Pasin Bilong i Stap Stret—Bilong Wanem?
WANPELA saveman bilong lotu long Barnard College/Columbia University, em Randall Balmer, em i tok, tingting long i stap stret na no ken pamuk i kamap olsem wanpela lotu long planti yangpela long nau. Ol i ting mobeta ol i wet inap long ol i bikpela pinis na bihain ol i ken mekim maritpasin.
Planti lotu i strong long ol yangpela i no ken mekim maritpasin. Tasol saveman Balmer i tok: “Samting i save kirapim ol yangpela long sakim maritpasin i no samting bilong lotu, nogat; em samting bilong skin. As tru na ol i no laik pamuk, em pret—ol i no pret long strafe bilong God bai painim ol, nogat; ol i pret long wanpela bikpela sik bai kilim ol i dai.” Olsem na dispela saveman i skelim lotu bilong Virgo Maria—em i makim wanpela pasin bilong lotu ol man i mas wok long winim, olsem i stap tambu long maritpasin—wantaim tingting bilong ol yangpela long nau long i stap stret na no ken pamuk, nogut wanpela sik i painim ol.
Saveman Balmer i tok moa: ‘Sori tru, lotu i no gat strong long kirapim ol man long nau long bihainim pasin i stret, tasol pret long kisim bikpela sik i save kirapim ol long mekim olsem. Ol bikman bilong lotu i tingting planti—nogut ol i strong long ol man i mas bihainim stretpela pasin na ol man i bel nogut long dispela. . . . Em nau, ol saveman na ol dokta samting i mas givim toksave long ol yangpela long ol i mas mekim wanem long ol samting bilong maritpasin.’
Tasol ol Kristen tru i narapela kain. Tingim yangpela man Chad, em i go bikpela olsem wanpela Witnes Bilong Jehova. Wanpela yangpela meri i kam toktok long Chad, na bihain liklik Chad i save, meri i no kam bilong toktok tasol. Chad i tok: “Wantu tingting bilong mi i klia—mi no ken bagarapim bel bilong Jehova. Olgeta taim mi tingting long amamasim Jehova, olsem na mi tokim meri mi mas lusim em.”
Olsem Chad, planti yangpela Witnes Bilong Jehova ol i wok long bihainim pasin i stret na ol i no mekim olsem bilong lukautim skin tasol, nogat; ol i gat bikpela tingting na laik long amamasim Man i bin wokim ol, God Jehova. Pret long kisim bikpela sik i no mekim na ol i bihainim pasin i stret, nogat. Ol dispela yangpela i save bihainim tok bilong Saveman 12:1: “Taim yupela i yangpela yet, yupela i mas tingim [God].”