Sampela Tok i Kam Long Olgeta Hap
Nupela Katekismo Bilong Lotu Katolik
Vatiken i tokaut long ol bai kamapim nupela katekismo bilong olgeta Katolik. Ol i bin wok 6-pela yia long redim dispela samting. Taim lotu Katolik i kirap na i kam inap long nau, em namba 2 taim tasol misin i bin kamapim nupela katekismo. Namba wan katekismo bilong olgeta Katolik i bin kamap long yia 1566 bihain long Kibung bilong Trent. Na ol i kamapim dispela nupela katekismo bilong pasim wok bilong ol Talatala. Wanpela nius (Le Monde) bilong Frans i tok, dispela nupela katekismo i tingim ol man i laik bai misin i senisim sampela lo bilong en, na em i tingim ol man i strong long holim yet ol olpela lo bilong misin, na kirap long taim misin i wokim bung Vatiken 2 ol i kirap long tokaut long misin i mas kamapim wanpela katekismo i gat ol olpela lo. Taim Pop John Paul Namba 2 i orait long dispela nupela katekismo em i tok dispela bai helpim misin long ol narapela kantri taim ol i kamapim katekismo bilong ol yet.
Em i Gutpela Long Stap Laip Longpela Taim?
Long dispela taim nau ol saveman i kisim bikpela save long ol samting bilong marasin, olsem na ol inap helpim planti man long stap laip longpela taim liklik. Wanpela bikman (Dr. Hiroshi Nakajima) bilong Wol Helt Oganaisesen em i tok, maski ol saveman i helpim ol man long stap laip longpela taim liklik, ol i no inap helpim sindaun bilong olgeta man na pinisim sik bilong ol. Wanpela nius (Le Figaro) bilong Paris i bin givim sampela askim long Dokta Nakajima na nius i kamapim tok bilong em olsem: ‘Ol man i sik o skin bilong ol i bagarap, ating namba bilong ol i go antap. Na planti bilong dispela lain em ol lapun.’ Long nau long olgeta hap planti man i save kisim 65 krismas. Long ol kantri i gat planti wok bisnis, planti man i save kisim 76 krismas, tasol long ol kantri i no gat planti wok bisnis, planti man i save kisim 50 krismas tasol. Kirap long yia 1993 i go inap long yia 1998 Wol Helt Oganaisesen i ting ol inap helpim ol man long skruim narapela 4-pela mun long krismas bilong ol. Tasol Dokta Nakajima i tok: ‘Sapos ol inap helpim man long stap sampela mun moa, i no olsem em i no inap kisim bikpela sik o skin i no ken bagarap.’
Kolosium i Laik Bagarap
I gat wanpela savetok bilong ol Grik bilong bipo olsem: ‘Sapos Haus Kolosium i sanap, Rom bai sanap.’ Tasol ren na pasin bilong ol man long bagarapim win na wara na graun i wok long bagarapim dispela haus stediam i gat nem. Na ol ka na bas samting i ran i go i kam na dispela i mekim na dispela stediam i meknais liklik. Ol man i pret, nogut ol hap hap ston bilong dispela stediam i pundaun, na long sampela hap bilong dispela stediam ol i mas putim sampela samting olsem simen o ain bilong strongim ol banis, nogut ol dispela hap i pundaun olgeta. Bilong mekim olsem na bai dispela stediam i no ken bagarap moa, wanpela beng bilong Rom na wanpela lain i save tingim ol olpela samting bilong ples (Italian Ministry of Cultural Heritage), i pasim tok long mekim sampela samting bilong helpim dispela wok. Namba wan samting ol i mas mekim, em long pasim wara na em i no ken go insait moa na bagarapim, na ol i mas stretim ol banis. Bipo tru ol i bin wokim plua bilong dispela stediam long diwai plang, na nau ol i laik wokim gen long plang. Wanpela nius i tok, pe bilong stretim dispela stediam i olsem 32 milion kina. Ol man na meri na ol bisnisman long Itali i pasim tok long helpim wok long stretim dispela haus stediam. I no gat narapela kontrak long Itali i winim dispela long stretim wanpela gutpela samting ol i bin wokim bipo bipo na bai em i no ken bagarap olgeta.
Taim Mani i No Gat Strong Pasin Bilong Ol Man i Bagarap
Sapos longpela taim liklik pe bilong ol samting i antap tru na mani i no gat strong moa, dispela samting bai mekim wanem long ol man? Wanpela nius (Veja) i kamapim tok bilong wanpela man (Eduardo Giannetti da Fonseca) bilong Yunivesiti Sau Paulo bilong bekim dispela askim. Dispela man i save skelim ol wok bisnis na hevi bilong mani na em i tok: ‘Taim pe bilong ol samting i go antap, na mani i no gat strong moa, na planti man i no gat wok mani, dispela i mekim na ol man i lusim stretpela pasin. Sapos ol man long wanpela kantri i holim liklik mani na ol i no save long mun bihain dispela mani i gat strong o nogat, em i hatwok long ol i bihainim ol stretpela pasin olsem: No ken tok giaman, mas tok tru, na kamap long wok long taim stret, na stap gut.’ Long lukautim ol yet na famili bilong ol long ol samting bilong skin, ating olgeta man, maski ol i wok long gavman o ol i man nating, ol i ting i orait long lusim stretpela pasin. Dispela man bilong yunivesiti i tok moa: ‘Taim pe bilong ol samting i go antap na mani i no gat strong moa, dispela i save kamapim planti pasin nogut.’
Ol i Kisim Drak Steroid na Skin i Kamap Narapela Kain
Inap longpela taim liklik ol man i save, ol man bilong pilai spot i save kisim ol drak steroid bilong strongim skin na ol i ken mekim gut pilai bilong ol. Tasol long dispela taim planti man nating, olsem ol man i no save pilai spot samting, ol i kisim ol drak steroid bilong strongim skin na skin i ken kamap gutpela. Sampela man i skelim dispela samting na Wol Helt Oganaisesen i kamapim save ol i kisim olsem: Long Amerika long ol yangpela man i stap longpela taim liklik long haiskul, 6.6 pesen i bin kisim ol drak steroid. Long dispela lain yangpela, 26 pesen i tok, ol i bin kisim dispela drak, long wanem, ol i laik bai skin bilong ol i kamap gutpela. Sampela hevi ol man i kisim taim ol i kisim ol drak steroid em olsem: Wanpela kain gris ol i kolim kolestrol i go antap na em i save nogutim skin, o ol i kisim sik long ol bikpela rop i karim blut i go long klok, o bikpela glan klostu long maus bilong rop bilong pispis i go bikpela moa, o lewa i kisim sua olsem buk, na planti sik moa. Na ol saveman i ting, ol drak steroid i mekim na man i kisim ol dispela drak i save kamap man bilong kros na pait.
Tingting Bilong Sampela Man Long Sik AIDS
Wanpela nius (Saturday Star) bilong Johanisbek long Saut Afrika i tok, ‘Planti man long Saut Afrika i no ting sik AIDS em wanpela bikpela sik, na sampela i ting dispela sik i no i stap. Sampela i ting sik AIDS em wanpela samting ol man bilong Wes i bin kamapim bilong daunim Afrika. Na sampela i ting sik AIDS em wanpela marasin bilong ol waitskin bilong pasim ol blakskin Afrika na ol i no ken karim planti pikinini. Narapela samting i save mekim na planti man i no tingting tumas long sik AIDS, em ol kros pait i save kamap olgeta de long planti kantri long Afrika. Long wanpela kantri bilong Saut Afrika ol kros pait i save kamap long en, wanpela man bilong Saut Afrika i tokim sampela man bilong wanpela lain i save tokaut long sik AIDS olsem: ‘Yu save tokim mi, insait long 10-pela yia sik AIDS inap bagarapim mi, tasol long Sarere Sande i go pinis 25 manmeri i bin i dai, long wanem, kros pait i kamap long gavman. Olsem wanem? Sik AIDS inap bagarapim mipela, winim ol narapela samting i save bagarapim mipela long nau?’ Olsem na sapos ol man i no senisim tingting bilong ol long dispela sik, inap 10-pela yia i go inap 15 yia bihain, dispela bikpela sik bai painim planti man moa.
As Bilong Sik Bilong Bel i Tanim
Klostu olgeta man i bin kisim sik bilong bel i tanim. Planti milion man i kisim dispela sik taim ol i raun long ka o balus o kanu samting. Ol saientis i ting nau ol i save bilong wanem ol man i kisim dispela kain sik. Ol i ting as bilong dispela sik em kru bilong man. Ai i lukim wanpela samting na toksave long kru, na insait tru long yau em i pilim wanpela samting na yau i toksave long kru, tasol tupela toksave i no wankain. Olsem: Sapos man i sindaun long wanpela kanu i meknais, insait tru long yau bilong em, yau i pilim skin bilong em i meknais, tasol ai bilong dispela man i lukluk nabaut na em i lukim ol samting i stap isi, na taim kanu i meknais, skin bilong man i meknais wantaim kanu. Em nau, kru bilong man i kisim tupela kain toksave, olsem na kru i kamapim sampela samting ol i kolim homon, em ol homon i save kamap taim tingting na bel bilong man i no stap isi. Na long bel bilong man ol masol na rop i meknais hariap, olsem na nau bel bilong man bai tanim na em bai traut. Ol man i ken mekim wanem na ol i no ken kisim sik bilong bel i tanim? Taim man i laik raun long balus, o ka, o kanu samting, i gutpela sapos pastaim em i kaikai liklik kaikai tasol, olsem bret o drai bisket o kaukau samting. Em i no gutpela long kaikai samting i gat planti gris. Na tu, taim man i sindaun olsem pasindia long ka, na ka i ran long rot i save baut baut, i gutpela sapos em i lukluk long arere bilong rot. Sapos em i sindaun long kanu, i gutpela sapos em i lukluk i go longwe, olsem na ai inap lukim samting na insait tru bilong yau em bai pilim dispela samting. Nogut het o skin bilong man i meknais planti. Na sapos man i tingim ol narapela samting, olsem sapos em i stap long ka, em i no tingim rot, o sapos em i stap long kanu, em i no tingim wara, dispela bai helpim em na bel i no ken tanim.
Ol Man i Lapun Liklik Ol i Pinis Long Wok Mani
Wanpela nius (The Star) bilong Johanisbek long Saut Afrika i tok: ‘Sapos yu winim pinis 40 krismas, nogut yu tingting long lusim wok mani bilong yu na kisim narapela.’ Planti wok bisnis i bagarap, olsem na planti man long Saut Afrika i pinis long wok mani. Sapos wanpela bisnis i mas pinisim sampela man long wok, ol i save pinisim ol man i lapun liklik, long wanem, i no longtaim tumas na ol bai laik long pinis long wok. Wanpela lain (Department of Manpower) i tok, long Saut Afrika long olgeta mun, ol bisnis i save pinisim 37,500 man long wok. Dispela nius i tok moa olsem: ‘Dispela hevi bilong Saut Afrika i save kamap long ol narapela kantri tu. Long planti wok bisnis, nau yu no inap painim planti man na meri i lapun liklik, wan wan tasol. Na wanpela lain (The Organisation for Economic Co-operation and Development) i tok, planti bisnis i no laik kisim man o meri i gat 55 krismas o i winim 55 krismas. Long Japan tasol i gat planti lapun i wok yet. Long olgeta wan handet wan handet lapun Japan, 60 i save wok mani.