Onest Pasin Inap Helpim Yu

“Samting yu bin kisim long pasin bilong giaman, bai yu ting em i swit moa olsem gutpela kaikai. Tasol bihain em bai i kamap nogut tru, olsem wesan i pulap long maus bilong yu.” —Sindaun 20:17.

YU TING man i mas mekim pasin giaman na bai bisnis bilong em i ken wok gut? Nogat. Planti taim pasin giaman i save givim hevi long man husat i mekim dispela pasin. Bilong wanem? Long wanem, taim man i mekim pasin giaman, ol narapela i no inap trastim em. Tasol taim yu mekim onest pasin ol man bai trastim yu, na dispela i helpim wok bisnis bilong yu long wok gut long nau na bihain tu.

Ol Narapela i Trastim Yu

Nem yu gat olsem onest man inap mekim ol wok bilong yu i kamap gutpela, maski yu save long dispela o nogat. Samting i painim Franz, em yumi bin stori pinis long en, i kamapim klia dispela samting. Em i tok: “Taim mi kirap wok, ol bos bilong mi i testim pasin bilong mi long stap gut long wok na mekim onest pasin, tasol mi yet i no bin save long dispela samting. Bihain mi painimaut olsem mi bin winim ol dispela tes. Dispela i mekim na mi kisim bikpela wok moa na fridom long mekim ol samting, na ol bos i praisim mi long onest pasin bilong mi. Mi save olsem i gat ol narapela man husat i kleva moa long mi na ol inap mekim gut moa wok bilong mi, tasol mi holim yet dispela wok, long wanem, ol bos i trastim mi.”

Abrusim Ol Samting Inap Givim Hevi

David, em bisnisman yumi stori pinis long em, i tok: “Taim mi lukim ol man i no bihainim stret ol lo bambai ol i ken kisim ol gutpela samting insait long sotpela taim, mi save tingting olsem pasin giaman bai kamapim hevi, maski hevi i no kamap nau, em bai kamap bihain. Mipela i bin tok nogat long planti wok bisnis i no bihainim stret ol lo. Planti kampani em ol i insait long pasin giaman, ol i no stap moa na sampela man i mas go long kot. Kampani bilong mipela i abrusim ol kain hevi olsem.”

Taim Ken i kirapim wanpela bulmakau fam long saut-is Afrika, em inap givim grismani long ol ofisa bambai em i ken kisim hariap kago na bilong em i no ken baim takis bilong kago, tasol em i no mekim olsem. Em i tok: “Planti narapela fama i save givim grismani. Mipela i mekim ol samting long onest pasin, olsem na isi isi insait long 10-pela yia mipela i kisim olgeta samting mipela i nidim bilong ronim fam. Olsem wanem? Dispela i bin helpim mipela? Yes! Ol ofisa husat i bin kisim grismani, oltaim ol i save subim ol fama long givim sampela mani moa long ol.”

Karim Hevi Bilong Mani

Taim wanpela bisnis i no ron gut na i luk olsem em bai pundaun, presa bilong mekim pasin giaman i bikpela tru. Tasol long kain taim olsem, gutpela samting inap painim man i gat nem bilong bihainim onest pasin.

Tingim Bill. Konstraksen bisnis bilong em i bin pundaun taim hevi bilong mani i mekim na no gat planti wok bilong sanapim ol nupela haus long Amerika. Em i tok: “Wok bisnis bilong planti bikpela kastama bilong mipela i pundaun, na ol i gat dinau long mipela inap planti handret tausen dola. Taim i luk olsem i no gat rot moa, mi go lukim lain bilong narapela konstraksen kampani, sapos ol inap kisim sampela bilong mipela long wok wantaim ol. Insait long 48 aua bihain long miting, ol i givim wok long mi na long planti wokman bilong mi. Ol i tok mi gat nem olsem man bilong bihainim onest pasin na mekim gut wok.”

Olgeta dispela man mipela i kamapim stori bilong ol, ol i Witnes Bilong Jehova. Ol tok bilong Baibel i stiaim ol pasin ol i bihainim long mekim wok bisnis na olgeta narapela samting long wokabaut bilong ol. Olsem yu lukim, onest pasin i no bagarapim wok bisnis bilong ol, nogat, em i helpim gut ol.

Tasol long olgeta taim ol samting bai kamap we i luk olsem pasin giaman inap kamapim ol gutpela samting. Olsem wanem? Sapos man i gat planti mani, dispela tasol i makim olsem ol samting em i mekim i kamap gutpela?

[Rait long pes 6]

Nem yu gat olsem onest man inap mekim ol wok bilong yu i kamap gutpela, maski yu save long dispela o nogat

[Piksa long pes 7]

“Ol i tok mi gat nem olsem man bilong bihainim onest pasin na mekim gut wok.”—Bill, Amerika