Snek Gini—Em Bai Pinis

Wanpela man long Naijiria i raitim dispela stori bilong Kirap!

OLGETA de i save hat. Chinyere i pasim pikinini bilong em long baksait bilong em, na em i kisim tupela botol bilong em na wokabaut long rot em das i pulap long en. Em i wokabaut klostu long ol bikpela gaden em san i kukim pinis na em i kamap long wanpela liklik raunwara. Long dispela ples tasol em inap kisim wara. Arere long wara, graun i malumalum na em i wel, olsem na Chinyere i wokabaut isi i go daun long wara.

Em i lukim ol pukpuk i slip nabaut long ol gras i drai, na sampela i stap insait long wara, tasol em i no pret. Wanpela man i stap klostu long wara em i tok: ‘Ol i no mekim wanpela samting long mipela, na mipela i no mekim wanpela samting long ol.’

Tasol yumi no inap mekim wankain tok long sampela liklik binatang em ol i stap insait long dispela wara. Chinyere i no inap lukim ol dispela liklik binatang, long wanem, ol i liklik tru. Ol i stap insait long wara em i kisim long tupela botol bilong em.

Snek Gini i Samting Nogut

Chinyere i kamap long haus bilong em na em i kapsaitim wara long wanpela sospen graun. Bihain Chinyere i kisim liklik wara bilong dring. Wanpela yia bihain em i lukim wanpela samting daunbilo long skru bilong lek. Taim em i lukim na holim em i olsem wanpela liklik rop bilong blut. Tasol em i no wanpela rop bilong blut. Liklik binatang i bin stap insait long wara em i bin dring wanpela yia bipo na nau em i kamap wanpela snek. Em snek gini na longpela bilong en em 80 sentimita.

Nau snek i mekim na wanpela buk i kamap long skin na em i pen nogut tru. Buk bai bruk na dispela snek, em i waitpela liklik, isi isi em bai kam ausait long skin bilong Chinyere. Tupela i go inap fopela wik i mas pinis pastaim na dispela snek bai kam ausait olgeta. Olsem na Chinyere i no inap wokabaut planti, em i mas stap long haus na pen i bikpela moa. Taim dispela buk i bruk em inap sting, long wanem, ol binatang jem i stap, olsem na dispela meri inap kisim sik tetanas, sepsis, atraitas, o traipela buk.

I gat wanpela snek tasol long skin bilong Chinyere, tasol sampela man i save kisim planti snek long skin bilong ol. Planti bilong dispela snek i save kam ausait long lek, tasol wan wan taim ol i kamap long sampela narapela hap bilong bodi, olsem long het, o bros, o tang.

Wol Helt Oganaisesen i tok, ol i wok strong long pinisim dispela snek na ol i ting em bai pinis olgeta. Dispela lain i tok, nau i no planti man i bagarap long dispela snek​—3 milion samting tasol, na planti bilong ol dispela man i stap long Pakistan, India na 17 kantri bilong Afrika. Tasol long 10-pela yia i go pinis dispela snek i bin kisim 10 milion man. Nau long Esia dispela snek gini i no planti, klostu em i pinis olgeta. Na ol i ting snek gini bai pinis long ol kantri Afrika paslain long pinis bilong yia 1995.

Em i No Nupela Samting

Snek gini i bin bagarapim ol man bilong bipo tu. Planti man bilong Midel-Is na Afrika long bipo i bin bagarap long dispela snek. Ol i bin painim skin bilong wanpela pikinini Isip bilong bipo em i gat 13 krismas. Wanpela snek gini i kamap olsem ston i stap insait long skin bilong em. Ating dispela snek i mekim na em i bin kisim sua nogut, olsem na ol i katim tupela lek bilong em.

Planti ol rait bilong bipo i stori long snek gini. Namba wan rait bilong bipo em i stori long dispela snek, em long ol rait Isip. Ol dispela rait i stori long pasin ol i mekim taim snek i wok long lusim skin bilong man. Ol i bin larim snek i baut baut long wanpela stik. Wanpela man Grik (Agatharchides) na em i bin stap paslain long Krais, em i bin tok: ‘Ol man i bin kisim sik long solwara Retsi em ol sik bipo ol man i no save long en, olsem: ol liklik snek i lusim skin bilong ol na ol i kaikaim lek na han bilong ol, na taim man i holim, ol i go bek insait long skin na pas long ol masol. Ol i mekim olsem na ol man i kisim bikpela pen.’

Samting Bilong Mekim

I gat wanpela savetok olsem: ‘Bilong pasim wanpela samting, dispela i winim wok bilong stretim,’ na dispela tok i stret long sik bilong snek gini. I no gat wanpela samting bilong oraitim dispela sik sapos man i dringim pinis wara i gat ol kiau bilong snek gini long en. Ol i mas wet inap long taim buk i kamap, tasol em i no bruk yet na snek i no kam ausait long skin. Long dispela taim dokta i gat save long dispela samting, na em inap katim liklik skin bilong man klostu long snek, na mekim wok long wanpela tul i gat huk bilong pulim isi isi dispela snek i kam ausait. Dokta inap pinisim dispela samting kwiktaim.

Tasol sapos buk i kamap na i bruk na snek yet i wok long kam ausait long skin, dispela hap bai solap na hat, na i hatwok long pulim dispela snek i kam ausait. Sapos olsem, i gutpela long man i gat dispela snek em i bihainim pasin bilong ol man bilong bipo. Taim snek i lusim skin, larim em i baut baut long wanpela liklik stik. No ken pulim strong. Isi isi man i mas mekim dispela samting, nogut bodi bilong snek i bruk. Sapos bodi bilong snek i bruk, hap bilong en bai go bek insait long man na skin bai solap na pen nogut tru.

Sapos snek gini i stap pinis long skin bilong man, i no gat planti samting ol dokta inap mekim, tasol man yet inap mekim planti samting na dispela binatang i no ken kamap long skin bilong em.

Samting Bilong Winim Snek Gini

I gat sampela samting ol man inap mekim na ol i no inap bagarap long dispela snek. Olsem: Wokim wanpela hul wara, olsem na kiau bilong snek i no inap go insait long en. Na boilim wara bilong dring bilong kilim i dai dispela binatang, o pasim liklik laplap long sospen samting na sipim dispela wara. Na ol i ken putim marasin insait long raunwara, em marasin i no inap bagarapim ol animal na ol man, tasol em bai kilim i dai ol kiau bilong dispela binatang.

Ol saveman i wok strong long painim ol liklik ples long ol kantri i gat dispela sik i stap yet. Na ol i wok long helpim ol man long mekim sampela samting na ol i no ken kisim dispela sik. Inap long nau ol wok ol i mekim i kamap gutpela tru. I olsem klostu nau dispela snek gini i pinis olgeta, na taim em i pinis, i no gat wanpela man bai bel hevi o sori long dispela samting.

[Piksa long pes 26]

Paslain long dringim wara nogut yu mas boilim o sipim em