Taim Yu Pilim Olsem Yu No Laik Stap Laip Moa

KLOSTU 3,000 manmeri long olgeta hap bilong graun i save kilim ol yet i dai long olgeta wan wan de. Baibel i kamapim as na planti man i stap bel hevi tru. Baibel i tok yumi stap long ‘taim nogut na dispela bai givim hatwok long ol man,’ na ol bai pilim tru ol presa bilong laip. (2 Timoti 3:1; Saveman 7:7) Taim man i pilim olsem hevi bilong laip i winim em, ating em bai tingting long kilim i dai em yet bilong abrusim ol dispela hevi. Sapos yu kisim kain tingting olsem, yu inap mekim wanem?

Olgeta i Karim Sampela Hevi!

Maski yu pilim olsem hevi bilong yu i bikpela tru, gutpela yu tingim olsem olgeta man i wok long karim sampela hevi long nau. Baibel i tok: “Yumi save olsem olgeta samting God i wokim, ol i wok long krai na pilim pen wantaim.” (Rom 8:22) Ating long nau yu pilim olsem ol hevi bilong yu i no inap pinis, tasol planti taim ol samting bai kamap orait long bihain. Tasol long nau, wanem samting inap helpim yu?

Kamapim tingting bilong yu long wanpela pren i gat gutpela tingting na yu trastim em. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” (Sindaun 17:17) Stretpela man Jop em Baibel i stori long em, i kamapim tingting bilong em long ol narapela taim bikpela hevi tru i bin painim em. Taim Jop i pilim olsem em i “les pinis long i stap laip,” em i tok: “Mi mas tokaut long dispela bikpela hevi bilong mi.” (Jop 10:1) Taim yu kamapim tingting bilong yu long narapela, dispela inap daunim bel hevi bilong yu, na senisim tingting yu gat long ol hevi yu karim.

Autim olgeta hevi bilong yu long God. Sampela i ting olsem prea em i wanpela samting bilong mekim gut bel bilong man long taim bilong hevi na em tasol. Tasol Baibel i no tok olsem. Song 65:2 i tok, God Jehova i “save harim beten” bilong yumi, na 1 Pita 5:7 i tok: “God i save wari long yupela.” Planti taim Baibel i tok em i bikpela samting long bilip olsem God bai helpim yumi. Olsem:

“Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—SINDAUN 3:5, 6.

“Wanem ol manmeri i save pret long [God], em i save givim ol samting long ol. Na em i save harim krai bilong ol na kisim bek ol.”—SONG 145:19.

“Bilip yumi gat long em i olsem, maski wanem wanem samting yumi askim em long en na i stret wantaim laik bilong em, em bai harim yumi.”—1 JON 5:14.

“Bikpela i save stap longwe long ol man i save mekim pasin nogut. Tasol em i putim yau long beten bilong ol stretpela man.”—SINDAUN 15:29.

Sapos yu tokim God long ol hevi yu karim, em bai helpim yu. Olsem na i gat as na Baibel i kirapim yu long ‘bilip oltaim long God. Na autim olgeta hevi na olgeta tingting bilong yu long em.’—Song 62:8.

Taim Yu Mas Kisim Sampela Helpim Moa

Ol ripot i kamapim olsem klostu olgeta man husat i suasaid, ol i gat sik bilong bel hevi.a Dispela i kamapim klia olsem man i mas kisim helpim long dokta. Dokta inap makim marasin na wanem ol kaikai i gutpela bilong kisim. Sampela taim pasin bilong eksasais tu inap givim gutpela helpim. Ol dokta na marasin samting i bin helpim planti husat i gat sik bilong bel hevi.b

Baibel i kamapim planti tok we inap helpim yu long karim hevi na bilip na wetim gutpela samting bai kamap. Olsem, Revelesen 21:4 i tok long God Jehova olsem: “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.” Taim yu tingim tingim dispela promis bilong God, em bai mekim gut bel bilong yu.

Ol Witnes Bilong Jehova i save autim dispela gutpela tok bilong Baibel long planti milion manmeri long olgeta hap bilong graun. Olsem na long dispela taim bilong planti hevi, planti man inap bilip na wetim gutpela samting bai kamap bihain. Bilong kisim sampela save moa, go lukim ol Witnes Bilong Jehova long Haus Kingdom i stap long hap bilong yu, o raitim pas i go long atres i stret long yu na i stap long pes 5 bilong dispela magasin. Yu ken lukim tu Web-sait bilong mipela www.watchtower.org.

[Ol Futnot]

[Blok long pes 10]

OL TOK BILONG BAIBEL INAP HELPIM YU

● “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.”—Filipai 4:6, 7.

● “Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi.”—Song 34:4.

● “God i save stap klostu long ol manmeri i gat hevi. Na em i save helpim ol manmeri [“bel,” NW ] bilong ol i bagarap.”—Song 34:18.

● “Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.”—Song 147:3.

[Blok long pes 11, 12]

SAPOS YU TINGTING LONG KILIM YU YET I DAI . . .

Toktok wantaim wanpela pren yu trastim

Autim olgeta hevi bilong yu long God

Kisim helpim long dokta

[Blok/Piksa long pes 12]

BILONG OL PREN NA FAMILI

Planti taim ol famili na ol gutpela pren i fes lain long luksave olsem man i bel hevi i tingting long kilim em yet i dai. Sapos olsem, mekim sampela samting bilong helpim em, dispela inap seivim laip bilong em! Putim gut yau na pilim hevi bilong em. Kamapim olsem ol hevi em i wok long karim i samting tru. Baibel i tok: “Mekim gut bel bilong ol man i bel hevi.” (1 Tesalonaika 5:14) Kirapim man i bel hevi long kisim helpim, na sapos em i no mekim olsem, orait stretim rot bilong em i ken kisim helpim.