Ol Yangpela i Laik Save . . .

Kilim i Dai Yu Yet—Yu Ting Em Rot Bilong Stretim Hevi?

‘Mi les long kirap olgeta moningtaim. Mi lus pinis. Mi belhat. Bel bilong mi i hevi tumas. Mi tingting long lusim yupela. Mi no laik go, tasol mi ting mi mas mekim olsem. Mi tingting long bihain na i olsem tudak na hevi tasol i wetim mi.’—Pas bilong Peter, em i gat 21 krismas na em i kilim i dai skin bilong em yet.a

OL SAVEMAN i tok, inap olsem 2 milion yangpela long Amerika i bin mekim traim long kilim i dai skin bilong ol yet. Sori tru, inap 5,000 i mekim tru long olgeta yia. Tasol dispela pasin bilong ol yangpela long kilim ol yet i dai i no bilong Amerika tasol. Long India, inap 30,000 yangpela i bin kilim i dai skin bilong ol yet long 1990. Na long ol kantri olsem Finlan, Frans, Israel, Kanada, Netelan, Nu Silan, Spen, Swiselan, Tailan, namba bilong ol yangpela i bin kilim i dai skin bilong ol yet i go antap tru.

Tasol olsem wanem sapos bel hevi i daunim tru wanpela yangpela, o em i pilim olsem pen na hevi i kalabusim em na em i no gat rot long lusim? Ating em inap kisim tingting long kilim i dai em yet, tasol sapos em i mekim olsem, em bai tromoi nating gutpela laip bilong em. Na bihain dispela bai givim bikpela bel hevi long ol pren na long famili. Maski yu ting ol gutpela samting i no inap kamap long bihain na nau ol hevi i daunim yu tru, sapos yu kilim i dai skin dispela i no gutpela rot bilong stretim hevi.

As Bilong Dispela Tingting

Stretpela man Jop i bin pilim bikpela bel hevi. Taim famili na ol samting bilong em i lus, na skin bilong em i gat bikpela sik, em i tok: “Mi ting mobeta ol i pasim nek bilong mi na mi dai. Mi no laik i stap moa long dispela bodi bilong mi na karim olkain hevi.” (Jop 7:15) Long nau sampela yangpela i gat wankain tingting. Wanpela man bilong raitim buk i tok: ‘Hevi i save kamapim pen (bel i bagarap na tingting pret) na ol man i save painim rot long abrusim pen.’ Olsem na ol man i kilim i dai ol yet i popaia tru long painim rot bilong abrusim hevi ol i ting ol i no inap karim.

Wanem samting inap kamapim kain hevi olsem? Bikpela kros wantaim papamama o boipren o gelpren inap kamapim. Brad i gat 16 krismas taim em i kros wantaim gelpren na tupela i bruk; bel bilong em i bagarap stret. Tasol em i no bin kamapim hevi bilong em long narapela. Em i go tasol na hangamapim em yet na em i dai.

Sunita i gat 19 krismas, na em i kisim bikpela bel hevi taim papamama i kisim save olsem em i save pamuk wantaim boipren bilong em. Em i tingim bek na i tok: “Mi save olsem mi no laik stap laip moa na i stap wankain yet. Olsem na wanpela nait mi go bek long haus na mi dring planti marasin aspirin. Long moningtaim mi trautim blut. Tasol mi no laik pinisim laip bilong mi; mi laik pinisim wokabaut bilong mi.”

Skul tu inap putim bikpela hevi long ol yangpela. Papamama bilong Ashish ol i wok dokta, na ol i subim em tu long kamap dokta. Ashish i no inap slip moa long nait na em i wok long surik long ol narapela. Em i pilim olsem em i no inap winim ol mak papamama i putim bilong em i mas winim long skul, olsem na Ashish i dring planti marasin bilong slip na em i dai. Dispela stori i helpim yumi long tingim Sindaun 15:13 long Baibel, em i tok: “Sapos bel bilong man i hevi, bai tingting bilong en i bagarap.”

Hevi Insait Long Famili

Narapela as na sampela yangpela i kilim i dai ol yet em ol hevi bilong famili, olsem: papamama i katim o brukim marit, wanpela long famili i dai, famili i go sindaun long narapela hap. Tingim Brad, em yumi stori pinis long em. Tupela gutpela pren na wanpela wanblut bilong em i bagarap taim ka i bam. Bihain famili bilong em i gat hevi long mani. Ol dispela hevi i daunim Brad olgeta. Ating em i gat wankain tingting olsem man bilong raitim Song, em i tok: “Planti hevi i kamap long mi . . . long san na long nait wantaim.”​—Song 88:​3, 17.

Na planti yangpela i wok long karim narapela hevi olsem: Ol man i mekim nogut long ol na bagarapim skin na bel na tingting bilong ol, na mekim pasin sem long ol. Long provins Kerala long India, bikpela lain yangpela i kilim i dai ol yet, winim planti narapela hap bilong kantri. Sampela yangpela meri i bin mekim traim long kilim i dai ol yet, long wanem, papa bilong ol i mekim pasin sem long ol. Pasin bilong mekim nogut long ol pikinini long kain kain rot i go bikpela tru long olgeta hap, na dispela i putim bikpela hevi moa long dispela lain i no gat asua.

Ol Narapela As

Tasol sampela taim, pasin ol yangpela yet i mekim i kirapim ol long tingting long kilim i dai ol yet. Ol i bin skelim ol yangpela i no marit na wanpela ripot i tok: ‘Pasin bilong kilim i dai ol yet i save kamap moa namel long ol yangpela i save pamuk na dring, winim ol yangpela i no save mekim olsem.’ Sunita i bin wok long pamuk na em i kisim bel, na bihain em i rausim bel. (Skelim wantaim 1 Korin 6:18.) Taim bel i wok long kotim em, em i laik i dai. Na Brad i bin wok long dring kirap long taim em i gat 14 krismas, na planti taim em i dring spak. Tru tumas, taim man i dring planti, i olsem ‘wanpela snek nogut i kaikaim em.’​—Sindaun 23:32.

Na tu, taim wanpela i “bel hevi na [i] gat planti tingting long ol samting,” dispela inap kirapim em long tingting long kilim i dai em yet. (Song 94:19) Ol dokta i tok, taim sampela samting long skin i no wok gut sampela taim tingting i no stap isi. Olsem Peter, pastaim yumi bin stori long em. Paslain long em i kilim i dai em yet, ol dokta i tok, wanpela marasin insait long kru i no wok gut. Sapos yu no mekim sampela samting bilong daunim bel hevi, bel hevi inap go bikpela tru na yu inap tingting long pinisim long rot bilong kilim i dai yu yet.

Kisim Sampela Helpim

Tasol yangpela i no ken ting pasin bilong kilim i dai skin bilong em yet, em wanpela rot bilong pinisim hevi. Tupela dokta bilong skelim tingting i tok, yumi olgeta i gat ‘sampela strong i stap long skin bilong yumi yet bilong helpim yumi long karim hevi. Na tu, yumi inap kisim strong long ol narapela bilong helpim yumi.’ (Alan L. Berman na David A. Jobes) Ating famili na ol pren inap helpim yu. Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long [em], orait [em] bai i belgut tru.” Tru tumas, gutpela tok bilong wanpela man i pilim tru hevi bilong yu inap helpim yu long daunim bel hevi!

Olsem na sapos yu bel hevi o yu tingting planti, i no gutpela long yu wanpela i karim dispela hevi. (Sindaun 18:1) Yu mas kamapim olgeta tingting i stap long bel bilong yu long narapela yu inap bilip long em. Taim yu toktok wantaim narapela dispela inap daunim strong bilong bel hevi, na ating long dispela rot bai yu kisim narapela tingting long ol hevi bilong yu. Na sapos yu bel hevi long wanpela pren o famili i dai, yu mas toktok wantaim wanpela gutpela pren. Taim man i krai na kamapim bel hevi bilong em, bel bilong em i save stap isi. (Saveman 7:​1-3) Na i gutpela sapos yu tok promis long singautim pren bilong yu sapos tingting i kamap gen long kilim i dai yu yet.

Tru ating yu hatwok long bilip long narapela. Tasol laip bilong yu inap lus, olsem na ating mobeta yu mekim olsem, a? Ating sapos yu toktok gut wantaim narapela bai yu no gat strongpela laik moa long bagarapim yu yet. Tasol sampela i laik save, ‘Bai mi toktok wantaim husat?’ Sapos papamama i Kristen, gutpela sapos yu ‘autim olgeta tingting i stap long bel bilong yu’ long ol. (Jop 33:3) Ating ol inap pilim tru hevi bilong yu na helpim yu, maski yu ting ol i no inap. Sapos yu mas kisim sampela moa helpim​—olsem dokta i mas glasim yu​—ol inap stretim rot bilong em i ken mekim olsem.

Ol wanlotu Kristen tu inap helpim yu. Ol elda long kongrigesen inap strongim na helpim ol man i bel hevi. (Aisaia 32:​1, 2; Jems 5:​14, 15) Bihain long Sunita i mekim traim long kilim i dai em yet, wanpela meri i save autim tok oltaim, olsem painia, i bin helpim em. Sunita i tok: “Long olgeta samting i painim mi em i no lusim mi liklik. Sapos em i no bin helpim mi, bai mi kamap longlong.”

Karim Hevi

Na tu, strong i stap long skin bilong yu bilong helpim yu yet. Olsem wanem? Bel i kotim yu, long wanem, yu bin mekim wanpela rong? (Skelim wantaim Song 31:10.) Orait, no ken wet inap long bel hevi i go bikpela moa; yu mas wok long stretim dispela rong. (Aisaia 1:18; skelim wantaim 2 Korin 7:11.) Gutpela samting yu ken mekim, em yu mas autim rong bilong yu long papamama. Tru, ating pastaim ol bai kros. Tasol ating ol bai painim rot long helpim yu. Na Baibel i tok, Jehova “i save marimari moa yet” long ol man i tanim bel tru. (Aisaia 55:7) Ofa bilong Jisas bilong baim bek ol man i karamapim rong bilong ol man i tanim bel.​—Rom 3:​23, 24.

Ol Kristen i gat bilip, na ol i save long ol tok bilong Baibel, na ol i stap pren bilong God Jehova, olsem na ol inap kisim strong long ol dispela rot. Sampela taim Devit i bin bel hevi tru na em i tok: “Birua bilong mi . . . i daunim mi tru.” Tasol bilip bilong em i no bagarap olgeta. Em i tok: “Mi singaut strong long Bikpela . . . Mi wok strong long askim em long helpim mi.”​—Song 142:1; 143:​3-5.

Sapos laik long bagarapim yu yet i kamap strong, yu mas beten long Jehova. Em i save long hevi bilong yu na em i laik helpim yu long i stap laip! (Song 56:8) Em inap givim “bikpela strong” moa long yu bambai yu inap karim dispela hevi. (2 Korin 4:7) Na yu mas tingting tu, sapos yu kilim i dai yu yet dispela bai givim bikpela hevi long famili bilong yu, na ol pren, na Jehova yet. Sapos yu tingim ol dispela samting, ating bai yu lukautim gut laip bilong yu.

Maski sampela i ting hevi bilong ol i no inap pinis, ol i mas save, ol narapela i bin karim wankain hevi na ol i winim na ol i stap laip yet. Ol i kisim save olsem: hevi i no inap stap oltaim​—i gat pinis bilong en. Ol narapela inap helpim man i bel hevi long winim hevi bilong em. Olsem na ol man i bel hevi i mas kisim dispela helpim​—na bai ol i ken stap laip yet!

[Ol Futnot]

[Piksa long pes 18]

I gutpela sapos yu kamapim bel hevi bilong yu long narapela