes Bilong Jehova i miting, ol i no mekim sampela pasin nogut o lotu long ples hait. Wanpela meri bilong raitim buk, em Julia Mitchell Corbett, em i no wanpela Witnes, tasol em i tok: “Ol Witnes i save miting sampela taim long olgeta wik long Haus Kingdom bilong ol. (Ol i no save kolim sios.) Oltaim ol i save stadi long Baibel na toktok wantaim long Baibel.” Ples miting bilong ol i gat toksave, na olgeta man i ken kam long en, maski ol Witnes i singautim ol i kam o nogat.

Long buk (Religion in America) bilong Corbett em i tok: “Ol Witnes i gat nem olsem ol stretpela man i gat gutpela pasin na ol i man bilong wok.” Planti man i save ol Witnes Bilong Jehova i no bihainim pasin longlong samting, nogat. Pasin bilong ol i stret na i no pait wantaim pasin em ol narapela man nabaut i ting i stret long mekim. Wanpela bikpela buk (The New Encyclopædia Britannica) i tok tru olsem, ol Witnes i gat strongpela lo long olgeta wan wan i mas bihainim stretpela pasin tasol.

Wanpela televisen long Yunaitet Stets i bin mekim tok bilas long ol Witnes long wanpela program (60 Minutes), na dairekta bilong ol tok dispela televisen i kamapim long nius samting em i raitim pas long ol Witnes na i tok: ‘Sapos ol man i bihainim bilip bilong yupela, ol hevi bilong dispela kantri i no ken i stap moa. Mi wanpela niusman, na mi save as bilong oganaisesen bilong yupela em pasin bilong sori long narapela na pasin bilong bilip long God. Yu mas save, i no olgeta man bilong nius i bel nogut long yupela.’

Lotu Ol Man i Save Long En

Ol Witnes i no liklik lain nating i no gat nem. Tru, ol i no planti olsem sampela lain bilong lotu, tasol Jisas i tok: “Dua i go long ples bilong kisim laip, em i liklik tru, na rot i go long dispela ples i hat tru long bihainim. Na wanpela wanpela manmeri tasol i save lukim na bihainim.”​—⁠Matyu 7:​13, 14.

Long 1993 inap 11 milion i bin bung long Memorial ol Witnes i mekim bilong tingim i dai bilong Jisas. Ol Witnes i bihainim stretpela pasin tasol, na dispela i mekim na long olgeta hap ol man i litimapim nem bilong ol. Bipo sampela kantri i bin daunim ol, tasol ol dispela kantri i lukim gutpela pasin bilong ol, na nau ol i orait long ol.

Wanpela lain i gat namba long skelim ol samting (European Commission of Human Rights) i tok, ol Witnes i mas inap long bihainim tingting bilong ol na lotu bilong ol na wanem samting ol i ting em i stret, na ol i ken tokaut long bilip bilong ol na skulim ol narapela man long en. Dispela lain i no inap tok olsem sapos ol Witnes i man bilong giaman na mekim pasin i no stret long grisim ol man na pulim ol.

Ol man long olgeta hap ol i save long pasin bilong ol Witnes Bilong Jehova. Ol Witnes i save stadi wantaim ol man long Baibel, na ol i bin mekim olsem long planti milion man. Sapos yu askim ol dispela man, ‘Ol Witnes i bin grisim o subim o pulim yu long bihainim tok bilong ol?’ ating ol i mas tok, Nogat. Sapos ol Witnes i bin mekim olsem, bai i no gat planti man i ken laikim ol o orait long ol.

Ol i Wok Long Helpim Ol Man

Planti liklik lain lotu ol i save stap longwe long famili bilong ol na ol pren na ol lain nabaut. Tasol olsem wanem long ol Witnes Bilong Jehova? Wanpela niusman long Ripablik Sek i tok: “Mi yet mi no wanpela Witnes Bilong Jehova, tasol ol man i save ol Witnes i strong long bihainim pasin i stret tasol. . . . Ol i daun long gavman, tasol ol i ting Kingdom bilong God tasol inap stretim ol hevi. Tasol ol i no subim ol man long bilipim tok bilong ol, nogat. Ol i wok long helpim ol tasol.”

Na ol Witnes i no save lusim famili bilong ol na ol narapela man na i go sindaun long banis bilong ol yet tasol na i stap longwe long ol narapela. Nogat. Ol i laikim tumas famili bilong ol na ol i lukautim gut famili. Na ol i save sindaun na wok wantaim ol man bilong ol narapela narapela lain na lotu. Sapos wanpela bikpela bagarap i kamap, olsem guria o tait wara o paia samting, kwiktaim ol Witnes i kirap na ol i wok long helpim ol man.

Na ol Witnes i save raun long hap bilong ol na traim bungim olgeta man na skulim ol long tok bilong Baibel, na i no gat narapela skul i olsem. Dispela wok bilong ol long i go lukim ol man long haus bilong ol, ol i mekim long planti kantri na tok ples, winim 200 kantri na 200 tok ples. Wanem ol narapela lotu i save mekim olsem? Tru tumas, ol Witnes Bilong Jehova i gat bikpela tingting tru long helpim ol man.

Tok Bilong Baibel i Stiaim Ol

Tru, bilip bilong ol Witnes i no wankain olsem bilong ol narapela lotu. Ol Witnes i tok, Jehova em God i gat olgeta strong, na Jisas i Pikinini bilong em, na i no gat wanpela god triwan. Ol Witnes i bilip olsem Kingdom bilong God tasol bai pinisim ol hevi na stretim ol samting. Ol i tokaut long bagarap bai painim ol man nogut bilong graun, na God bai truim tok promis bilong em long kamapim paradais long graun na ol man bilong bihainim tok ol bai stap long en. Ol i no lotuim kruse o bilip long Krismas o long man i gat tewel o long God bai putim man long bikpaia. Na ol i no save kaikai blut o kisim blut, na ol i no insait long wok politik o ol pait. Yu ting bilong wanem bilip bilong ol Witnes Bilong Jehova i narapela kain?

Wanpela nius (Daily Hampshire Gazette) bilong Masasusets i tok, ‘ol Witnes i bihainim stret tok bilong Baibel, na dispela tok bilong Baibel i tambuim planti samting ol narapela man i save mekim na ol i ting em i gutpela. Ol i wok strong long bihainim pasin bilong ol Kristen bilong pastaim na ol tok bilong Baibel.’ Na wanpela bikpela buk (The Encyclopedia of Religion) tu i tok, ‘Baibel i as bilong bilip bilong ol Witnes, na ol i kolim ol tok bilong Baibel bilong strongim tok bilong ol, na ol i ting tok bilong Baibel i winim tru bilip bilong ol tumbuna.’ Na wanpela buk (Religion in America) i tok, ‘long olgeta taim ol Witnes i bin stadi long Baibel, na ol i gat planti buk i kamapim ol dispela tok na i gat ol skripsa bilong Baibel long en.’

Husat i Bos Bilong Ol?

Sampela ol lotu i gat bikman bilong ol, na ol i save litimapim nem bilong em na mekim olsem em i wanpela god. Tasol dispela samting i no stret wantaim tok bilong Baibel, olsem na ol Witnes Bilong Jehova i no gat ol lain pris pasto olsem bikman bilong ol. Ol i sakim dispela kain pasin. Dispela buk (The Encyclopedia of Religion) i tok, ol Witnes i no gat lain pris pasto i antap long ol narapela na ol i gat ol bikpela nem na namba, nogat.

Ol Witnes i bihainim Krais Jisas, em i Bikpela bilong ol na Gopas bilong ol na em i Bos bilong lain Kristen. Jisas i bin tok: “Ol man i no ken kolim yupela ‘Tisa.’ Nogat. . . . Yupela olgeta i stap brata brata. Na . . . no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ ” Jisas i hetman bilong ol.​—⁠Matyu 23:​8-12.

Olsem na yumi ken save, ol Witnes Bilong Jehova i no lain bilong wanpela man, na ol i no gat ol pasin kranki bilong lotu. Na Jisas tu, yumi save em i no man bilong kaikai planti na dring planti. Long bipo ol man i bin tok giaman long Jisas na ol disaipel, na dispela i paulim tingting bilong sampela man na ol i tok bilas long ol, tasol sampela nogat. I olsem tu long ol Witnes. Sapos yu laik save tru long bilip na pasin na wok bilong ol yu ken i go long Haus Kingdom bilong ol na bungim ol na kisim save long ol. Haus Kingdom bilong ol i op long olgeta man i laik painim tok i tru.

Stretpela save bilong Baibel ol i wok strong long kisim, em inap helpim yu tu na yu ken lain long lotuim God olsem Jisas i bin tok: “Olgeta man i laik lotu tru bai ol i lotu long Papa [long spirit bilong ol yet]a na long pasin i tru. Na Papa i laikim tumas bai ol kain man olsem i mas lotu long em.”​—⁠Jon 4:⁠23.

[Ol Futnot]