Yumi Mas Beten Long God Olsem Wanem?

PASIN bilong toktok o kamapim ol tingting bilong yumi long God i Gat Olgeta Strong, dispela em i wanpela gutpela samting tru. Tasol planti man i no kliagut long ol bai beten olsem wanem, na sampela i laik mekim beten bilong ol i kamap gutpela moa. Sampela disaipel bilong Jisas Krais long bipo, ol tu i laik mekim ol beten bilong ol i kamap gutpela moa. Wanpela bilong ol i tokim Jisas: “Bikpela, skulim mipela long mekim beten.” (Luk 11:1) Jisas i skulim ol long dispela beten, em ol i kolim Beten Bilong Bikpela o Papa Bilong Mipela. Dispela gutpela beten i helpim yumi long beten long pasin we God i orait long en, na tu, em i kamapim klia bikpela as tok bilong Baibel.

Beten Bilong Jisas

Jisas i tok: “Yupela i mas beten olsem: ‘Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven. Givim bret long mipela inap long dispela de. Na fogivim ol rong bilong mipela olsem mipela i fogivim ol man i rongim mipela. Na no ken larim mipela i pundaun long traim, tasol kisim bek mipela long han bilong Satan.’”—Matyu 6:9-13.

Tingim tok Jisas i mekim: “Yupela i mas beten olsem.” Bilong wanem em i tok olsem? Jisas i no laik bai ol disaipel bilong em i bihainim dispela tok bilong em na kolim wankain tok planti taim. Paslain long em i skulim ol disaipel long beten, em i bin tokim ol long ol i no ken kolim ol wankain tok gen na gen long ol beten bilong ol. (Matyu 6:7) Beten bilong em i skulim yumi long samting i mas i stap nambawan—em samting i bikpela moa long ai bilong God, na i no long yumi. Bilong save long wanem samting i mas i stap nambawan, yumi mas kliagut long mining bilong tok bilong Jisas. Orait nau yumi ken skelim ol wan wan tok bilong em.

Mining Bilong Beten Bilong Bikpela

“Papa bilong mipela long heven, nem bilong yu i mas i stap holi.” Jisas i kolim God olsem “Papa,” long wanem, wankain olsem ol papa bilong graun, God i save laikim na lukautim ol pikinini bilong em. Em i gat nem bilong en, em Jehova, olsem na ol biknem bilong em—olsem God i Gat Olgeta Strong, God, na Bikpela—ol dispela biknem i no ken kisim ples bilong nem tru bilong em.a (Song 83:18, NW) Bilong wanem nem bilong God i mas i stap holi? Long wanem, ol i bin bagarapim na krungutim gutnem bilong em.

Sampela man i sutim tok long God long ol hevi i painim ol, tasol tru tru ol man yet i as bilong ol dispela hevi o ating ol i stap long wanpela ples long taim hevi i kamap. (Sindaun 19:3; Saveman 9:11) Sampela i sutim tok long God na tok em i as bilong ol hevi bilong win na ren na sunami samting. Tasol Baibel i tok olsem “ol samting nogut i no inap traim God, na tu, God i no save traim man.” (Jems 1:13) Planti lotu i skulim ol man olsem God i save givim strafe long ol man nogut na kukim ol long paia bilong hel, em wanpela bilip we i bagarapim nem bilong God bilong pasin laikim. (Jeremaia 19:5; 1 Jon 4:8) Long Rom 6:23, Baibel i tok: “Pe bilong sin em dai,” em i no tok ol bai kisim pen inap oltaim oltaim!b

“Kingdom bilong yu i mas i kam.” Kingdom Bilong God em i wanpela gavman, na Jisas Krais, em i King bilong en. Klostu nau em bai bosim graun olgeta. Daniel 7:14 i tok: “Dispela Man bilong bipo bipo yet i mekim em i kamap king na i givim em strong na biknem.” Kingdom Bilong God bai “kam” na pasim wok bilong ol man nogut na bagarapim olgeta wok bos bilong ol man, na em bai bosim graun.—Daniel 2:44.

“Laik bilong yu i mas kamap long graun olsem em i save kamap long heven.” Taim Kingdom i bosim graun, ol manmeri bai bihainim laik bilong God. Olsem na bel isi bai stap namel long olgeta man na ol bai lotuim God long pasin i stret wantaim laik bilong em. Ol wok politik na ol lotu giaman bai i no stap moa. Revelesen 21:3, 4 i tok: “Haus sel bilong God i stap wantaim ol manmeri, . . . na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”

“Givim bret long mipela inap long dispela de.” Jisas i putim nem na Kingdom Bilong God i stap nambawan samting, orait nau em kolim ol samting yumi nidim long ol wan wan de. Tok bilong em i kamapim klia olsem yumi mas kisim tasol ol samting “inap long dispela de.” Yumi mas bihainim stiatok i stap long Sindaun 30:8: “Yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi.”

“Fogivim ol rong bilong mipela olsem mipela i fogivim ol man i rongim mipela.” Sin bilong yumi i kain olsem “dinau.”c Yumi olgeta i gat dinau long God, olsem yumi mas bihainim tok bilong em. Olsem na taim yumi sakim tok bilong em, o mekim sin, i olsem dinau bilong yumi i wok long i go antap. Tasol Jehova i redi long lusim rong bilong yumi taim yumi fogivim ol narapela i rongim yumi.—Matyu 18:21-35.

“No ken larim mipela i pundaun long traim, tasol kisim bek mipela long han bilong Satan.” Baibel i kolim Satan olsem “Man Bilong Traim Man.” (Matyu 4:3) Yumi gat sin olsem na yumi mas kisim helpim long God na bai yumi sakim Satan na lain bilong en.—Mak 14:38.

Beten bilong Jisas inap helpim yu long mekim ol beten bilong yu i kamap gutpela moa, na ating yu ken stretim tingting bilong yu long samting i mas i stap nambawan long laip bilong yu. Tasol olsem wanem beten bilong Jisas i kamapim klia bikpela tok bilong Baibel? Bikpela as tok bilong Baibel em wok bilong mekim holi nem bilong God, rausim ol pasin nogut, na ol man bai stap bel isi taim Kingdom Bilong God i bosim graun, dispela i stret wantaim tok Jisas i bin mekim. Em ol gutpela tok tru Jisas i kamapim insait long beten bilong em, laka!

[Ol Futnot]

YU LAIK SAVE?

● Wanem mining bilong tok bilong Jisas taim em i tok: “Yupela i mas beten olsem”?—Matyu 6:9.

● Wanem samting i mas i stap nambawan samting long ol beten bilong yumi?—Matyu 6:9, 10.

● Wanem samting i olsem “dinau”? Bilong wanem yumi mas fogivim ol rong ol man i mekim long yumi?—Matyu 6:12, futnot.

[Piksa long pes 21]

Beten bilong Jisas i skulim yumi long samting i stap nambawan long ai bilong God, na i no long yumi