Lotu i Bihainim Man

FEBRUERI 28, 1993​—⁠long dispela taim winim wan handet polis samting i banisim wanpela kompaun i gat planti haus long en na ol man meri pikinini i stap insait. Ol polis i laik painim ol gan na holim wanpela man ol i ting em i bin mekim rong. Tasol ol man insait i kirap na sut long ol long gan, na nau ol polis i bekim na ol tu i kirap sut long gan i go bek long ol.

Inap 10-pela man i dai long dispela pait, na sampela moa i kisim hap bagarap. Inap 50 de moa ol dispela man insait long haus ol i sakim ol polis, na planti handet polis i pait wantaim ol long gan, na 86 bilong ol i dai, na 17 ol i pikinini.

Wanem as na dispela samting i bin kamap? Ating ol i raskol na ol i wok bisnis long ol drak, a? O ating ol i insait long wok politik na ol i laik daunim wok gavman, a? Nogat. Ol i bilong wanpela lotu i save bihainim wanpela bikman bilong ol. Banis bilong ol i bin stap long sentral Teksas long Yunaitet Stets, na dispela stori bilong ol i bin kamap long ol nius na redio na televisen long olgeta hap, na ol i tok, kain lotu olsem em i samting nogut.

Taim ol man i harim stori bilong dispela samting ol i tingim sampela ol narapela lain bilong lotu em ol bikman bilong ol i mekim na ol i kisim bagarap. Long 1969 long Kalifonia, bikman bilong wanpela lain, nem bilong em Manson, em i bin kilim i dai sampela long lain bilong em. Na long 1978 wanpela lain bilong lotu ol i kilim i dai ol yet long Jonstaun long Guyana, na long 1987 long Korea lain bilong wanpela lotu em Park Soon-ja i kamapim, ol i pasim tok wantaim na narapela i kilim i dai narapela na bihain ol i bagarapim ol yet, na 32 bilong ol i bagarap. Ol dispela lotu i tok ol i Kristen na ol i bilip long Baibel.

Ol man i save daun long Baibel na i bilip olsem em i Tok bilong God, ol i bel nogut tru long pasin bilong dispela lain long mekim wok nogut long Baibel. Olsem na ol man i bin kirapim planti handet oganaisesen bilong skelim wok bilong ol dispela kain lotu na bilong kamapim long ples klia ol pasin na wok nogut bilong ol. Ol saveman i tok, ol man i tingting long nupela taim bai kamap bihain liklik, na dispela kain tingting i as na planti kain nupela lotu i kamap. Wanpela nius i tok, ‘i gat planti tausen lotu olsem i stap, na ol i redi long kisim yu na bosim tingting na skin bilong yu. Tru, planti ol i no gat gan, tasol klostu olgeta ol inap bagarapim ol man. Ol bai wok long giamanim yu na pulim ol mani kago bilong yu na bosim olgeta samting bilong yu, na wokim marit bilong yu taim yu laik marit, na planim yu taim yu dai.’

Em Wanem Kain Lotu?

Sampela ol misin i no stori tumas long ol dispela kain lotu i gat bikman bilong ol na ol i bihainim em na em i bosim ol na stiaim tingting bilong ol.

Wanpela bikpela buk (The World Book Encyclopedia) i stori long ol kain lain olsem, na i tok, yumi ken kolim olsem wanpela lotu, long wanem, ol i mekim ol pasin bilong lotu. Dispela buk i tok, ‘kirap long yia 1950 samting, ol man i gat narapela tingting long ol dispela kain lotu. Long nau ol i tok, ol liklik lain lotu em man yet i kamapim na em i stap bos bilong dispela lain, ol i gat ol nupela bilip na pasin i narapela kain long olgeta bikpela lotu.’

Na wanpela nius (Newsweek) i tok, ‘ol dispela kain nupela lotu, lain bilong ol i liklik lain tasol, na wanpela man tasol i kamapim, na lain bilong em i kisim nem na strong long em.’ Na narapela nius (Asiaweek) i tok, ‘dispela kain lotu i olsem nupela lotu i bin kamap, na wanpela man tasol i bin kamapim, na em i save tok em i kain olsem God.’

Ol bikman bilong provins Merilan long Yunaitet Stets i pasim wanpela tok na ol i tok bilas long dispela kain lotu. Ol i tok, ‘lain bilong en i givim bel tumas long wanpela man o wanpela tingting, na wok bilong dispela lotu i no stret na i bilong grisim o bosim ol manmeri bilong dispela lotu na bai ol i ken kamapim laik bilong dispela man i stap bikman bilong ol.’

Ol man i ting bilip na pasin bilong ol dispela lotu i kranki na i no stret wantaim pasin na sindaun ol man i lain pinis long en. Ol i save tok, lain bilong ol i save bung hait, na ol i no save pas tumas wantaim ol narapela man o narapela lain, na ol i save litimapim nem bilong bikman bilong ol, na dispela man i save tok, God yet i bin makim em, o em i olsem wanpela god.

I gat sampela oganaisesen ol i laik rausim ol lotu i bihainim wanpela man, na sampela taim ol i sutim tok long ol Witnes Bilong Jehova na ol i tok, ol Witnes i gat kain lotu olsem. Na nau long dispela taim sampela nius tu i bungim ol Witnes wantaim ol dispela liklik lotu em bilip na pasin bilong ol i narapela kain. Tasol yu ting ol Witnes Bilong Jehova i wanpela liklik lain nating na i no gat nem? Yu ting ol i stap longwe long ol narapela man na long famili bilong ol na ol i no laik bung wantaim ol? Yu ting ol i giamanim o grisim ol man na bai ol i ken pulim sampela i kam insait long lain bilong ol? Nogat, a? Ol Witnes Bilong Jehova i no olsem.

Ol bikman bilong ol dispela liklik lain lotu ol i bosim strong tingting bilong lain bilong ol. Tasol yu ting ol Witnes Bilong Jehova i save mekim olsem? Yu ting ol samting bilong lotu bilong ol em i samting bilong pasin hait? Ol i save lotuim wanpela man bilong graun? Yu ting ol i wanpela liklik lain lotu kain olsem ol dispela lain yumi stori long ol?

[Piksa Kredit Lain long pes 3]

Jerry Hoefer/Fort Worth Star Telegram/Sipa Press