Yu Ting Wanpela i Bin Wokim?
Glu Bilong Liklik Snek Sandcastle
● Bilong stretim ol bun i bruk, ol dokta i save yusim ol pin na skru samting, tasol ol dispela samting i bikpela tumas long pasim ol liklik hap bun i bruk. I kam inap long nau, ol saveman i tingting planti long olsem wanem ol inap wokim kain glu i save pas strong insait long bodi bilong man. Ol i skelim pasin bilong liklik snek sandcastle na ol i ting ol i painim rot bilong stretim dispela hevi!
Tingim: Liklik snek sandcastle i save stap long as bilong solwara. Em i save kisim wesan na pipia sel bilong kina na wokim haus bilong em i luk olsem liklik paip. Em i save yusim glu i stap long wanpela glan long bodi bilong en bilong gluim ol dispela samting wantaim. Dispela glu i strong moa na i winim ol glu ol man i yusim long nau. Em i gat ol marasin protin i narapela kain—taim ol dispela protin i miks wantaim, dispela i mekim na glu i save pas strong hariap insait long wara! Ol i kolim liklik snek sandcastle olsem saveman bilong wokim haus long ston, na i gat as na ol i kolim em olsem. Russell Stewart bilong University of Utah i tok dispela liklik snek i stretim pinis “sampela hevi bilong pasim strong ol samting long glu.”
Ol saveman i bin wokim sampela glu i wankain olsem glu bilong dispela liklik snek, tasol strong bilong ol dispela glu i bikpela moa. Glu em ol dokta bai yusim bilong pasim ol bun i bruk, em glu we i mas pinis nating taim ol bun i pas gut wantaim. Sapos dispela glu i wok gut long bodi bilong ol man, bai em i wanpela bikpela samting tru bilong helpim wok bilong ol dokta.
Yu ting wanem? Glu bilong liklik snek sandcastle i kamap nating o wanpela man i bin wokim?
[Piksa long pes 22]
Ol saveman i ting ol inap stretim ol bun i bruk na ol i no yusim ol skru o pin samting
[Piksa Kredit Lain long pes 22]
Sandcastle worm: © Peter J. Bryant, University of California, Irvine